ທຫລ.ສຂ ສຸມໃສ່ຄຸ້ມຄອງມະຫາພາກດ້ານເງິນຕາຢູ່ພາກກາງ

  ທ່ານ ວົງພະຈັນ ແສງສຸວັນ ວ່າການຫົວໜ້າສາຂາທະນາຄານແຫ່ງ ສປປ ລາວ ພາກກາງ ແຂວງສະຫວັນນະເຂດ(ທຫລ.ສຂ) ແຈ້ງໃຫ້ຮູ້ຜົນການເຄື່ອນໄຫວໃນປີ 2019 ຜ່ານມາ ໂດຍມີການຄຸ້ມຄອງມະຫາພາກດ້ານເງິນຕາໄດ້ດີສົມຄວນໃນນີ້ໄດ້ຄວບຄຸມອັດຕາແລກປ່ຽນໃຫ້ມີຄວາມໝັ້ນທ່ຽງໂດຍມີການເຜີຍແຜ່ບັນດານິຕິກຳ ຜ່ານສື່ຕ່າງໆ ແລະມີການເຜີຍແຜ່ຕົວຈິງຢູ່ 3 ແຂວງ ພາກກາງ (ສະຫວັນນະເຂດ, ຄຳມ່ວນ ແລະ ບໍລິຄຳໄຊ) ໄປພ້ອມກັບການສົ່ງເສີມການນຳໃຊ້ເງິນກີບ ແລະ ຕິດ ຕາມຊຸກຍູ້ຮ້ານແລກປ່ຽນເງິນຕາໃຫ້ດຳເນີນທຸລະກຳພາຍໃຕ້ລະບຽບ, ກົດໝາຍບ້ານເມືອງ.

  ສຳລັບການຄຸ້ມຄອງທະນາຄານທຸລະກິດ; ຜ່ານການສັງລວມໃນເດືອນທັນວາ 2019 ທຽບໃສ່ທ້າຍປີ 2018 ຢູ່ບັນດາແຂວງພາກກາງມີ 23 ສາຂາ ທະນາຄານທຸລະກິດ (ບໍ່ນັບສາຂາທະນາຄານນະໂຍບາຍ) ແລະມີຍອດເຫຼືອຊັບສິນທັງໝົດທຽບເທົ່າ 10.828 ຕື້ກ່ວາກີບ ເພີ່ມຂຶ້ນ 17,42%; ສະພາບການລະດົມເງິນຝາກ (ແຫຼ່ງທຶນ) ທັງໝົດທຽບເທົ່າ 9.858 ຕື້ກ່ວາກີບ ເພີ່ມຂຶ້ນ 19,71% ໃນນີ້ແຂວງສະຫວັນນະເຂດສາມາດລະດົມເງິນຝາກເພີ່ມຂຶ້ນ22,94%, ຄຳມ່ວນລະດົມເງິນຝາກເພີ່ມຂຶ້ນ 16,12% ແລະແຂວງບໍລິຄຳໄຊ ລະດົມເງິນຝາກເພີ່ມຂຶ້ນ 20,27% ການສະໜອງສິນເຊື່ອມີຍອດເຫຼືອທັງໝົດທຽບເທົ່າ 2.954 ຕື້ກ່ວາກີບ ເພີ່ມຂຶ້ນ 1,64%. ສະເພາະ, ທະນາຄານນະໂຍບາຍສາຂາສະຫວັນນະເຂດ ເຄື່ອນໄຫວຢູ່ 2 ແຂວງ ມີ 10 ໜ່ວຍ ຊຶ່ງມີຍອດເຫຼືອສິນເຊື່ອ 276 ຕື້ ກ່ວາກີບ ຫຼຸດ ລົງ 1,09%; ສ່ວນແຂວງບໍລິຄຳໄຊແມ່ນຂຶ້ນກັບ ທນບ ສຳນັກງານໃຫຍ່ ມີ 1 ສູນປະສານງານ ແລະ 4 ໜ່ວຍບໍລິການ.

  ວຽກງານຄຸ້ມຄອງສະຖາບັນການເງິນກໍດຳເນີນໄປດ້ວຍດີຊຶ່ງການກວດການທາງດ້ານເອກະສານ ແລະວິເຄາະໂດຍອັດຕາສ່ວນຕາມຫຼັກການ CAMEL ຂອງສະຖາ ບັນ 15 ແຫ່ງ; ຜ່ານການວິເຄາະຂໍ້ມູນບົດລາຍງານຖານະການເງິນຮອດເດືອນທັນວາ 2019 ສາມາດເຫັນໄດ້ອັນດີຫຼາຍດ້ານ ແລະຍັງຈະປັບປຸງບາງຢ່າງທີ່ຄ້າງຄາ; ພ້ອມດຽວກັນ, ກໍ່ສຳເລັດການກວດກາກັບທີ່ປະຈຳປີ 2018 ໄດ້ 100%; ຕິດຕາມ ແລະ ແກ້ໄຂຂໍ້ຄົງຄ້າງຂອງສະຖາບັນການເງິນພາຍຫຼັງທີ່ສຳເລັດການກວດກາປະຈຳປີ 2019; ສືບຕໍ່ຕິດຕາມຜົນການເຄື່ອນໄຫວບາງສະຖາບັນທັງຄົ້ນຄ້ວາການຂໍດຳເນີນທຸລະກິດຂອງບາງສະຖາບັນແລະຮ່ວມກັບພາກສ່ວນອື່ນໃນການພັດທະນາ ແລະ ການຄຸ້ມຄອງສະຖາບັນການເງິນໃຫ້ຖືກຕ້ອງ, ສອດຄ່ອງຕາມລະບຽບກົດໝາຍຢ່າງເຂັ້ມງວດ.

  ສຳລັບການແກ້ໄຂຜົນກະທົບຈາກໄພນໍ້າຖ້ວມໃນປີ 2019; ບັນດາສາຂາທະນາຄານ-ສະຖາບັນການເງິນຢູ່ 3 ແຂວງ ພາກກາງໄດ້ລະດົມທຶນ 245 ລ້ານກ່ວາກີບ ແລະວັດຖຸຈຳນວນໜຶ່ງມອບໃຫ້ປະຊາຊົນບັນດາເຜົ່າໃນບັນດາເມືອງທີ່ຮັບຜົນກະທົບ; ນອກນີ້, ບັນດາທະນາຄານກໍ່ໄດ້ຈັດຕັ້ງປະຕິບັດຕາມນະໂຍບາຍຂອງທະນາຄານແຫ່ງ ສປປ ລາວ ແລະສຳນັກງານໃຫຍ່ທະນາຄານຂອງຕົນໃນການປະຕິບັດການເຍື້ອນຊຳລະຕົ້ນ ແລະດອກເບ້ຍໃຫ້ແກ່ລູກຄ້າພ້ອມທັງອັດສີດເງິນກູ້ເພີ່ມຕື່ມຕາມສະ ພາບ ແລະເງື່ອນໄຂຄວາມເປັນຈິງຂອງລູກຄ້າຕາມລະບຽບ ແລະນະໂຍບາຍຂອງທະນາຄານຕ່າງໆ.

   ແຜນການໃນຕໍ່ໜ້າແມ່ນຍັງສືບຕໍ່ໃນການຮັກສາສະຖຽນລະພາບທາງດ້ານເງິນຕາ; ຄຸ້ມຄອງ ແລະພັດທະນາບັນດາສະຖາບັນການເງິນໃຫ້ເຄື່ອນໄຫວຕາມລະບຽບການ; ກະຕຸກຊຸກຍູ້ບັນດາສາຂາທະນາຄານທຸລະກິດເພີ່ມຄວາມເອົາໃຈໃສ່ປະຕິບັດແຜນລະດົມເງິນຝາກ, ປ່ອຍສິນເຊື່ອ ແລະແກ້ໄຂໜີ້ເກີນກຳນົດໃຫ້ໄດ້ຕາມແຜນການ  ໂດຍສະເພາະການເກັບກູ້-ແກ້ໄຂໜີ້ໃຫ້ຫຼຸດລົງຕໍ່າກ່ວາທີ່ທະນາຄານແຫ່ງ ສປປ ລາວ ກຳນົດ NPLs ບໍ່ກາຍ 3% (ສຳລັບທະນາຄານທຸລະກິດ) ຂອງຍອດສິນເຊື່ອທັງໝົດ ແລະສືບຕໍ່ເອົາໃຈໃສ່ເຄື່ອນໄຫວວຽກງານສຳຄັນອື່ນໆທີ່ຕິດພັນກັບພາລະບົດບາດໜ້າທີ່ຂອງ ທຫລ.ສຂ ໃຫ້ດີຂຶ້ນກ່ວາເກົ່າ.

_____________

#ຂຽນໂດຍ: ຣັດສະໝີ ດວງສັດຈະ      
#ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

#ສົນໃຈລົງໂຄສະນາໄດ້ທີ່:  021 313645, 316511

แชร์