ຖະແຫຼງເລື່ອນເປັນທາງການງານຊຽງຂວາງເກມ

 ວັນທີ 6 ມີນາຜ່ານມາທີ່ຫ້ອງວ່າການສໍານັກງານປົກຄອງແຂວງຊຽງຂວາງໄດ້ມີພິທີຖະແຫຼງເປັນທາງການກ່ຽວກັບການເລື່ອນການຈັດງານມະຫະກຳກີລາແຫ່ງຊາດຄັ້ງທີ XI ທີ່ແຂວງຊຽງຂວາງເປັນເຈົ້າພາບ, ໂດຍໃຫ້ກຽດເຂົ້າຮ່ວມຂອງ ທ່ານ ບຸນຕົ້ນ ຈັນທະພອນ ເຈົ້າແຂວງຊຽງຂວາງ, ທ່ານ ບົວລານ ສີລິປັນຍາ ຮອງລັດຖະມົນ ຕີກະຊວງສຶກສາທິການ ແລະກິລາ,ມີທ່ານ ສົມພູ ພົງສາ ຜູ້ຊ່ວຍລັດຖະມົນຕີກະຊວງສຶກສາ,ມີທ່ານຮອງເຈົ້າແຂວງ,ຫົວໜ້າກົມກີລາລະດັບສູງ,ບັນດາທ່ານເຈົ້າເມືອງ, ຫົວໜ້າພະແນກການ, ກົມກອງອ້ອມຂ້າງແຂວງ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

 ໂອກາດນີ້ທ່ານ ບົວລານ ສີລິປັນຍາ ໄດ້ຂຶ້ນຜ່ານແຈ້ງການສະບັບເລກທີ 296/ຫສນຍ, ລົງວັນທີ 3 ມີນາ 2020 ແລະແຈ້ງການສະບັບເລກທີ 07/ຫສພ, ລົງວັນທີ 28 ກຸມພາ 2020, ແຈ້ງການທັງສອງສະບັບລ້ວນແລ້ວແຕ່ມີເນື້ອໃນສ່ອງແສງເຖິງສະພາບຂອງໂລກປະຈຸບັນກຳລັງຂັບຂັນປະເຊີນໜ້າກັບການລະບາດຂອງພະຍາດເຊື້ອຈຸລະໂລກສາຍພັນໃໝ່(COVID-19) ຢ່າງຮຸນແຮງ ແລະ ໄດ້ກໍ່ໃຫ້ເກີດຄວາມເສຍຫາຍຢ່າງໃຫຍ່ຫຼວງໃນຫຼາຍປະເທດ, ອົງການອະນາໄມໂລກໄດ້ມີການແຈ້ງເຕືອນໄພອັນຕະລາຍຂອງພະຍາດດັ່ງກ່າວນີ້ພ້ອມທັງຮຽກຮ້ອງໃຫ້ມີການປ້ອງກັນໃຫ້ດີ ແລະຈໍາກັດການໂຮມຊຸມນຸມຂອງຄົນຈໍານວນຫຼາຍເພື່ອປ້ອງກັນການແຜ່ລະ ບາດຂອງພະຍາດ ເວົ້າສະເພາະໃນ ສປປ ລາວ ຂອງພວກເຮົາເຖິງປະຈຸບັນຍັງບໍ່ທັນມີກໍລະນີຕິດເຊື້ອພະຍາດດັ່ງກ່າວແຕ່ຢູ່ບັນດາປະເທດອ້ອມຂ້າງພວກເຮົາແມ່ນມີການລະບາດຂອງເຊື້ອພະຍາດດັ່ງກ່າວນີ້ແລ້ວເປັນວົງກ້ວາງ,ຖ້າຫາກມີການໂຮມຊຸມນຸມໃຫຍ່ຈະເຮັດໃຫ້ມີຄວາມສ່ຽງຕໍ່ການຕິດເຊື້ອພະຍາດດັ່ງກ່າວຖ້າເຮົາບໍ່ມີມາດຕະການປ້ອງກັນທີ່ດີ, ຖ້າຫາກມີການແຜ່ລະບາດປະເທດເຮົາໃນສະພາບທີ່ພາຍໃນຍັງມີຄວາມຫຍຸ້ງຍາກທາງດ້ານເສດຖະກິດການເງິນ, ຍິ່ງຈະມີຄວາມອັນຕະລາຍສູງຕໍ່ຊີວິດ

ແລະ ຊັບສິນຂອງປະຊາຊົນ, ຍ້ອນເຫັນໄດ້ໄພອັນຕະລາຍເຊັ່ນນັ້ນ, ຫ້ອງວ່າການສໍານັກງານນາຍົກ ແລະຫ້ອງວ່າການສູນກາງພັກຈິ່ງໄດ້ອອກແຈ້ງການໃຫ້ເລື່ອນການ ຈັດງານມະຫາກຳກິລາແຫ່ງຊາດຄັ້ງທີ XI, ການສະເຫຼີມສະຫຼອງທົ່ງໄຫຫີນຖືກຮັບຮອງເປັນມໍລະດົກໂລກ ແລະງານແຫ່ພະເຈົ້າອົງຫຼວງເຊິ່ງຈະຈັດຂຶ້ນໃນວັນທີ 22 ມີນາ 2020 ທີ່ແຂວງຊຽງຂວາງ ເປັນເຈົ້າພາບໃຫ້ເລື່ອນອອກໄປກ່ອນຈົນກ່ວາສະພາບການລະບາດຂອງພະຍາດດັ່ງກ່າວຈະຖືກຄວບຄຸມ, ພ້ອມດຽວກັນນັ້ນທ່ານ ບົວລານ ສີລິປັນຍາ ຍັງໄດ້ຮຽກຮ້ອງໃຫ້ແຂວງເຈົ້າພາບໂດຍສະເພາະກອງເລຂາ ແລະ ກຳມະການທີ່ກ່ຽວຂ້ອງໃຫ້ສືບຕໍ່ຕິດຕາມກວດກາພື້ນຖານໂຄງລ່າງການກໍ່ສ້າງສະ ໜາມແຂ່ງຂັນກິລາແຕ່ລະໜາມ, ຖ້າສະໜາມໃດຫາກບໍ່ທັນສໍາເລັດໃຫ້ສືບຕໍ່ໃນການກໍ່ສ້າງໃຫ້ສໍາເລັດ ແລະຖ້າສະໜາມກິລາປະເພດໃດຫາກສໍາເລັດ 100% ແມ່ນໃຫ້ມອບ-ຮັບເປັນທາງການພ້ອມທັງສືບຕໍ່ປົກປັກຮັກສາຄຸ້ມຄອງໃຫ້ດີຈົນກ່ວາຮອດມື້ເປີດງານ, ສໍາລັບວຽກງານການຈັດຊື້-ຈັດຈ້າງແມ່ນໃຫ້ດໍາເນີນສໍາລະສະສາງບໍ່ໃຫ້ຄົງຄ້າງ, ມອບໃຫ້ທ່ານເຈົ້າແຂວງສົມທົບກັບຄະນະປະຈໍາ ແລະ ຄະນະທີ່ກ່ຽວຂ້ອງຈັດກອງປະຊຸມປຶກສາຫາລືຄົ້ນຄວ້າກໍານົດເອົາວັນເວລາການຈັດງານມະຫາກຳກິລາແຫ່ງຊາດຄັ້ງທີ XI, ການສະເຫຼີມສະຫຼອງທົ່ງໄຫຫີນຖືກຮັບຮອງເປັນມໍລະດົກໂລກ ແລະ ງານແຫ່ພະເຈົ້າອົງຫຼວງຕາມວັນເວລາທີ່ເໝາະສົມໂດຍອີງໃສ່ການປະຢັດມັດທະຍັດເປັນຫຼັກ ແລ້ວສະເໜີຕໍ່ລັດຖະບານເພື່ອພິຈາລະນາຕາມວັນເວລາທີ່ເໝາະສົມ.

________________

#ຂຽນໂດຍ: ຄານສີສະຫວັນ      
#ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

#ສົນໃຈລົງໂຄສະນາໄດ້ທີ່:  021 313645, 316511

แชร์