ຮອງເຈົ້າແຂວງຜົ້ງສາລີເຄື່ອນໄຫວວຽກງານຢູ່ກຸ່ມຫົວເມີກເມືອງໃໝ່

 ເພື່ອເປັນການຜັນຂະຫຍາຍເນື້ອໃນມະຕິກອງປະຊຸມໃຫຍ່ຄັ້ງທີ XIV ຂອງອົງຄະນະພັກເມືອງໃໝ່ໃນວັນທີ 3 ມີນາ 2020 ນີ້, ທ່ານ ທອງສີ ເສົາສຸລິພົມ ຮອງເຈົ້າ ແຂວງໆຜົ້ງສາລີ, ຜູ້ຊີ້ນຳຂົງເຂດວັດທະນະທຳ-ສັງຄົມຂັ້ນແຂວງ, ທັງເປັນຜູ້ຊີ້ນຳວຽກງານຮອບດ້ານຂອງເມືອງໃໝ່ ແລະ ທ່ານ ສົມຈີດ ສິດທິວົງ ເຈົ້າເມືອງໆໃໝ່ ພ້ອມຄະນະຈາກຂັ້ນແຂວງ, ຂັ້ນເມືອງໄດ້ລົງຕິດຕາມ ແລະຊຸກຍູ້ວຽກງານການສ້າງບ້ານນ້ອຍໃຫ້ກາຍເປັນບ້ານໃຫຍ່ ແລະສ້າງບ້ານໃຫຍ່ໃຫ້ກາຍເປັນຕົວເມືອງນ້ອຍ ໃນຊົນນະບົດຢູ່ບ້ານສະຫຼວງທີ່ຂຶ້ນກັບກຸ່ມຫົວເມີກຂອງເມືອງໃໝ່.

ສະໜັບສະໜູນໂດຍ: HONDA

    ການພັດທະນາເສດຖະກິດ-ສັງຄົມຂອງທົ່ວກຸ່ມເຊີ່ງກຸ່ມຫົວເມີກແມ່ນຫ່າງຈາກເທດສະບານເມືອງໃໝ່ 102 ກິໂລ, ມີ 8 ບ້ານ ແລະ 1 ບ້ານທີ່ຂຶ້ນກັບ, ມີພົນລະ ເມືອງທັງໝົດ 2.143 ຄົນ, ຍິງ 1.054 ຄົນ, 331 ຫຼັງຄາ ແລະ 456 ຄອບຄົວ, ອາຊີບຕົ້ນຕໍຂອງປະຊາຊົນ ໃນທົ່ວກຸ່ມແມ່ນເຮັດໄຮ່-ເຮັດນາ, ລ້ຽງສັດ, ເຮັດສວນ ແລະຫາເຄື່ອງປ່າຂອງດົງເປັນອາຊີບເສີມເຊິ່ງສາມາດສ້າງລາຍຮັບທົ່ວກຸ່ມໃນປີ 2019 ໄດ້ 5 ຕື້ 514 ລ້ານກີບ, ສະເລ່ຍໃສ່ຫົວຄົນໝຶ່ງໄດ້ 2.573.028 ກີບຕໍ່ຄົນຕໍ່ປີພ້ອມທັງຮັບຟັງຂໍ້ສະເໜີຈຳນວນໝຶ່ງຂອງກຸ່ມບ້ານເປັນຕົ້ນແມ່ນການຍົກຍ້າຍຫ້ອງການກຸ່ມ, ການຈັດສັນທ່ີດິນຢູ່ຈຸດສະຫຼວງ, ຊ້ອມແປງຄືນນໍ້າລິນຂອງບາງບ້ານທີ່ມີຢູ່ແລ້ວ, ຕິດຕັ້ງລະບົບສັນຍານໂທລະສັບ ແລະອື່ນໆ ທ່ານ ບຸນແພງ ລາວລີ ຮອງຫົວໜ້າຫ້ອງວ່າການ ແຂວງກໍ່ໄດ້ຜ່ານເອກະສານກ່ຽວກັບມາດຖານເງື່ອນໄຂໃນການສ້າງບ້ານ, ການໂຮມບ້ານເຂົ້າກັນເພື່ອສ້າງເປັນບ້ານພັດທະນາ ແລະ ການສ້າງບ້ານໃຫຍ່ກາຍເປັນຕົວເມືອງນ້ອຍໃນຊົນນະບົດ.

  ໃນໂອກາດນີ້ທ່ານ ທອງສີ ເສົາສຸລິພົມ ຮອງເຈົ້າແຂວງໆຜົ້ງສາລີ ກໍ່ໄດ້ມີຄຳເຫັນໂອ້ລົມຕໍ່ເລຂາກຸ່ມບ້ານ, ເລຂາພັກນາຍບ້ານ ແລະປະຊາຊົນພາຍໃນກຸ່ມຮຽກຮ້ອງໃຫ້ສືບຕໍ່ເຕົ້າໂຮມຄວາມສາມັກຄີບ້ານຕໍ່ບ້ານໃຫ້ເປັນປຶກແຜນ, ເອົາໃຈໃສ່ວຽກງານປ້ອງກັນຊາດໃຫ້ມີຄວາມສະຫງົບ, ຕ້ານ ແລະສະກັດກັ້ນບັນດາບັນຫາປາກົດການຫຍໍ້ທໍ້ ພາຍໃນບ້ານໂດຍສະເພາະຂີ້ລັກງັດແງະ, ບັນຫາຢາເສບຕິດ, ການເຊື້ອຖືສາສະໝາທີ່ບໍ່ສອດຄ່ອງກັບຮີດຄອງປະເພນີ, ສືບຕໍ່ສ້າງອາຊີບຖາວອນໃຫ້ຫຼາຍຂຶ້ນ, ພ້ອມກັນສ້າງສາເສດຖະກິດຂອງແຕ່ລະບ້ານກໍ່ຄືຂອງຄອບຄົວໃຫ້ເຂັ້ມແຂງກ່ວາເກົ່າເພື່ອເຮັດໃຫ້ຫຼຸດຜ່ອນອອກຈາກຄວາມທຸກຢາກເທື່ອລະກ້າວ, ໃຫ້ທຸກພາກສ່ວນຊຸກຍູ້ສົ່ງເສີມໃນການສ້າງບ້ານສະຫຼວງໃຫ້ເປັນບ້ານໃຫຍ່ກາຍເປັນຕົວເມືອງນ້ອຍໃນຊົນນະບົດໃຫ້ບັນລຸຕາມຄາດໝາຍທີ່ວາງໄວ້.

  ໃນໂອກາດທີ່ທ່ານຮອງເຈົ້າແຂວງລົງເຄື່ອນໄຫວວຽກງານໃນຄັ້ງນີ້ຍັງໄດ້ນຳເອົາຖົງ ແລະອຸປະກອນການຮຽນ ແລະອຸປະກອນການກີລາຈຳນວນໜຶ່ງໄປມອບໃຫ້ກັບອົງ ການປົກຄອງບ້ານ ແລະຄູອາຈານ-ນ້ອງໆນັກຮຽນທີ່ຂາດເຂີນຕື່ມອີກ.

---------------

ຂຽນໂດຍ: ແສງຄຳ ສາລີວັນ  

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์