ສາລະວັນດັດສົມໂຮງງານປຸງແຕ່ງໄມ້ ແລະເຟີນີເຈີ 158 ແຫ່ງ

  ເມື່ອບໍ່ດົນມານີ້ໜ່ວຍພັກພະແນກອຸດສາຫະກຳ ແລະການຄ້າແຂວງສາລະວັນ ໄດ້ເປີດກອງປະຊຸມໃຫຍ່ຄັ້ງທີ IX ໂດຍການເປັນປະທານຂອງ ສະຫາຍ ຄໍາຜ່ານ ສີລາວີ ເລຂາໜ່ວຍພັກ ຫົວໜ້າພະແນກອຸດສາຫະກຳ ແລະການຄ້າແຂວງ, ໃຫ້ກຽດເຂົ້າຮ່ວມຂອງສະຫາຍ ບຸນທຽມ ແກ້ວໄຊຍະວົງ ຮອງເລຂາພັກແຂວງຫົວໜ້າຄະນະຈັດຕັ້ງແຂວງ, ມີຮອງເລຂາໜ່ວຍພັກ, ສະມາຊິກພັກສົມບູນ-ສຳຮອງ ພ້ອມດ້ວຍແຂກທີ່ຖືກເຊີນເຂົ້າຮ່ວມ.

  ສະຫາຍ ຄຳຜ່ານ ສີລາວີ ເລຂາໜ່ວຍພັກ ຫົວໜ້າພະແນກອຸດສາຫະກຳ ແລະການຄ້າ ໄດ້ຜ່ານບົດລາຍງານການເມືອງໃນໄລຍະ 5 ຜ່ານມາຊຶ່ງສາມາດຍາດໄດ້ຜົນ ສຳເລັດຫຼາຍດ້ານທາງດ້ານດີ, ດ້ານອ່ອນ ແລະບົດຮຽນທີ່ຖອດ ຖອນໄດ້ ໂດຍສະເພາະດ້ານການ ເມືອງແນວຄິດຄະນະໜ່ວຍພັກ, ສະມາຊິກພັກພາຍໃນໜ່ວຍໄດ້ນຳ ພາດຳເນີນຊີວິດການເມືອງປະຈຳເດືອນເພື່ອແນໃສ່ສຳຫຼວດກວດກາ, ຕຳນິສົ່ງຂ່າວເພື່ອກໍ່ສ້າງຊ່ວຍເຫຼືອເຊິ່ງກັນ ແລະ ກັນ, ຈັດຕັ້ງເຜີຍແຜ່ເຊື່ອມຊຶມແນວທາງນະໂຍ ບາຍ, ລະບຽບກົດໝາຍ, ມະຕິ, ຄຳສັ່ງ ແລະເອກະສານສໍາຄັນຕ່າງໆຂອງ ພັກຂອງຊາດ, ໄດ້ຜັນຂະຫຍາຍ ມະຕິກອງປະຊຸມໃຫຍ່ຄັ້ງທີ X ຂອງສູນກາງພັກ, ມະຕິ VIII ຂອງ ອົງຄະນະພັກແຂວງ ແລະມະຕິກອງປະຊຸມໃຫຍ່ຄັ້ງທີ VIII ຂອງໜ່ວຍພັກ ,ໄດ້ຫັນເປັນແຜນງານ, ໂຄງການລະອຽດຂອງພະແນກອຸດສາຫະກຳ ແລະການຄ້າເພື່ອເຮັດໃຫ້ບົດບາດການເປັນເສນາທິການໃຫ້ຄະນະພັກ, ຄະນະອົງການປົກຄອງແຂວງ ແລະກະຊວງອຸດສາຫະກຳ ແລະການຄ້າ, ກ່ຽວກັບວຽກງານກວດກາລັດ,ວຽກງານຄຸ້ມຄອງ ແລະສົ່ງເສີມອຸດສາຫະກຳປຸງແຕ່ງ, ວຽກງານຫັດຖະກຳ, ຄຸ້ມຄອງການນຳເຂົ້າ ແລະສົ່ງອອກ, ຄຸ້ມຄອງທະບຽນ ແລະ ວິສາຫະກິດ ແລະວຽກງານອື່ນໆ.

  ຊຶ່ງອັນພົ້ນເດັ່ນແມ່ນໄດ້ຈັດຕັ້ງປະຕິບັດຄຳສັ່ງເລກທີ 15/ນຍ, ເຮັດໃຫ້ການດັດສົມບັນດາໂຮງງານປຸງແຕ່ງໄມ້ ແລະເຟີ ນີເຈີ158 ແຫ່ງດັດສົມ ແລະຮັກສາໄວ້ຍັງ 38 ແຫ່ງໃນນັ້ນ ໂຮງງານປຸງແຕ່ງໄມ້ 27 ແຫ່ງ, ໂຮງງານເຟີນີເຈີ 11 ແຫ່ງ, ຊຸກຍູ້ສົ່ງເສີມໂຮງງານປຸງແຕ່ງພືດກະສິກຳ, ອາຫານ ແລະເຄື່ອງດື່ມນອກນັ້ນ ຍັງໄດ້ຊຸກຍູ້ໃຫ້ໂຮງງານຊີມັງປັບປຸງ ແລະຍົກສາມັດຕະພາບລະດັບການຜະລິດໃຫ້ຫຼາຍຂຶ້ນກວ່າເກົ່າ, ການຜະລິດແຜນແພໃນ 4 ກຸ່ມບ້ານ ສາມາດຜະລິດໄດ້ 1.205 ຜືນຕໍ່ເດືອນມູນຄ່າ 48 ລ້ານກ່ວາກີບ.

 ຈາກນັ້ນໃນກອງປະຊຸມຜູ້ເຂົ້າຮ່ວມຍັງໄດ້ຮັບຟັງການຜ່ານແຜນພັດທະນາຂະແໜງການ, ບົດສຳຫຼວດການນຳພາລວມຂອງຄະນະພັກຊຸດເກົ່າພ້ອມທັງຜ່ານມາດຖານເງື່ອນໄຂຜູ້ສະໝັກເລືອກຕັ້ງຄະນະພັກຊຸດໃໝ່, ຜ່ານການປ່ອນບັດເລືອກຕັ້ງເອົາຄະນະໜ່ວຍພັກພັດຊຸດໃໝ່ມີຜູ້ສະໝັກ 5 ສະຫາຍ, ເລືອກເອົາ 3 ສະຫາຍ, ກອງປະຊຸມຄັ້ງປະຖົມມະລຶກເລືອກໄດ້ສະຫາຍ ຄຳຜ່ານ ສີລາວີ ເປັນເລຂາ, ສະຫາຍ ບຸນຊູ ລັດສະໝີ ເປັນຮອງເລຂາ ທັງເປັນປະທານກວດກາ ແລະສະຫາຍ ນາງ ກຸແກ້ວ ທອງມະນີລາ ເປັນຄະນະ.

______________

#ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

#ສົນໃຈລົງໂຄສະນາໄດ້ທີ່:  021 313645, 316511

แชร์