ເມືອງໄຊບູລີສາມາດຈັດຕັ້ງປະຕິບັດວຽກງານການບໍລິການຜ່ານປະຕູດຽວໄດ້ 3,024 ລ້ານກີບ

 ຕອນເຊົ້າວັນທີ 11 ມີນາ 2020 ນີ້ເມືອງໄຊຍະບູລີໄດ້ຈັດກອງປະຊຸມຕິດຕາມຊຸກຍູ້ການຈັດຕັ້ງປະຕິບັດວຽກງານການບໍລິການຜ່ານປະຕູດຽວຂຶ້ນທ່ີຫ້ອງປະຊຸມຫ້ອງວ່າການເມືອງໄຊຍະບູລີ ໂດຍການເປັນປະທານຂອງທ່ານ ບຸນແທນ ທີແກ້ວ ກຳມະການພັກ ແຂວງ ເລຂາຄະນະບໍລິຫານງານ ພັກເມືອງ ເຈົ້າເມືອງໄຊຍະບູລີ, ທ່ານ ລາຕິ ພີມມະຈັກ ຮອງຫົວໜ້າກົມປົກຄອງທ້ອງຖີ່ນກະຊວງພາຍໃນ, ມີຄະນະປະຈຳພັກເມືອງ,ກຳມະການພັກເມືອງ,ຫົວໜ້າ, ຮອງຫົວໜ້າຫ້ອງການ, ຕາງໜ້າ ພະແນກພາຍໃນແຂວງ ແລະພະນັກ ງານວິຊາການທີ່ກ່ຽວຂ້ອງພາຍໃນເມືອງເຂົ້າຮ່ວມ.

  ໃນກອງປະຊຸມທ່ານ ນາງ ສຸກສະຫວັນ ປີ່ນຄຳ ກຳມະການ ພັກເມືອງ ຫົວໜ້າຫ້ອງການພາຍ ໃນເມືອງໄດ້ຂຶ້ນຜ່ານບົດລາຍງານ ກ່ຽວກັບການຈັດຕັ້ງປະຕິບັດວຽກ ງານກົນໄກການບໍລິການຜ່ານປະຕູດຽວຂອງເມືອງໄຊຍະບູລີ ວ່າ: ເມືອງໄຊຍະບູລີໄດ້ສ້າງຕັ້ງໜ່ວຍ ງານບໍລິການຜ່ານປະຕູດຽວຂຶ້ນໃນຕົ້ນປີ 2016 ຕາມການຕົກລົງຂອງ ທ່ານເຈົ້າເມືອງໄຊຍະບູລີ ຊຶ່ງຜ່ານ ການເຮັດທົດລອງການບໍລິການຜ່ານປະຕູດຽວຢູ່ເມືອງໄຊຍະບູລີ ໃນຕະຫຼອດໄລຍະ 4 ປີຜ່ານມາ ສາມາດແກ້ໄຂຂອດຂັ້ນການຈໍລະຈອນເອກະສານທີ່ຊັກຊ້າແກ່ຍາວ, ສາມາດເອື້ອອໍານວຍຄວາມສະດວກໃຫ້ແກ່ນັກທຸລະກິດ, ຜູ້ປະກອບການ, ພໍ່ຄ້າຊາວຂາຍ ແລະ ປະຊາຊົນບັນດາເຜົ່າທີ່ມາໃຊ້ບໍລິການຜ່ານປະຕູດຽວມີທ່ວງທ່າ ເພີ່ມຂຶ້ນຄື: ປີ2016 ມີ 6 ຂະແໜງການມີແຜນຈັດເກັບທັງໝົດ 295 ລ້ານກີບ ປະຕິບັດໄດ້ 406 ລ້ານກີບ, ເທົ່າກັບ 137% ຂອງແຜນການປີ; ປີ 2017 ມີແຜນຈັດເກັບທັງໝົດ 248 ລ້ານກີບ ປະຕິບັດໄດ້ 338 ລ້ານກີບ, ເທົ່າກັບ 136,51% ຂອງແຜນການປີ; ປີ 2018 ໄດ້ເພີ່ມຂຶ້ນ 2 ຂະແໜງການລວມເປັນ 8 ຂະແໜງການມີແຜນຈັດເກັບທັງໝົດ 524 ລ້ານກີບ ປະຕິບັດໄດ້ 1.303 ລ້ານກີບ, ເທົ່າກັບ 248,80% ຂອງແຜນການປີ ແລະໃນປີ 2019 ມີແຜນຈັດເກັບທັງໝົດ 291 ລ້ານກີບ ປະຕິບັດ ໄດ້ 975 ລ້ານກີບ, ເທົ່າກັບ 334,53% ຂອງແຜນການປີ, ຕະຫຼອດໄລຍະ 4 ປີ ໜ່ວຍງານບໍລິ ການຜ່ານປະຕູດຽວສາມາດບັນລຸການຈັດຕັ້ງປະຕິບັດຄື: ແຜນທັງໝົດ 1.358 ລ້ານກີບ ປະຕິບັດ 3.024 ລ້ານກີບ ເທົ່າກັບ 222,59% ເພີ່ມຂຶ້ນ 2 ເທົ່າຕົວ.

ສະໜັບສະໜູນໂດຍ: HONDA

  ໃນກອງປະຊຸມດັ່ງກ່າວກໍ່ໄດ້ແລກປ່ຽນບົດຮຽນເຊິ່ງກັນ ແລະກັນເປັນຕົ້ນແມ່ນຂໍ້ສະດວກຂໍ້ຫຍຸ້ງຍາກໃນການຈັດຕັ້ງປະຕິບັດວຽກງານທີ່ຜ່ານ ແລະພ້ອມກັນແກ້ໄຂຈຸດອ່ອນຂໍ້ຄົງຄ້າງດັ່ງກ່າວທັງນີ້ກໍ່ເພື່ອເຮັດໃຫ້ການຈັດຕັ້ງປະຕິບັດວຽກງານການບໍລິການຜ່ານປະຕູດຽວຢູ່ພາຍໃນເມືອງໄຊຍະບູລີບັນລຸຕາມແຜນການທີ່ວາງໄວ້.

____________

ຂຽນໂດຍ: ສົມພົງ ສີສະຫວັດ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

ສົນໃຈລົງໂຄສະນາໄດ້ທີ່:  021 313645, 316511

 

แชร์