ບໍ່ແກ້ວ-ຊຽງລາຍ ຮ່ວມມືເພື່ອແກ້ໄຂບັນຫາຢາເສບຕິດ

  ກອງປະຊຸມແລກປ່ຽນສະພາບ ແລະແກ້ໄຂບັນຫາຢາເສບຕິດ, ຕາມຊາຍແດນ ລາວ-ໄທ ລະຫວ່າງບໍ່ແກ້ວ-ຊຽງລາຍ ໄດ້ຈັດຂຶ້ນທີ່ຂົວມິດຕະພາບແຫ່ງທີ 4 ເມືອງຫ້ວຍຊາຍ ແຂວງບໍ່ແກ້ວໃນວັນທີ 4 ມີນາ2020, ໂດຍການເປັນປະທານຮ່ວມຝ່າຍລາວ ມີທ່ານ ພັນເອກ ວິດອນ ພຸດດາວົງ ຫົວໜ້າກອງບັນຊາການທະຫານແຂວງບໍ່ແກ້ວ, ຝ່າຍໄທນຳມີ ທ່ານ ນາວາເອກ ໄຫວພົດ ວິລະປະເສີດ ຜູ້ບັງຄັບການໜ່ວຍເຮືອຮັກສາຄວາມສະຫງົບຕາມແລວຊາຍແດນລອງແມ່ນໍ້າຂອງແຂວງຊຽງລາຍ, ພ້ອມດ້ວຍເຈົ້າໜ້າທີ່ ທີ່ກ່ຽວຂ້ອງຂອງສອງຝ່າຍເຂົ້າຮ່ວມ.

  ຈຸດປະສົງຂອງກອງປະຊຸມໃນຄັ້ງນີ້ກໍເພື່ອເຮັດໃຫ້ການກຳນົດຮ່ວມກ່ຽວກັບຂອບເຂດສິດ ແລະໜ້າທີ່ການປະຕິບັດງານແກ້ໄຂບັນຫາຢາເສບຕິດຕາມຊາຍແດນລາວ-ໄທ ເວົ້າລວມເວົ້າສະເພາະກໍຄືບໍ່ແກ້ວ-ຊຽງລາຍ ທີ່ໄດ້ຮັບການເຫັນດີຈາກຄະນະຊີ້ນຳທັງສອງຝ່າຍສາມາດນຳໄປປະຕິບັດໄດ້ໂດຍໄວ ແລະເພື່ອເປັນການຈັດຕັ້ງພົບປະແລກ ປ່ຽນ ແລະ ເຮັດໃຫ້ຮູ້ຈັກລະຫວ່າງໜ່ວຍປະສານງານປະຈໍາພື້ນທີ່ ແລະ ຄະນະປະຕິບັດງານເພື່ອແກ້ໄຂບັນຫາຢາເສບຕິດຕາມຊາຍແດນລາວ-ໄທທັງສອງຝ່າຍກໍ່ໄດ້ມີ ການແລກປ່ຽນຄໍາຄິດຄໍາເຫັນ ແລະລາຍງານສະພາບການເຄື່ອນໄຫວຄ້າຂາຍຢາເສບຕິດຂອງກຸ່ມຄົນບໍ່ດີຢູ່ບໍລິເວນຂອບເຂດທີ່ຕົນຮັບຜິດຊອບໃຫ້ກັນລະກັນໄດ້ຮັບຊາບເພື່ອພ້ອມກັນຊອກຫາຊ່ອງທາງ ແລະວິທີການແກ້ໄຂບັນຫາຢາເສບຕິດ ແລະປາກົດການຫຍໍ້ທໍ້ອື່ນໆທີ່ອາດຈະເກີດຂຶ້ນເພື່ອສ້າງໃຫ້ກາຍເປັນຊາຍແດນແຫ່ງສັນຕິພາບ, ມິດຕະພາບ, ປອດຢາເສບຕິດ ແລະມີການຮ່ວມມືກັນຢ່າງແທ້ຈິງກອງປະຊຸມໄດ້ດຳເນີນມາເປັນເວລາໜຶ່ງຕອນຈຶ່ງສໍາເລັດລົງ.

 ______________

#ຂຽນໂດຍ: ສົມໄຊ ສີລາຈັນ      
#ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

#ສົນໃຈລົງໂຄສະນາໄດ້ທີ່:  021 313645, 316511

 

แชร์