ພະແນກ ປທສ ແຂວງສະຫວັນນະເຂດ ສະຫຼຸບວຽກງານ ປະຈໍາປີ 2019

 ວັນທີ 5 ມີນາ 2020 ນີ້, ພະແນກໄປສະນີ, ໂທລະຄົມມະນາຄົມ ແລະການສື່ສານແຂວງສະຫວັນນະເຂດ(ປທສ) ໄດ້ຈັດກອງປະຊຸມສະຫຼຸບການຈັດຕັ້ງປະຕິບັດ ແຜນພັດທະນາວຽກງານໄປສະນີ, ໂທລະຄົມມະນາຄົມ ແລະການສື່ສານປະຈໍາປີ 2019 ທີ່ຫ້ອງປະຊຸມຂອງຫ້ອງວ່າການປົກຄອງແຂວງສະຫວັນນະເຂດ.ໃຫ້ກຽດເປັນປະທານຂອງ ທ່ານ ບຸນສະເຫຼີມໄຊ ເຄນນາວົງ ຮອງລັດຖະມົນຕີກະຊວງ ປທສ, ທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງ ສະຫວັນນະເຂດ, ທ່ານ ບຸນດາໄລ ເຄນນາວົງ ຫົວໜ້າພະແນກ ປທສ ແຂວງສະຫວັນນະເຂດ, ມີບັນດາ ພະນັກງານຫຼັກແຫຼ່ງຈາກ 14 ເມືອງ, 1 ນະຄອນເຂົ້າຮ່ວມ.

 ທ່ານ ດາວເຮືອງ ໂພທິລາດ ຮອງຫົວໜ້າພະແນກ ປທສ ແຂວງ ໄດ້ຂຶ້ນຜ່ານບົດສະຫຼຸບວຽກງານ ໄປສະນີ, ໂທລະຄົມມະນາຄົມ ແລະ ການສື່ສານປະຈໍາປີ 2019 ໃຫ້ຮູ້ ວ່າ:ວຽກງານໄປສະນີແມ່ນສາມາດຊຸກຍູ້ໃຫ້ຜູ້ປະກອບການນັບ ທັງພາກລັດ ແລະເອກະຊົນຂະຫຍາຍປ່ອງບໍລິການຂອງຕົນອອກສູ່ຊົນນະບົດກໍ່ຄືປ່ອງບໍລິການປະຈໍາເມືອງໃຫ້ກວ້າງຂວາງ ໂດຍ ພາຍໃຕ້ບໍລິສັດໄປສະນີລາວ ສາຂາ ແຂວງສະຫວັນນະເຂດ ມີທັງໝົດ 11 ແຫ່ງ ແລະບໍລິສັດເອກະຊົນ ມີທັງໝົດ 8 ແຫ່ງ. ສໍາລັບລາຍຮັບທັງໝົດຂອງພາກສ່ວນໄປສະນີ ແມ່ນ 6,31 ຕື້ກວ່າກີບ, ໂດຍໄດ້ ຈາກໄປສະນີພັນ, ຈົດໝາຍ, ສິ່ງຂອງຫໍ່ນ້ອຍ, ພັດສະດຸພັນ ແລະ ອື່ນໆ ທຽບໃສ່ປີຜ່ານມາເພີ່ມຂຶ້ນ 77%.ດ້ານວຽກງານໂທລະຄົມມະນາຄົມແມ່ນສາມາດຂະຫຍາຍສັນຍານໂທລະຄົມກວມ 92,4% ຂອງຈໍານວນ 1.024 ບ້ານ, ມີເສົາຮັບ ແລະສົ່ງສັນຍານ BTS (ບີທີເອສ)ທັງໝົດ 788 ແຫ່ງ,ທຽບໃສ່ປີຜ່ານມາເພີ່ມຂຶ້ນ0.76%, ເຄື່ອງຮັບສົ່ງສັນຍານ 2G, 3G ແລະ 4G ມີ 1.921 Base, ທຽບໃສ່ປີຜ່ານມາເພີ່ມຂຶ້ນ 10% ໃນປີ 2019 ນີ້ ບໍລິສັດໂທລະຄົມສາຂາແຂວງສະຫວັນນະເຂດລວມມີ 4 ບໍລິສັດຄື: ETL, LTC, Unitel ແລະ TPUS Digi tal ມີລາຍຮັບທັງໝົດ 347,93 ຕື້ກວ່າກີບ ທຽບໃສ່ປີ 2018 ເພີ່ມ ຂຶ້ນ 9%, ມອບພັນທະເຂົ້າງົບປະມານແຫ່ງລັດຈໍານວນ 44,8 ຕື້ ກວ່າກີບ.ດ້ານວຽກງານເຕັກໂນໂລຊີການສື່ສານຂໍ້ມູນຂ່າວສານ ແມ່ນອະນຸຍາດອອກທະບຽນໃຫ້ ບັນດາຫ້າງຮ້ານອິນເຕີເນັດ, ຮ້ານຈໍາໜ່າຍອຸປະກອນໂທລະຄົມ, ໄອທີ ແລະອື່ນໆໃນຂົງເຂດນະຄອນໄກ ສອນ ໄດ້ທັງໝົດ 64 ຮ້ານ, ໃນນີ້ ຮ້ານຂອງຄົນລາວມີ 54 ຮ້ານ ແລະຄົນຕ່າງປະເທດ10 ຮ້ານ ແລະສໍາລັບ 14 ເມືອງ ແມ່ນອະນຸຍາດອອກທະບຽນໃຫ້ບັນດາຫ້າງຮ້ານຕ່າງໆໄດ້ທັງໝົດ 117 ຮ້ານ, ໃນນີ້ມີຮ້ານຂອງຄົນລາວ 79 ຮ້ານ ແລະຄົນຕ່າງປະເທດ 38 ຮ້ານ. ສໍາລັບຄາດໝາຍສູ້ຊົນໃນ ປີ 2020 ນີ້, ແມ່ນຈະໄດ້ຊຸກຍູ້ໃຫ້ ບັນດາບໍລິສັດໂທລະຄົມສາຂາແຂວງສະຫວັນນະເຂດຂຶ້ນທະບຽນເບີໂທລະສັບມືຖືໃຫ້ສໍາເລັດ, ຂະຫຍາຍຕາໜ່າງສັນຍານມື ຖືໃຫ້ ກວມ 100% ຂອງພື້ນທີ່ທົ່ວແຂວງ, ສ້າງເງື່ອນໄຂໃຫ້ປະຊາຊົນເຂົ້າ ເຖິງອິນເຕີເນັດເພື່ອໃຊ້ບໍລິການໄອ ຊີທີຢູ່ບ້ານ 3 ສ້າງ.

 ທ່ານ ບຸນສະເຫຼີມໄຊ ເຄນນາວົງ ຮຽກຮ້ອງໃຫ້ພາກສ່ວນຕ່າງໆ ປະຕິບັດໜ້າທີ່ຂອງຕົນຢ່າງສຸດຄວາມສາມາດໂດຍສະເພາະແມ່ນ ວຽກງານວິຊາສະເພາະ, ປຸກລະດົມຂົນຂວາຍກໍາລັງແຮງພາຍໃນອົງກອນເຂົ້າໃນການພັດທະນາວຽກງານ ປທສ ໃຫ້ພັດທະນາຂຶ້ນໄປເລື້ອຍໆ ທັງນີ້ກໍ່ເພື່ອໃຫ້ການພົວພັນເຊິ່ງກັນ ແລະກັນ ຂອງຄົນໃນສັງຄົມ ກໍ່ຄືທັງພາຍໃນ ແລະຕ່າງປະເທດມີຄວາມສະດວກວ່ອງໄວກ້າວໃຫ້ທັນກັບລະດັບສາກົນ.

------

ໜັງສືພິມເສດຖະກິດ-ສັງຄົມ

แชร์