ລ້ຽງໄກ່ຂາຍສ້າງລາຍໄດ້ປີໜຶ່ງ 900 ລ້ານກວ່າກີບ

 ທ່ານ ອ່ອນ ອາຍຸ 33 ປີ ໄດ້ໃຫ້ສໍາພາດຕໍ່ທິມຂ່າວພວກເຮົາບໍ່ດົນນີ້ວ່າ: ເມື່ອອາໄສອາຊີບຄ້າຂາຍບໍ່ໄດ້ຕ້ອງໄດ້ຖອຍຕັ້ງຫຼັກເຮັດອາຊີບລ້ຽງໄກ່ຂາຍເພື່ອສ້າງລາຍຮັບໃຫ້ກັບຄອບຄົວຜົນຕອບຮັບໃນການລ້ຽງໄກ່ພັນໄຂ່ປີທໍາອິດມີລາຍຮັບດີເກີນຄາດໝາຍເລີຍໄດ້ຂະຫຍາຍຟາມໄກ່ອອກ ແລະລ້ຽງປາດຸກໄປພ້ອມສາມາດສ້າງລາຍຮັບປີໜຶ່ງໄດ້ 900 ລ້ານກວ່າກີບ.

  ທ່ານກ່າວຕື່ມວ່າ: ປະຈຸບັນຢູ່ ບ້ານຫ້ວຍແປນ ກຸ່ມພັດທະນາທີ 6 ບ້ານຫາດປາງ ເມືອງປາກອູ ພາຍໃນຄອບຄົວມີທັງໝົດ 4 ຄົນ, ມີແຮງງານຕົ້ນຕໍ 2 ຄົນ, ຍິງ 1 ຄົນ, ໃນເມື່ອກ່ອນເຄີຍມີອາຊີບເຮັດໄຮ່, ເຮັດນານັບແຕ່ປີ 2004-2005 ເຫັນວ່າຄອບຄົວມີຄວາມຫຍຸ້ງຍາກຫຼາຍພໍແຕ່ກຸ້ມຢູ່ກຸ້ມກິນເທົ່ານັ້ນ ແລະໄດ້ໃຊ້ເວລາໃນການຜະລິດຫຼາຍໂດຍສະເພາະແມ່ນການເຮັດໄຮ່, ພໍມາເຖີງໄລຍະໜຶ່ງພັກ ແລະລັດຖະບານໄດ້ມີນະໂຍບາຍໃນການຊຸກຍູ້ສົ່ງເສີມທາງດ້ານການປູກ-ການລ້ຽງໃຫ້ເປັນສິນຄ້າ ໂດຍສະເພາະການລ້ຽງສັດເພື່ອສ້າງລາຍຮັບເພີ່ມໃຫ້ແກ່ຄອບຄົວເພື່ອລືບລ້າງຄວາມທຸກຍາກຕາມແນວທາງການປ່ຽນແປງໃໝ່, ມາຮອດ ປີ 2010 - 2016 ຄອບ

ຄົວໄດ້ຊື້ລົດ 12 ລໍ້ມາແລ່ນສາມາດສ້າງລາຍຮັບສະເລ່ຍປີໜຶ່ງປະມານ 50 ລ້ານກີບ, ແຕ່ອີງໃສ່ສະພາບການຂະຫຍາຍຕົວຂອງເສດຖະກິດ-ສັງຄົມເຫັນວ່າຈຳນວນລົດ ແມ່ນເພີ່ມຂຶ້ນນັບມື້ນັບຫຼາຍ ເຮັດ ໃຫ້ລາຍຮັບນັບມື້ນັບໜ້ອຍລົງ (ລົດ ຫຼາຍບໍ່ມີເຄື່ອງຕ່າງ) ແລະບໍ່ມີເວ ລາຢູ່ນຳຄອບຄົວ ບວກກັບຄ່ານ້ຳ ມັນກໍ່ແພງ ແຕ່ກົງກັນຂ້າມຄ່າຈ້າງ ຕ່າງພັດຖືກລົງເມື່ອເປັນສະພາບການຄືແນວນັ້ນ ທາງຄອບຄົວຈຶ່ງໄດ້ປຶກສາຫາລືກັນຕັດສິນໃຈຂາຍລົດ ແລະຫັນມາລ້ຽງໄກ່ພັນໄຂ່ທົດລອງເບິ່ງໃນປີ 2017 ໃນເບື້ອງຕົ້ນແມ່ນເຮັດຟາມໄກ່ຈຳນວນໜຶ່ງຫຼັງ ແລະ ຊື້ໄກ່ມາລ້ຽງຈຳນວນ 1.500 ໂຕ, ຜ່ານການລ້ຽງໄລຍະ 1 ປີ ກໍ່ເຫັນວ່າມີລາຍຮັບດີພໍສົມຄວນຈຶ່ງໄດ້ຂະຫຍາຍອອກຕື່ມໜຶ່ງຟາມພ້ອມຊື້ໄກ່ມາລ້ຽງເພີ່ມເປັນຈຳນວນ 4 ພັນໂຕ, ສາມາດຜະລິດໄຂ່ໄດ້ມື້ລະ 120 ແຕະໄຂ່ຈຳນວນດັ່ງກ່າວແມ່ນໄດ້ຈຳໜ່າຍຢູ່ພາຍໃນເມືອງ, ພາຍໃນແຂວງຫຼວງພະບາງ ແລະບາງຄັ້ງກໍ່ມີພໍ່ຄ້າ-ແມ້ຄ້າຢູ່ ຕ່າງແຂວງມາຊື້ນຳເຖິງທີ່.

ສະໜັບສະໜູນໂດຍ: HONDA

  ມາຮອດປະຈຸບັນເຫັນວ່າຊີວິດການເປັນຢູ່ຂອງຄອບຄົວດີຂຶ້ນຫາກທຽບໃສ່ເມື່ອກ່ອນ, ສາມາດສ້າງລາຍຮັບເຂົ້າຄອບຄົວຈາກການຂາຍໄຂ່ສະເລ່ຍປະມານ 876 ລ້ານກີບຕໍ່ປີ, ລາຍໄດ້ຈາກການຂາຍໄກ່ (ໄກ່ທີ່ເຊົາໄຂ່) ປະມານ 52 ລ້ານກີບຕໍ່ປີ, ລາຍໄດ້ຈາກການຂາຍປາດຸກປະມານ 10 ລ້ານ ກີບຕໍ່ປີ, ລວມລາຍຮັບທັງໝົດປີໜຶ່ງໄດ້ 938 ລ້ານກວ່າກີບຕໍ່ປີ, ເມື່ອລົບລາຍຈ່າຍອອກຈະເຫຼືອກໍາໄລຢູ່ເກືອບ 200 ລ້ານກີບ, ສະເລ່ຍໃສ່ຫົວຄົນໜຶ່ງໄດ້ 49 ລ້ານກວ່າກີບຕໍ່ຄົນຕໍ່ປີ.

  ມາຮອດປະຈຸບັນນີ້ໄດ້ເຮັດໃຫ້ຄອບຄົວມີເສດຖະກິດດີພໍສົມຄວນ ແລະມີເຮືອນຢູ່ຖາວອນ 1 ຫຼັງ, ມີລົດໃຫຍ່ 1 ຄັນ, ລົດຈັກ 1 ຄັນ ແລະມີເງິນຝາກທະນາຄານຈຳ ນວນໜຶ່ງ, ທ່ານກ່າວຖິ້ມທ້າຍຕື່ມວ່າໃນຕໍ່ໜ້າຈະຊອກຮູ້ວິທີ ແລະເຕັກນິກໃໝ່ເຂົ້າມານຳໃຊ້ ແລະເອົາໃຈໃສ່ບົວລະບັດສັດລ້ຽງຂອງຕົນໃຫ້ດີກວ່າເກົ່າ ແລະຈະຂະຫຍາຍ ຟາມໄກ່ອີກ 1 ຫຼັງ, ໄກ່ພັນໄຂ່ອີກ 2 ພັນໂຕ, ຈະຊອກແຫຼ່ງທຶນເຂົ້າມາພັດທະນາການລ້ຽງສັດຕື່ມພ້ອມຈະສູ້ຊົນສ້າງກໍາໄລລາຍຮັບໃຫ້ໄດ້ 300 ລ້ານກີບຕໍ່ປີ.

-------------

ຂຽນໂດຍ: ສີສຸວັນ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

ສົນໃຈລົງໂຄສະນາໄດ້ທີ່:  021 313645, 316511

แชร์