ຜະລິດຕະພັນຫັດຖະກຳຕໍ່າແຜ່ນເປັນທ່າແຮງໜຶ່ງສ້າງລາຍຮັບໃຫ້ແກ່ຄອບຄົວ

  ຫັດຖະກຳຕຳແຜ່ນແພ ຂອງເມືອງລະມາມແມ່ນກິດຈະກຳໜຶ່ງທີ່ສືບທອດສີໄມ້ລາຍມືຈາກ ພູມປັນຍາຂອງຊາວບ້ານເຜົ່າ ກຣຽງແຕ່ສະໄໝປູ່ຍ່າຕາຍາຍເປັນຜູ້ຜະລິດຄິດສ້າງຂຶ້ນມາແຕ່ດຶກດຳ ບັນເປັນເວລາຫຼາຍປີ, ກຸ່ມຫັດຖະກຳຕໍ່າແຜ່ນແພເມືອງລະມາມຕັ້ງ ຢູ່ບ້ານໃໝ່ຫົວເມືອງ ແລະບ້ານວັດຫຼວງ ເມືອງລະມາມ ແຂວງເຊກອງ ຊຶ່ງປະກອບມີ 1 ກຸ່ມ ມີສະມາຊິກທັງໝົດ 35 ຄົນ.

ທ່ານ ຄຳໄລ ນອງລາວ ພະນັກ ງານອາວຸໂສບຳນານ ບ້ານໃໝ່ຫົວເມືອງ ຕາງໜ້າໃຫ້ກຸ່ມຫັດຖະກຳ ຕໍ່າແຜ່ນແພ ເມືອງລະມາມໄດ້ຂຶ້ນປະກອບຄຳເຫັນກ່ຽວກັບການຜະລິດຕະພັນຫັດຖະກຳຕໍ່າແຜ່ນເປັນສິນຄ້າຕໍ່ກອງປະຊຸມໃຫຍ່ ຄັ້ງທີ IX ຂອງອົງຄະນະພັກເມືອງລະມາມເມື່ອບໍ່ດົນມານີ້ວ່າ: ຍ້ອນເຄີຍ ມີມູນເຊື້ອດຸໝັ່ນຂະຫຍັ່ນພຽນບວກກັບຄວາມມັກໃນອາຊີບນີ້ມາກ່ອນ, ພັກ-ລັດ ແລະຂະແໜງການກ່ຽວຂ້ອງຂັ້ນແຂວງ-ເມືອງໄດ້ອຳນວຍຄວາມສະດວກ ແລະກະຕຸກ ຊຸກຍູ້ໃຫ້ການສະໜັບສະໜູນທາງດ້ານທຶນຮອນ ແລະວິຊາການ ຈິ່ງ ເຮັດໃຫ້ຜົນຜະລິດຫັດຖະກຳດັ່ງກ່າວໄດ້ສືບທອດນຳມາຜະລິດເປັນສິນຄ້າ ໂດຍແມ່ນ ນາງ ເພັດ ນອງລາວ ໄດ້ຝຶກແອບຮ່ຳຮຽນສືບທອດຈາກແມ່ນັບແຕ່ອາຍຸ 15 ປີ ເລີ່ມຮຽນຮູ້ຝຶກແອບໃນຂັ້ນຕົ້ນ ແມ່ນວິທີການຂົນ, ການຕໍ່າ, ການຈັດເກັບລາຍ ແລະອອກແບບມີຫຼາຍສີສັນທີ່ຫຼາກຫຼາຍ, ການນຳ ໃຊ້ວັດຖຸດິບຍ້ອມສີຈາກທຳມະຊາດ, ພ້ອມອຸປະກອນການຕໍ່າດ້ວຍ ກີ່ແອວຈົນກວ່າມີຄວາມຊຳນິຊຳ ນານ, ມີປະສົບການຫຼາຍຂຶ້ນ ແລະ ວ່ອງໄວເປັນກ້າວໆມາ.

 ມາຮອດປີ 2014 ເປັນຕົ້ນມາ ຄອບຄົວຕົນເອງໄດ້ຢຶດຖືອາຊີບນີ້ເປັນຫຼັກພ້ອມກັນສູ້ຊົນເຮັດໃຫ້ຜົນຜະລິດດັ່ງກ່າວໄດ້ກາຍເປັນສິນຄ້າ ODOP (ໂອດັອບ) ຂອງເມືອງລະມາມ ພ້ອມທັງປະ ກາດຮັບຮອງ ຄັ້ງວັນທີ 3 ມັງ ກອນ 2019 ແລະໄດ້ຮັບໃບຢັ້ງຢືນ ຜະລິດຕະພັນດີເດັ່ນໃນງານມະຫາ ກຳສີມືຫັດຖະກຳລາວ ຄັ້ງທີ18 ປີ 2019 ທີ່ນະຄອນຫຼວງວຽງຈັນ ໃນຫົວຂໍ້ “ເຄື່ອງທີ່ລະລຶກລາວ”, ນອກນີ້ຍັງມີຄວາມສົນໃຈຫຼາຍທັງພາຍໃນ ແລະຕ່າງເທດ ຈິງເຮັດໃຫ້ ເກີດມີສາຂາຈຳໜ່າຍຢູ່ຕ່າງແຂວງ ທັງໝົດມີ 9 ສາຂາຈຳໜ່າຍຄື: ນະຄອນຫຼວງວຽງຈັນ 5 ສາຂາ, ນະຄອນຫຼວງພະບາງ 2 ສາຂາ, ແຂວງໄຊຍະບູລີ ມີ 1 ສາຂາ ແລະແຂວງສະຫວັນນະເຂດ ມີ 1 ສາຂາຈຳໜ່າຍ, ມີປະສົບການໄປ ວາງສະແດງສິນຄ້າ-ຂາຍ ພາຍໃນປະເທດແຕ່ປີ20062019 ລວມທັງໝົດ 15 ຄັ້ງ ໃນນີ້ເຂົ້າຮ່ວມ ວາງສະແດງ ຢູ່ປະເທດກຳປູເຈຍ 1 ຄັ້ງ.

  ພາຍຫຼັງທີ່ໄດ້ຜະລິດ ແລະຈຳໜ່າຍຕາມສາຂາຕ່າງໆ ໂດຍສະເລ່ຍ ໄດ້ 800 ກວ່າຜືນ,ສາມາດສ້າງລາຍຮັບໃຫ້ແກ່ຄອບຄົວໄດ້ 35 ລ້ານກີບຕໍ່ປີ, ຍ້ອນແນວນັ້ນ ຈິງເຮັດໃຫ້ຄອບຄົວຂອງຕົນມີ ລາຍຮັບເພີ່ມຂຶ້ນສາມາດເຮັດໃຫ້ລາຍຈານຫຼຸດລົງໄດ້ກາຍມາເປັນຄອບຄົວທີ່ຫຼຸດພົ້ນອອກຈາກຄວາມທຸກຍາກ, ມີຢູ່ມີກິນ ແລະໄດກາຍ ເປັນຄອບຄົວຕົວແບບຂອງບ້ານ ກໍ່ຄືຕົວແບບກຸ່ມຜູ້ຜະລິດສິນຄ້າ ຈາກຫັດຖະກຳຕ່ຳແຜ່ນຂອງເຜົ່າ ກຣຽງ.

  ຄຽງຄູ່ກັບຜົນສຳເລັດທີ່ກ່າວມາຂ້າງເທິງນັ້ນຕົນເອງພ້ອມແລ້ວທີ່ຈະສືບຕໍ່ຈັດຕັ້ງປະຕິບັດຕາມແນວທາງຂອງພັກ,ຈະຂະຫຍາຍຫັດຖະກຳຕ່ຳແຜ່ນແພເປັນສິນຄ້າໃຫ້ມີຄຸນນະພາບສູງ, ກຽມພ້ອມເຮັດທຸກສິ່ງທຸກຢ່າງເພື່ອຜົນປະໂຫຍດອັນລວມ ແລະໄປທິດ ນຳຈາກຄະນະພັກທຸກຂັ້ນ, ສິ່ງສຳຄັນຕ້ອງໄດ້ອະນຸລັກຮັກສາສີມື ແຮງງານໃຫ້ຍືນຍົງຕໍ່ໄປ, ຍົກລະດັບການຜະລິດໃຫ້ມີປະລິມານ ແລະຄຸນນະພາບສູງຂຶ້ນ, ຂະຫຍາຍສາຂາຈຳໜ່າຍເພີ່ມອີກໃຫ້ໄດ້ 5 ໜ່ວຍ ແລະສ້າງລາຍຮັບຈາກການຂາຍຜະລິດຕະພັນໃຫ້ໄດ້ 50 ລ້ານ ກີບຕໍ່ປີ.

-------

ໜັງສືພິມເສດຖະກິດ-ສັງຄົມ

แชร์