ເມືອງຫົງສາ ປາຖະກະຖາວັນແມ່ຍິງສາກົນ ຄົບຮອບ 110 ປີ

   ເພື່ອເປັນການຫວນຄືນປະຫວັດມູນເຊື້ອການກໍາເນີດເຕີບ ໃຫ່ຍຂະຫຍາຍຕົວ ແລະຜົນງານ ການເຄື່ອນໄຫວຂອງວັນທີ 8 ມີນາ ເພື່ອພາລະກິດຕໍ່ສູ້ປົດປ່ອຍຊາດ, ປົກປັກຮັກສາ ແລະ ສ້າງສາພັດທະນາປະເທດຊາດກໍຄື: ພາລະກິດພັດທະນາແມ່ຍິງຕະຫຼອດໄລຍະຜ່ານມາວັນທີີ 6 ມີນາ 2020 ນີ້, ທີ່ສະໂມສອນເມືອງຫົງສາ ແຂວງ ໄຊຍະບູລີ ໄດ້ຈັດພິທີປາຖະກະຖາເນື່ອງໃນໂອກາດສະເຫຼີມສະຫຼອງວັນແມ່ຍິງສາກົນວັນທີ 8 ມີນາຄົບ ຮອບ 110 ປີ ຄື: (1910-2020) ພາຍໃຕ້ຄໍາຂວັນ “ ສິດທິຂອງແມ່ ຍິງຕິດພັນກັບຄວາມສະເໝີພາບ ຍິງ-ຊາຍ ” ໂດຍການປາຖະກາຖາ ຂອງທ່ານ ນາງ ດາວວິນ ລາດຊະກິດ ຮອງເລຂາພັກເມືອງຫົງສາ, ມີບັນດາກໍາມະການປະຈຳພັກເມືອງ, ຫົວໝ້າ-ຮອງຫົວໜ້າຫ້ອງ, ຄະນະບໍລິຫານງານສະຫະພັນແມ່ຍິງເມືອງ, ຫົວໜ້າໜ່ວຍແມ່ຍິງອ້ອມຂ້າງ, ຫົວໜ້າຄະນະແມ່ຍິງບ້ານເທດສະບານ ແລະຕະຫຼອດເຖິງສະມາຊິກສະຫະພັນແມ່ຍິງເຂົ້າຮ່ວມ.

  ທ່ານ ນາງ ດາວວິນ ລາດຊະກິດ ໄດ້ເລົ່າຄືນມູນເຊື້ອປະຫວັດຄວາມເປັນມາໂດຍສັງເຂບວ່າ: ວັນແມ່ຍິງສາກົນໄດ້ກໍາເນີດເກີດຂຶ້ນໃນທ່າມກາງສະພາບເສດຖະກິດຂອງພວກສັກດິນາ ແລະນາຍທຶນຂະຫຍາຍຕົວ, ແຕ່ກໍາມະກອນແມ່ຍິງແມ່ນຢູ່ພາຍໃຕ້ລະບອບສັກດິນາ ແລະ ນາຍທຶນເຮັດໃຫ້ແມ່ຍິງຖືກກົດຂີ່ຂູດຮີດຢ່າງໜັກໜ່ວງໄດ້ຄ່າຈ້າງບໍ່ສົມຄ່າແຮງງານ, ບໍ່ມີລະບອບປົກປັກຮັກສາສຸຂະພາບຂອງ ແມ່ຍິງ ແລະເດັກນ້ອຍ ນອກຈາກ ນັ້ນ, ແມ່ຍິງຍັງຖືກດູຖູກໝິ່ນປະໝາດ, ຖືເປັນຄືສິນຄ້າ, ຖືກທຸບຕີ ຂົ່ມຂືນທຳສຳເລົ່າ ແລະຖືກໄລ່ ອອກຈາກວຽກ ຕໍ່ກັບສະພາບການ ດັ່ງກ່າວນັ້ນ, ແມ່ຍິງຮູ້ສຶກຄຽດແຄ້ນຈຶ່ງໄດ້ສາມັກຄີກັນລຸກຂຶ້ນຕໍ່ສູ້, ເດີນຂະບວນປະທ້ວງເພື່ອໃຫ້ພວກນາຍທຶນເຊິ່ງແມ່ນເຈົ້າຂອງໂຮງຈັກໂຮງງານຕ້ອງແກ້ໄຂຊີວິດການເປັນຢູ່ຂອງເຂົາເຈົ້າ,ໃຫ້ຫຼຸດຜ່ອນຊົ່ວໂມງການເຮັດວຽກ,ຢຸດເຊົາການຂູດຮີດແຮງງານເດັກ ແລະທວງໃຫ້ແມ່ຍິງມີສິດໃນການອອກສຽງເລືອກຕັ້ງ ແລະ ຮັບສະໝັກເລືອກຕັ້ງຫຼາຍໆຄັ້ງ. ແຕ່ກໍຖືກຕໍາຫຼວດເຂົ້າສະຫຼາຍ ແລະ ຈັບກຸມດ້ວຍຄຸນງາມຄວາມດີ, ຄວາມມານະອົດທົນ ແລະ ຄວາມສາມັກຄີຂອງແມ່ຍິງທີ່ປະທ້ວງຫຼາຍຄັ້ງຈຶ່ງໄດ້ຮັບໄຊຊະນະຄື: ໃນເດືອນກຸມພາ 1909 ແມ່ຍິງອະເມລິກາໄດ້ຈັດພິທີສະຫຼອງວັນແມ່ຍິງສາ ກົນເປັນເທື່ອທໍາອິດ, ເຮັດໃຫ້ແມ່ຍິງໃນເມືອງນິວຢອກ 3,000 ຄົນ ໄດ້ເຂົ້າຮ່ວມການຕໍ່ສູ້ຄັດຄ້ານລັດຖະບານທີ່ບໍ່ຍອມໃຫ້ແມ່ຍິງມີສິດຮັບເລືອກຕັ້ງ.

 ມາຮອດປີ 1910 ຂະບວນການ ຕໍ່ສູ້ຂອງແມ່ຍິງໄດ້ແຜ່ຂະຫຍາຍ ກວ້າງອອກໄປສູ່ປະເທດນາຍທຶນ ຢູ່ທະວີບເອີຣົບ ແລະໃນປີນີເອງ ກອງປະຊຸມສາກົນກ່ຽວກັບບັນຫາແມ່ຍິງຄັ້ງທໍາອິດ ໄດ້ຈັດຂຶ້ນຢູ່ໂກ ເປນຮາກນະຄອນຫຼວງ ຂອງປະເທດເດນມາກມີຜູ້ແທນ 100 ກວ່າ ຄົນຈາກ 17 ປະເທດເຂົ້າຮ່ວມ, ກອງປະຊຸມດັ່ງກ່າວໄດ້ຮັບຮອງ ແລະຕົກລົງເອົາວັນທີ 8 ມີນາ ຂອງທຸກໆປີເປັນວັນແມ່ຍິງສາກົນ ດັ່ງນັ້ນ, ວັນທີ 8 ມີນາ ແມ່ນເຫດ ການ-ການເມືອງທີ່ສໍາຄັນ, ເປັນຂີດໝາຍແຫ່ງໄຊຊະນະອັນພື້ນ ຖານຂອງຂະບວນການແມ່ຍິງສາ ກົນໃນການຕໍ່ສູ້ທວງເອົາສິດຜົນປະ ໂຫຍດອັນເປັນທໍາໃຫ້ແກ່ແມ່ຍິງ ຜູ້ອອກແຮງງານໃນທົ່ວໂລກ, ເປັນວັນລະນຶກເຖິງການຕໍ່ສູ້ຂອງແມ່ຍິງ ເພື່ອປົດປ່ອຍຕົນເອງ ແລະທວງ ໃຫ້ມີສິດສະເໝີພາບປະຊາທິປະໄຕຄືກັບຜູ້ຊາຍ, ຕ້ອງມີລະບອບ ປ້ອງກັນສຸຂະພາບຂອງແມ່ຍິງ ແລະເດັກນ້ອຍ, ຕ້ານສົງຄາມ ຮຸກຮານ, ປົກປັກຮັກສາສັນຕິພາບ ຂອງໂລກນັບແຕ່ນັ້ນມາວັນທີ 8 ມີນາ ຈຶ່ງເປັນວັນແມ່ຍິງສາກົນ.

___________

#ຂຽນໂດຍ: ກິດຕິສັກ ບົວໄລພ 
#ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

#ສົນໃຈລົງໂຄສະນາໄດ້ທີ່:  021 313645, 316511

 

แชร์