ເວທີນາງສາວນະຄອນຫຼວງຊ່ວຍໃຫ້ ນັນຕາລີ ໄດ້ຄວາມສາມາດຫຼາຍຂຶ້ນ

 ນາງ ນັນຕາລີ ທະນົນໄຊ ຈາກຄວາມຝັນທີ່ຈະເຂົ້າຮ່ວມປະກວດໃນເວທີນາງສາວນະຄອນ ຫຼວງວຽງຈັນຊຶ່ງໄດ້ສ້າງປະສົບຝັນສໍາເລັດອີກຂັ້ນໜຶ່ງຄືເຂົ້າຮອບ 20 ສຸດທ້າຍ ແລະເປັນການສ້າງ ໂອກາດໃຫ້ກັນຕົນເອງໃນການສະແດງຄວາມສາມາດຫຼາຍຂຶ້ນ.

ນັນຕາລີ ທະນົນໄຊ ຫຼື ນັນ MVT04 ອາຍຸ 20 ປີ ໃຫ້ສໍາ ພາດວ່າ: ປະຈຸບັນກໍາລັງສຶກສາທີ່ມະຫາວິທະຍາໄລແຫ່ງຊາດຄະນະອັກສອນສາດພາກວິຊາສື່ສານ ມວນຊົນປີທີ 3 ທີ່ປະຈຸບັນບ້ານ ປັກແຮດ ເມືອງນາຊາຍທອງ ນະຄອນຫຼວງວຽງຈັນ ຫຼັງຈາກທີ່ຕົນເອງໄດ້ເຂົ້າຮອບ 20 ຄົນສຸດທ້າຍ ໃນເວທີປະກວດນາງສາວນະຄອນ ຫຼວງວຽງຈັນ 2020 ກໍໄດ້ເລີ່ມເຮັດກິດຈະກຳຮ່ວມກັບໝູ່ເພື່ອນ ແລະກຽມເກັບຄະແນນກ່ອນຈະເຖິງຮອບຕັດສິນຜ່ານມາຕົນເອງກໍເຄີຍມີຜົນງານດ້ານການບັນເທີງໂດຍການຖ່າຍວາລະສານວັນນະສິນ, ຖ່າຍໂຄສະນາປຶ້ມດີບຸກ ແລະ ເດີນແບບຕ່າງໆ ແຕ່ຍັງບໍ່ເຄີຍເຂົ້າປະກວດເວທີໃດມາກ່ອນແຕ່ເຄີຍເຂົ້າຝິຶກອົບຮົມການເດີນແບບກັບສະໂມສອນວັດທະນະທຳສິນໄຊ ໃນປີ 2017 ແລະໄດ້ຮັບລາງວັນ ຂວັນໃຈຊ່າງພາບຈາກສະໂມສອນ ດັ່ງກ່າວ.

  ເມື່ອມີປະສົບການໃນວຽກ ງານບັນເທີງໃນລະດັບໜຶ່ງຈຶ່ງຕັດ ສິນໃຈເຂົ້າຮ່ວມປະກວດເພາະເວທີນີ້ເປັນເວທີອັນຊົງກຽດ ແລະ ຍິ່ງໃຫຍ່ທີ່ເປີດໂອກາດໃຫ້ຫຼາຍ ຄົນໄດ້ມາສະແດງຄວາມຮູ້, ຄວາມສາມາດຂອງຕົນ, ຄັດເລືອກເອົາ ຜູ້ທີ່ມີຄວາມພ້ອມທາງດ້ານບຸກຄະລິກກະພາບ ແລະພ້ອມໃນການປະຕິບັດໜ້າທີ່ໃນແຕ່ລະປີ ຊຶ່ງຕົນເອງ ກໍມີຄວາມຝັນທີ່ຈະເຂົ້າປະກວດເວທີນາງສາວນະຄອນຫຼວງມາຫຼາຍປີ ໂດຍເຫັນຫຼາຍຄົນກໍປະສົບຜົນສຳເລັດຈາກເວທີນີ້ ແລະຢາກ ປະສົບຜົນສຳເລັດຄືເຂົາເຈົ້າຍ້ອນ ຕົນເອງມີເປົ້າໝາຍໃນຊີວິດວ່າ ການໄດ້ເຮັດຕາມຄວາມຝັນທີ່ຫວັງ ໄວ້ໃນສິ່ງທີ່ຕົນຮັກ ແລະເພື່ອພິສູດ ຕົນເອງໃນເລື່ອງທີ່ຄິດວ່າຕົນເອງເຮັດບໍ່ໄດ້ໃຫ້ປະສົບຜົນສຳເລັດເພື່ອ ເປັນການສ້າງຄວາມສຸກຂອງຊີວິດ ໃນອະນາຄົດສ່ວນຄວາມຄາດ ຫວັງ ໃນເວທີນີ້ເຊື່ອວ່າຢ່າງໜ້ອຍທີ່ສຸດກໍໄດ້ມິດຕະພາບ, ປະສົບການ ແລະ ຄວາມຮູ້ໃໝ່ໆ.

ຊຶ່ງເວທີນີ້ຈະເຮັດໃຫ້ຕົນເອງສະແດງອອກຄວາມສາມາດອອກມາໄດ້ດີທີ່ສຸດເພາະເປັນການນຳສະເໜີຮີດຄອງປະເພນີ, ການນົບ ໄຫວ້, ຮອຍຍິ້ມ ແລະວາຈາສໍາລັບເຄັດລັບໃນການຮັກສາສຸຂະພາບ ແມ່ນກິນອາຫານໃຫ້ຄົບ 5 ໝູ່, ອອກກຳລັງກາຍ ແລະພັກຜ່ອນໃຫ້ພຽງພໍເວລາຫວ່າງສ່ວນໃຫຍ່ຈະອອກກຳລັງກາຍ ແລະໄປທ່ຽວ ສະຖານທີ່ຕ່າງໆທີ່ຍັງບໍ່ເຄີຍໄປ.

ສາມາດຮ່ວມເຊຍ ແລະເປັນກໍາລັງໃຈໃຫ້ນ້ອງໆທັງ 20 ຄົນ ໄດ້ ທາງແຟນເພສ: Miss Vientiane ນາງສາວນະຄອນຫຼວງວຽງຈັນ ຫຼື ສາມາດຕິດຕາຂໍ້ມູນ-ຂ່າວສານ ຂອງນ້ອງ ນັນ MVT04 ໄດ້ທາງ ເຟສບຸກສ່ວນຕົວ: Nanhtaly Thanonxay.

------

ໂດຍ: ແພງຕາ

แชร์