ບ້ານດອນຂຽວນຳໃຊ້ແຫຼ່ງທຶນ ທນບ ເຂົ້າໃນກະສິກຳຮັບຜົນດີ

  ປະຈຸບັນ, ການຜະລິດກະສິກໍາພວມເປັນບັນຫາສໍາຄັນລະດັບຊາດໂດຍສະເພາະແມ່ນແຜນງານຄໍ້າປະກັນສະບຽງອາຫານເພື່ອຮັບໃຊ້ພາຍໃນປະເທດແນໃສ່ຫຼຸດຜ່ອນການນໍາເຂົ້າຈາກຕ່າງປະເທດ; ຕໍ່ບັນຫາດັ່ງກ່າວ, ປະຊາຊົນ ບ້ານດອນຂຽວ ເມືອງໜອງບົກ ແຂວງຄໍາມ່ວນ ກໍ່ເປັນເຂດໜຶ່ງທີ່ມີມູນເຊື້ອໃນການຜະລິດກະສິກໍາ ແລະຖືເປັນອາຊີບຫຼັກຊຶ່ງໄດ້ນໍາຜົນຜະລິດໄປຈຳໜ່າຍຢູ່ຕະຫຼາດພາຍໃນ, ຕ່າງແຂວງ ແລະຕ່າງປະເທດຈໍານວນໜຶ່ງ.

  ໃນຫວ່າງບໍ່ດົນມານີ້; ທ່ານ ປີດາ ອຸບພະໄຊ ເລຂາໜ່ວຍພັກ-ນາຍບ້ານ ບ້ານດອນຂຽວໃຕ້ ໄດ້ແຈ້ງໃຫ້ຮູ້ວ່າ: ບ້ານຂອງພວກເຮົາເປັນບ້ານ 3 ສ້າງ ຊຶ່ງຕັ້ງຢູ່ລຽບແຄມແມ່ນໍ້າຂອງທາງທິດໃຕ້ ແລະຫ່າງຈາກເທສະບານເມືອງໜອງບົກ 12 ກິໂລແມັດ,ທົ່ວບ້ານປະກອບມີ 213 ຄອບຄົວ, ມີ 241 ຫຼັງຄາເຮືອນ, ມີພົນລະເມືອງທັງໝົດ 1.052 ຄົນ, ຍິງ 537 ຄົນ ແລະມີອາຊີບຕົ້ນຕໍປູກຝັງ ແລະລ້ຽງສັດ;ພວກເຮົາໄດ້ມີການສ້າງຕັ້ງກຸ່ມປູກຝັງ-ລ້ຽງສັດຈໍານວນ 7 ກຸ່ມ,ມີຈໍານວນ 45 ຄອບຄົວ ແລະຍ້ອນເປັນບ້ານ 3 ສ້າງຈຶ່ງໄດ້ຮັບແຫຼ່ງທຶນດອກເບ້ຍຕໍ່າຂອງລັດຖະບານຜ່ານທະນາຄານນະໂຍບາຍສາຂາສະຫວັນນະເຂດ ຈໍານວນ 1,05 ຕື້ກວ່າກີບ ເພື່ອນໍາໃຊ້ເຂົ້າໃນການຜະລິດກະສິກໍາໃນນີ້ກໍ່ມີປະຊາຊົນຈໍານວນໜຶ່ງໄດ້ໄປປູກພືດພັນທັນຍາຫານ ແລະ ລ້ຽງສັດຢູ່ດອນປາແດກ (ກາງແມ່ນໍ້າຂອງ) ໃນຕໍ່ໜ້າມີແຜນຂະຫຍາຍກຸ້ມປູກພືດ-ລ້ຽງສັດ ແລະກູ້ຢືມເງິນຕື່ມອີກ.

  ທ່ານນາຍບ້ານບ້ານດອນຂຽວໃຕ້ໄດ້ໃຫ້ຮູ້ວ່າ: ພາຍຫຼັງທີ່ຮັບແຫຼ່ງທຶນຈາກທະນາຄານນະໂຍບາຍບວກກັບທຶນຮອນສ່ວນຕົວເຮັດໃຫ້ມີການຜະລິດເພີ່ມຂຶ້ນ ແລະມີລາຍໄດ້-ກໍາໄລຫຼາຍຂຶ້ນກວ່າເກົ່າ. ສໍາລັບ ທ່ານ ສຸລິເຍດ ໂຄດສຸວັນ ກໍ່ໄດ້ກ່າວເຖິງການນໍາໃຊ້ແຫຼ່ງທຶນຂອງທະນາຄານດັ່ງກ່າວ ຊຶ່ງໄດ້ກູ້ຢືມ 30 ລ້ານກີບ ຊື້ງົວ 15 ໂຕມາລ້ຽງໄດ້ເກືອບ 2 ປີ ແລ້ວ ແລະມີກໍານົດກູ້ຢືມ 5 ປີ ແລະເຫັນວ່າດຽວນີ້ຖ້າຂາຍງົວກໍ່ມີລາຄາຕໍ່າສຸດ 2,9 ລ້ານກີບ ແລະສູງສຸດເກືອບ 20 ລ້ານກີບຕໍ່ 1 ໂຕ.

ສະໜັບສະໜູນໂດຍ: HONDA

ທ່ານ ພອນປະເສີດ ພິລາວັນດີ ຫົວໜ້າຂະແໜງສິນເຊື່ອທະນາຄານນະໂຍບາຍສາຂາສະຫວັນນະເຂດໄດ້ຢືນຢັນວ່າ: ໃນຜ່ານມາແມ່ນມີຄວາມຫຍຸ້ງຍາກໃນການເຂົ້າແຫຼ່ງທຶນ ແລະ ຫຼັງຈາກຂັ້ນເທິງໄດ້ປະກາດເປັນບ້ານ 3 ສ້າງ ເຮັດໃຫ້ປະຊາຊົນໄດ້ມີໂອກາດເຂົ້າເຖິງແຫຼ່ງທຶນດອກເບ້ຍຕໍ່າຢ່າງງ່າຍດາຍ ແລະ ສາມາດນໍາໃຊ້ເງິນດັ່ງກ່າວເຂົ້າໃນການຜະລິດຕົວຈິງ ແລະ ປະຊາຊົນມີຄວາມເພິ່ງພໍໃຈເຮັດໃຫ້ຊີວິດການເປັນຢູ່ຂອງປະຊາຊົນດີຂຶ້ນລື່ນເກົ່າ ແລະ ການຊໍາລະແຫຼ່ງທຶນແມ່ນຖືກຕ້ອງ, ປັນປົກກະຕິ; ມາຮອດປະຈຸບັນນີ້, ທະນາຄານນະໂຍບາຍໄດ້ສະໜອງສິນເຊື່ອໃຫ້ແກ່ບ້ານ 3 ສ້າງ ຈໍານວນ 2 ບ້ານ ມີບ້ານດອນຂຽວເໜືອ ແລະບ້ານດອນຂຽວໃຕ້ໃນວົງເງິນລວມທັງໝົດ 4,16 ຕື້ກີບ ໃນນີ້ໄດ້ສະໜອງສິນເຊື່ອເຂົ້າໃນເປົ້າໝາຍລ້ຽງງົວ 13 ກຸ່ມ, 93 ຄອບຄົວ ໃນວົງເງິນສິນເຊື່ອ 2,65 ຕື້ກີບ;ເປົ້າໝາຍປູກຢາສູບ 14 ກຸ່ມ, 58 ຄອບຄົວ ໃນວົງເງິນສິນເຊື່ອ 1,36 ຕື້ກີບ, ເປົ້າໝາຍລ້ຽງແບ້ 1 ກຸ່ມ, 1 ຄອບຄົວ ໃນວົງເງິນສິນເຊື່ອ 120 ລ້ານກີບ ແລະ ເປົ້າໝາຍລ້ຽງປາ 1 ກຸ່ມ, 1 ຄອບຄົວໃນວົງເງິນສິນເຊື່ອ 30 ລ້ານກີບ.

_____________

ຂຽນໂດຍ: ຣັດສະໝີ ດວງສັດຈະ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

ສົນໃຈລົງໂຄສະນາໄດ້ທີ່:  021 313645, 316511

แชร์