ຫວຽດນາມ ຢຸດອອກວີຊ່າໃຫ້ຜູ້ທີ່ມາຈາກ 8 ປະເທດ

  ນັບແຕ່ເວລາ 00 ໂມງ ວັນທີ 12 ມີນາ, ສສ ຫວຽດນາມ ຢຸດອອກວີຊ່າໃຫ້ພົນລະເມືອງ 8 ປະເທດ ເພາະວ່າມີຄວາມກັງວົນກ່ຽວກັບພະຍາດໂຄວິດ-19 ພວມແຜ່ ລະບາດໜັກ.

  ຕາມຂ່າວສານຫວຽດນາມລາຍງານວ່າຫວຽດນາມປະກາດຢຸດຕິການອອກວີຊ່າຢ່າງເປັນທາງການຊົ່ວຄາວສຳລັບຜູ້ທີ່ເດີນທາງມາຈາກ 8 ປະເທດໃນເອີຣົບເພາະວ່າມີຄວາມກັງວົນກ່ຽວກັບພະຍາດໂຄວິດ-19 ພວມແຜ່ລະບາດໜັກ, ໂດຍສະເພາະປະເທດດານມາກ, ນອກແວ, ແຟງລັງ, ຊູແອດ, ອັງກິດ, ເຢຍລະມັນ, ຝຣັ່ງ ແລະແອັດສະປາຍຫຼັງຈາກຫວຽດນາມພົບຜູ້ຕິດເຊື້ອ ໂຄວິດ-19 ເພີ່ມຂຶ້ນອີກ 14 ຄົນເມື່ອທ້າຍອາທິດຜ່ານມາໃນຈຳນວນນີ້ 11 ຄົນ ເດີນທາງມາຈາກເອີຣົບ,  ກ່ອນໜ້ານີ້ໄດ້ຢຸດອອກວີຊ່າຊົ່ວຄາວສຳລັບຊາວ ສ.ເກົາຫຼີ ແລະອີຕາລີ, ລັດຖະບານຫວຽດນາມຈະພິຈາລະນາໃຊ້ມາດຕະການດຽວກັນກັບປະເທດທີ່ມີຜູ້ຕິດເຊື້ອເກີນ 500 ຄົນ ຫຼືພົບຜູ້ຕິດເຊື້ອເກີນວັນລະ 50 ຄົນ.

  ນອກຈາກນັ້ນ, ກະຊວງສາທາລະນະສຸກຫວຽດນາມແຈ້ງວ່າ: ພົບຜູ້ຕິດເຊື້ອພະຍາດໂຄວິດ-19 ຈຳນວນ 30 ຄົນ, ຜູ້ຕ້ອງສົງໄສ 100 ຄົນ ແລະຜູ້ຕິດເຊື້ອປິ່ນປົວຫາຍດີແລ້ວ 16 ຄົນ.

________________

ໜັງສືພິມເສດຖະກິດ-ສັງຄົມ

ສົນໃຈລົງໂຄສະນາໄດ້ທີ່:  021 313645, 316511

 

แชร์