ບ້ານຫາດປາງໜ່ວຍພັກເຂັ້ມແຂງນຳພາປະຊາຊົນຫຼຸດພົ້ນອອກຈາກຄວາມທຸກຍາກ

 ບ້ານຫາດປາງເປັນບ້ານໜື່ງໃນຈຳນວນ 51 ບ້ານຂອງເມືອງປາກອູຕັ້ງຢູ່ທາງທິດເໜືອຂອງເມືອງຫ່າງຈາກເທສະບານເມືອງປະມານ30ກິໂລແມັດ, ມີເນື້ອທີ່ທັງໝົດ 5.537 ເຮັກຕາ, ຂຶ້ນກັບກຸ່ມພັດທະນາທີ 6, ມີ 336 ຄອບຄົວ, ມີພົນລະເມືອງທັງໝົດ 1.734 ຄົນ, ຍິງ 846 ຄົນ, ປະກອບມີ 2 ເຜົ່າຄື: ເຜົ່າລື້, ກວມ 80,96%, ເຜົ່າ ມົ້ງ, ກວມ 19,04%, ອາຊີບຂອງປະຊາຊົນແມ່ນປູກຝັງ, ລ້ຽງສັດ, ຄ້າຂາຍ ແລະການບໍລິການ, ຜ່ານການຊີ້ນໍາຂອງຄະນະພັກບ້ານໄດ້ເຮັດໃຫ້ ປະຊາຊົນມີລາຍຮັບທີ່ດີຂຶ້ນຈົນສາມາດເຮັດໃຫ້ຄອບຄົວຂອງປະຊາຊົນພາຍໃນບ້ານຫາດປາງພົ້ນທຸກໄດ້.

  ສະຫາຍ ຈັນເພັງ ແສນແກ້ວ, ເລຂາໜ່ວຍພັກບ້ານຫາດປາງ ເມືອງປາກອູ ໄດ້ໃຫ້ສໍາພາດຕໍ່ທີມຂ່າວພວກເຮົາວ່າງບໍ່ດົນນີ້ວ່າ: ໜ່ວຍພັກບ້ານຫາດປາງສ້າງຕັ້ງຂຶ້ນໃນປີ 1997 ພາຍຫຼັງຍຸບໜ່ວຍພັກຕາແສງ, ໄດ້ເປັນໜ່ວຍພັກໜຶ່ງຂຶ້ນກັບຄະນະບໍລິຫານງານພັກ ເມືອງປາກອູ ມີສະມາຊິກພັກທັງໝົດ 36 ສະຫາຍ, ຍິງ 3 ສະ ຫາຍ, ການຂະຫຍາຍຕົວທາງດ້ານ ເສດຖະກິດຊັກຊ້າ, ສັງຄົມບໍ່ມີ ຄວາມສະຫງົບ, ຊີວິດການເປັນຢູ່ຂອງພໍ່ແມ່ປະຊາຊົນມີຄວາມຫຍຸ້ງຍາກ, ຝືດເຄື່ອງ, ການຜະລິດແບບຄອງເດີມ, ອີງໃສ່ທຳມະຊາດ,ມີບາງປີປະຊາຊົນຂາດເຂົ້າກິນຫຼາຍເດືອນ,ມີຜູ້ກືກໜັງສື ກວມອັດຕາສ່ວນສູງ, ການປະຕິບັດ ຫຼັກການອະນາໄມ 3 ສະອາດ ບໍ່ທັນດີ, ການເຮັດວຽກງຂອງຄະນະໜ່ວຍພັກ ແລະອົງການປົກຄອງບ້ານແມ່ນລໍຖ້າປະຕິບັດຕາມຄຳສັ່ງຂອງຂັ້ນເທິງ, ມີປາກົດການຫຍໍ້ທໍ້ເກີດຂຶ້ນຫຼາຍຢ່າງເຊັ່ນ: ຂີ້ລັກ, ຜິດກັນ, ປະຕິບັດກົດລະບຽບສຳມະໂນຄົວບໍ່ເຂັ້ມງວດ, ມີຄອບຄົວທຸກຍາກກວມ 80% ຂອງຄອບຄົວທັງໝົດ.

  ເມື່ອເຫັນວ່າພາຍໃນບ້ານຄອບຄົວປະຊາຊົນຍັງທຸກຫຼາຍຄະນະພັກຂັ້ນບ້ານໄດ້ຈັດກອງປະຊຸມປຶກສາຫາລືເພື່ອຄວາມເປັນເອກະພາບພາຍໃນພັກ, ຄົ້ນຄວ້າຊອກຊ່ອງ ທາງເພື່ອແກ້ໄຂບັນດາປາກົດການຫຍໍ້ທໍ້ພາຍໃນບ້ານ ແລະແກ້ໄຂຄວາມທຸກຍາກຂອງປະຊາຊົນ,ຄະນະໜ່ວຍພັກໄດ້ເອົາໃຈໃສ່ສຶກສາອົບຮົມພໍ່ແມ່ປະຊາຊົນພາຍໃນບ້ານດ້ວຍຫຼາຍຮູບການ,ຈາກນັ້ນໄດ້ລົງສຶກສາອົບຮົມຕາມໜ່ວຍຜະລິດໂດຍອີງໃສ່ຕາມລະດູການເປັນຫຼັກເຮັດໃຫ້ປະຊາຊົນກຳແໜ້ນ ແລະຕື່ນຕົວປະກອບສ່ວນພັດທະນາບ້ານຂອງຕົນດີຂຶ້ນເທື່ອລະກ້າວ, ໄດ້ນຳພາປະຊາຊົນທຳການຜະລິດເພື່ອແກ້ໄຂຄວາມທຸກຍາກໂດຍອີງໃສ່ເງື່ອນໄຂຂອງແຕ່ລະຄອບຄົວເຊັ່ນ: ອາຊີບເຮັດນາ, ປູກພືດເປັນສິນຄ້າ, ລ້ຽງສັດໃຫຍ່, ສັດປີກ, ຄ້າຂາຍ ແລະເຮັດການບໍລິການ ແລະອາຊີບອື່ນໆ.

ຜ່ານການຈັດຕັ້ງປະຕິບັດມາຮອດປີ 2003 ເຫັນວ່າພໍ່ແມ່ປະຊາຊົນມີຊີວິດການເປັນຢູ່ດີຂຶ້ນ, ສາມາດແກ້ໄຂຄອບຄົວທຸກຍາກຈາກ 80% ຍັງເຫຼືອ 30% ຂອງຄອບ ຄົວທັງໝົດ, ສະເລ່ຍລາຍຮັບໃສ່ຫົວ ຄົນແມ່ນໄດ້ 8 ລ້ານກີບຕໍ່ຄົນຕໍ່ປີ. ມາຮອດປີ 2015 ຄະນະໜ່ວຍ ພັກໄດ້ສົມທົບກັບກະສິກໍາເມືອງ ໄດ້ມີການແບ່ງດິນ, ແບ່ງປ່າໃຫ້ ປະຊາຊົນເປັນຜູ້ຄຸ້ມຄອງນໍາໃຊ້, ເພື່ອລຸດຜ່ອນການຖາງປ່າແບບ ຊະຊາຍ, ປະຊາຊົນແມ່ນໄດ້ຫັນມາ ປູກໝາກງາ, ໝາກເດືອຍເປັນສິນຄ້າ ແລະອີກຈໍານວນໜຶ່ງແມ່ນໄດ້ ສືບຕໍ່ເຮັດອາຊີບຄ້າຂາຍບໍລິການໂດຍສະເພາະແມ່ນການແລ່ນລົດ 12 ລໍ້ປະຈຸບັນບ້ານຫາດປາງມີລົດ 12 ລໍ້ທັງໝົດ 117 ຄັນ, ໄດ້ເຮັດໃຫ້ຈໍານວນຄອບຄົວທຸກຍາກຫຼຸດລົງເຫຼືອພຽງແຕ່ 2 ຄອບຄົວ, ເທົ່າກັບ 0.64%, ສະເລ່ຍລາຍຮັບໃສ່ ຫົວຄົນ 10 ລ້ານກີບຕໍ່ຄົນຕໍ່ປີ.

  ເມື່ອເຫັນວ່າຄອບຄົວຂອງປະຊາຊົນມີລາຍຮັບທີ່ດີຂຶ້ນທາງຄະນະໜ່ວຍພັກຈຶ່ງໄດ້ວາງແຜນ, ຈາກການປູກ-ການລ້ຽງແບບຕາມທຳມະຊາດຫັນໄປສູ່ການລ້ຽງສັດເປັນ ສິນຄ້າ, ນຳໃຊ້ເຕັກນິກວິທະຍາສາດ, ມີການສັກຢາປ້ອງກັນພະຍາດ, ລ້ຽງແບບເປັນຟາມ, ປູກຫຍ້າເຮັດເປັນລ໋ອກປ່ອຍໃຫ້ສັດກິນປະຈຸບັນທົ່ວບ້ານມີງົວທັງໝົດ 716 ໂຕ, ຄວາຍ 145 ໂຕ, ໝູ 4.046 ໂຕ, ສັດປີກ 8.018 ໂຕ, ມີຟາມລ້ຽງໝູ 17 ຟາມ, ມີໝູທັງໝົດ 9.000 ໂຕ, ຟາມລ້ຽງໄກ່ພັນ 1 ຟາມ, ມີໄກ່ 1.000 ໂຕ, ມີໜອງປາ 12 ໜອງ, ປ່ອຍປາແລ້ວ 8.700 ໂຕ, ມີໂຮງສີນ້ອຍ 34 ໂຮງ, ໂຮງສີໃຫຍ່ມີ 3 ແຫ່ງ, ໂຮງງານດິນບັອກ 2 ໂຮງ, ຮ້ານຂາຍເຄື່ອງຍ່ອຍ 26 ຮ້ານ, ຮ້ານຂາຍເຄື່ອສົ່ງ 1 ຮ້ານ, ຮ້ານສ້ອມແປງ ລົດໃຫຍ່ 4 ຮ້ານ, ຮ້ານສ້ອມແປງລົດຈັກ 2 ຮ້ານ, ຮ້ານອາຫານ 10 ຮ້ານ, ມີຮ້ານຂາຍລົດໃຫຍ່ 1 ຮ້ານ, ມີຕະຫຼາດ 1 ແຫ່ງ.

  ມາຮອດປະຈຸບັນປະຊາຊົນມີລາຍຮັບຈາກການຂາຍງົວ-ຄວາຍອອກສູ່ຕະຫຼາດພາຍໃນ-ພາຍນອກ ແລະການບໍລິການຄ້າຂາຍ, ເຮັດໃຫ້ມີລາຍຮັບເພີ່ມຂຶ້ນແຕ່ລະປີໂດຍ ສະເລ່ຍຫົວຄົນໜື່ງ 13 ລ້ານກີບ ຕໍ່ຄົນຕໍ່ປີຈາກທ່າແຮງດັ່ງກ່າວໄດ້ກາຍເປັນອາຊີບຕົ້ນຕໍຂອງຊາວບ້ານຫາດປາງໃນການສ້າງລາຍຮັບໃຫ້ແກ່ຄອບຄົວ, ພ້ອມທັງເຮັດໃຫ້ປະຊາຊົນບ້ານຫາດປາງຫຼຸດພົ້ນອອກຈາກຄວາມທຸກຍາກຢ່າງສີ້ນເຊີງກໍຍ້ອນໜ່ວຍພັກເຂັ້ມແຂງນຳພາປະຊາຊົນຫຼຸດພົ້ນອອກຈາກຄວາມທຸກຍາກໄດ້.

  ສໍາລັບປີ 2020 ນີ້ທາງຄະນະໜ່ວຍພັກບ້ານຫາດປາງຍັງໄດ້ວາງແຜນສູ້ຊົນເຮັດໃຫ້ປະຊາຊົນມີລາຍຮັບສະເລ່ຍໃຫ້ໄດ້ 15 ລ້ານກີບຄົນຕໍ່ປີ.

__________

ຂຽນໂດຍ: ສີສຸວັນ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

ສົນໃຈລົງໂຄສະນາໄດ້ທີ່:  021 313645, 316511

 

 

แชร์