ດາຣາພົງ ນັກທຸລະກິດຍີງຍຸກໃໝ່ຫັນສົ່ງເສີມຜູ້ດ້ອຍໂອກາດ

   ທ່ານ ນາງ ດາຣາພົງ ຍຸຕິທຳ ຫຼືມີນາຫຼາຍຄົນຮູ້ຈັກດີໃນວົງການທຸລະກິດເປັນນັກທຸລະກິດລາວຍິງຍຸກໃໝ່ມີແນວຄິດໃນການດຳເນີນທຸລະກິດຊຶ່ງເປັນຜູ້ຢູ່ເບື້ອງຫຼັງດຳເນີນທຸລະກິດທີ່ປະສົບຜົນສຳເລັດຫຼາຍຢ່າງ ແລະປະຈຸບັນເພິ່ນຍັງຫັນມາສົ່ງເສີມຜູ້ດ້ອຍໂອກາດໂດຍສະເພາະຜູ້ເສຍອົງຄະສາມາດຜະລິດສິ້ນຄ້າອອກສູ່ຕ່າງປະເທດ.

  ທ່ານ ນາງ ດາຣາພົງ ຍຸຕິທຳ ຜູ້ອຳນວຍການບໍລິສັດ ລາວ ພຣາຍ (LAO PRIDE INC) ໃຫ້ສຳພາດກັບນັກຂ່າວໜັງສືພິມເສດຖະກິດ-ສັງຄົມ ໃຫ້ຮູ້ວ່າ: ລາວ ພຣາຍ ອິ້ງ ແມ່ນໂຮງງານທີ່ເຮັດຜະລິດກ່ຽວກັບເຄື່ອງປະດັບຫຼູເພື່ອອອກໄປຕ່າງປະເທດ, ໂດຍໄດ້ເປີດທຳການຜະລິດມາໄດ້ 10 ກວ່າປີມາແລ້ວ, ຊຶ່ງລູກຄ້າຫຼັກໆແມ່ນສົ່ງອອກໄປປະເທດອາເມລິກາ ແລະອົດສະຕາລີ, ສ່ວນໃນການຜະລິດຂອງໂຮງງານຍັງເນັ້ນສົ່ງເສີມ ແລະຊ່ວຍເຫຼືອຜູ້ດ້ອຍໂອກາດໂດຍສະເພາະແມ່ນແມ່ຍິງລາວ ແລະຜູ້ເສຍອົງຄະ, ພ້ອມທັງເປັນການພັດທະນາສັກກະຍະພາບຂອງຄົນລາວຕົ້ນຕໍແມ່ຍິງຢູ່ໃນລາວ, ດັ່ງນັ້ນຈຶ່ງເຮັດໃຫ້ແຮງງານ ຫຼືມີທີມງານທີ່ເຮັດວຽກກັບບໍລິສັດຈຳນວນ 1 ຮ້ອຍກວ່າຄົນ, ໃນນີ້ລວມທັງຜູ້ຜະລິດ ແລະ ພະນັກງານຫ້ອງການ, ແຕ່ວ່າ 30-40% ແມ່ນແຮງງານຂອງແມ່ຍິງ ແລະ ອີກ 30% ກໍເປັນແຮງງານຍິງ ແລະແຮງງານຊາຍທີ່ເປັນຄົນເສຍອົງຄະ.

  ທ່ານ ນາງ ດາຣາພົງ ຍຸຕິທຳ ໃຫ້ຮູ້ອີກວ່າ: ປະຈຸບັນແຮງງານທີ່ມີເປັນຫຍັງຈຶ່ງກວມເອົາແຮງງານທີ່ເປັນຄົນເສຍອົງຄະ, ຊຶ່ງທັງນີ້ກໍເພາະວ່າແຮງງານເຫຼົ່ານີ້ມີຄວາມອົດທົນສູງ ແລະຖືກັບວຽກທີ່ເຮັດໂດຍສະເພາະງານທາງດ້ານສີມືທີ່ຕ້ອງການຄວາມລະອຽດອ່ອນ, ແຕ່ພວກເຂົາເຫຼົ່ານີ້ພັດມີຄວາມຊຳນານ, ຊຶ່ງເຫັນໄດ້ຈາກຜົນງານທີ່ອອກມາແມ່ນດີເກີນຄາດ, ເພາະຈະໃຊ້ຄວາມປານີດ, ມີຄວາມຕັ້ງໃຈ, ສົນໃຈໃນວຽກ, ຫຼົງໄຫຼ ແລະ ຢາກສ້າງອາຊີບແທ້, ທີ່ສຳຄັນຖືກຕາມວິໄສທັດຂອງບໍລິສັດທີ່ຢາກຈະສົ່ງເສີມ ແລະຊ່ວຍເຫຼືອໃຫ້ເຂົາເຈົ້າມີວຽກເຮັດງານທຳ.

ສະໜັບສະໜູນໂດຍ: HONDA

  ສຳລັບໃນຕໍ່ໜ້າບໍລິສັດມີແຜນຈະຂະຫຍາຍຖານການຜະລິດເພີ່ມ, ແຕ່ທັງນີ້ທັງນັ້ນກໍຕ້ອງມີການສົ່ງເສີມການສ້າງວຽກເຮັດງານທຳຕື່ມ, ຊຶ່ງໃນນັ້ນເຊື່ອວ່າແມ່ຍິງຈະເປັນຫົວໃຈສຳຄັນໃນການສົ່ງເສີມຂອງບໍລິສັດເພື່ອເຮັດແນວໃດໃຫ້ພວກເຂົາເຫຼົ່ານັ້ນໄດ້ມີອາຊີບທີ່ໝັ້ນຄົງ ແລະມີລາຍໄດ້ທີ່ຄົງທີ່ຈາກການເຮັດວຽກນຳພວກເຮົາ.

  ການສຶກສາເປັນພື້ນຖານສຳຄັນທີ່ແມ່ຍິງຍຸກປະຈຸບັນຕ້ອງມີການສຶກສາເປັນປັດໄຈສຳຄັນຂອງທຸກໆດ້ານ ແລະທຸກຍຸກສະໄໝທີ່ແມ່ຍິງບໍ່ຄວນຖືເບົາເພາະວ່າການສຶກສາທັງໃນໂຮງຮຽນ ແລະນອກໂຮງຮຽນ, ຮຽນຮູ້ຈາກປະສົບການ, ຫາຄວາມຮູ້ເພີ່ມເພື່ອສ້າງໂອກາດໃຫ້ກັບຕົວເອງ.

  ທ່ານ ນາງ ດາຣາພົງ ຍຸຕິທຳ ອຳນວຍການບໍລິສັດລາວ ພຣາຍ ອີງໃຫ້ສຳ ພາດເນື່ອງໃນໂອກາດວັນແມ່ຍິງສາກົນວ່າ: ຜ່ານມາ ຫຼືຫຼາຍຍຸກຫຼາຍສະໄໝແມ່ຍິງຈະຖືກປູກຝັງແນວຄວາມຄິດທີ່ວ່າຈະຕ້ອງມີບົດບາດທາງສັງຄົມໜ້ອຍກວ່າເພດຊາຍ, ຊຶ່ງຂ້າພະເຈົ້າຄິດວ່າເປັນພຽງຄວາມເຊື່ອເທົ່ານັ້ນເພາະແມ່ຍິງບໍ່ມີຫຍັງດ້ອຍໄປກວ່າເພດຊາຍ, ຂຶ້ນກັບຕົວເຮົາເອງວ່າຈະສ້າງຊີວິດຂອງຕົວເອງແນວໃດ, ວາງຮາກຖານຊີວິດແນວໃດ, ຈະເຮັດໃຫ້ຕົວເອງມີຄວາມຮູ້, ສ້າງສັກກະຍະພາບແນວໃດເພື່ອຮັບໂອກາດ ຫຼືເປີດໂອກາດໃຫ້ກັບຕົວເອງປະສົບຜົນສຳເລັດ,ດັ່ງນັ້ນຈຶ່ງຢາກໃຫ້ແມ່ຍິງສຸມໃສ່ການສຶກສາເພາະຈະເປັນພື້ນຖານຂອງຊີວິດ ແລະການສຶກສາກໍບໍ່ໄດ້ມີຂີດຈຳກັດວ່າຕ້ອງຮຽນຢູ່ໃນໂຮງຮຽນເທົ່ານັ້ນຍັງສາມາດຮຽນໄດ້ຢູ່ນອກໂຮງຮຽນ, ຮຽນນຳສັງຄົມ, ຮຽນຮູ້ຈາກປະສົບການ, ຫາຄວາມຮູ້ເພີ່ມເພື່ອສ້າງໂອກາດບໍ່ແມ່ລໍຖ້າໂອກາດເພື່ອໃຫ້ຕົວເຮົາໄດ້ ລອງເຮັດໃນສີ່ງໃໝ່ໆ, ອອກມາຈາກກອບ, ຈາກແນວຄວາມຄິດທີ່ປິດກັ້ນແລ້ວວາງຂອບເຂດໄວ້ ແລະ ລົງມືເຮັດໃນສິ່ງໃໝ່, ຊຶ່ງເຊື່ອແນ່ວ່າອາດບໍ່ສຳເລັດ ພາຍໃນຄັ້ງດຽວແຕ່ໃນຄັ້ງຕໍ່ໆໄປກໍຈະເຮັດໃຫ້ສຳເລັດໄດ້.

 ທ່ານ ນາງ ດາຣາພົງ ຍຸຕິທຳ ຍັງກ່າວຕື່ມວ່າ: ການລົງທຶນໃຫ້ການສຶກສາແກ່ແມ່ຍິງມີດີຫຼາຍດ້ານຖ້າແມ່ຍິງມີພື້ນຖານການສຶກສາທີ່ດີເພາະແມ່ຍິງເປັນເພດແມ່ເວລາມີລູກເຂົາເຈົ້າຈະສາມາດລ້ຽງດູລູກໄດ້ດີ, ທັງນີ້ກໍເພື່ອສ້າງບຸກຄະລາກອນທີ່ມີຄຸນນະພາບໃຫ້ກັບສັງຄົມ ແລະ ເນື່ອງໃນໂອກາດວັນແມ່ຍິງນີ້ໃນຖານະຜູ້ປະກອບການຂໍອວຍພອນໄຊໃຫ້ການນຳພັດລັດໂດຍສະພາະການນຳທີ່ເປັນແມ່ຍິງຂໍໃຫ້ມີສຸຂະພາບແຂງແຮງ, ເປັນຕົ້ນແບບ, ເປັນຕົວແບບຂອງແມ່ຍິງໃຫ້ຮຸ່ນລູກຮຸ່ນຫຼານ.

______________

ຂຽນໂດຍ: ບຸນນິກ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

ສົນໃຈລົງໂຄສະນາໄດ້ທີ່:  021 313645, 316511

แชร์