ວັດໃຫຍ່ສີບຸນເຮືອງ ເມືອງນອງ ຍົກຍອດຊໍ່ຟ້າ 5 ຍອດ

   ວັນທີ 7 ມີນາ ທີ່ວັດໃຫຍ່ ສີບຸນເຮືອງ ເມືອງນອງ ແຂວງສະຫວັນນະເຂດ ໄດ້ຈັດພິທີຍົກຍອດຊໍ່ຟ້າ 5 ຍອດຂຶ້ນ ໂດຍການໃຫ້ກຽດເປັນປະທານຂອງຍາທ່ານ ຄຳຄ່ອງ ສິຣິປຸນໂຍ ເຈົ້າຄະນະເມືອງສົງວັດເມືອງເຊໂປນ, ຍາພໍ່ພູທອນ ພັນທະວົງ ສາຮອງປະທານ ອພສ ເມືອງນອງ, ທ່ານ ສຸກສາຄອນ ໂພທິລາດຮອງເລຂາພັກເມືອງຫົວໜ້າຄະນະຈັດຕັ້ງເມືອງ, ທ່ານ ແຕງອ່ອນ ຈັນທະລະນອງ ກຳມະການພັກເມືອງຮອງເຈົ້າເມືອງໆນອງ, ມີຄະນະປະຈຳພັກເມືອງ, ກຳມະການພັກເມືອງ, ພະເຖລານູເຖລະ, ອອກຕົນຍາດໂຍມທີ່ມາຈາກຕ່າງເມືອງ, ແຕ່ງແຂວງ, ອຳນາດການປົກຄອງ, ເຖົ້າແກ່ແນວໂຮມ, ຕະຫຼອດຮອດປະຊາຊົນບັນດາເຜົ່າພາຍໃນບ້ານນອງວິໄລ ແລະຊາວພຸດທະສາສະໜາທົ່ວເມືອງນອງທີ່ມີນໍ້າໃຈເຫຼື້ອມໃສສັດທາເຂົ້າຮ່ວມ.

  ໃນພິທີໄດ້ມີການໄຫວ້ພະຮັບສິນ, ຖະຫວາຍເຂົ້າບິນພະບາດ, ບັດຈຸປັດໄຈໄຊຍະທານ, ພັດຕາອາຫານ ແລະ ເຈົ້າສັດທາຖະຫວາຍຍອດຊໍ່ຟ້າ 5 ຍອດ ໂດຍແມ່ນແມ່ ອອກຄຸດໄກສອນ ກຽດຕະວົງ ບ້ານນອງວິໄລ ເມືອງນອງ ພ້ອມດ້ວຍຄອບຄົວເປັນເຈົ້າມູນລະສັດທາຄອບຄົວ ແມ່ອອກຜາເວດ ກຽດຕະວົງ  ບ້ານນອງວິໄລ ເມືອງນອງ ແຂວງສະຫວັນນະເຂດ, ແມ່ອອກຄຳຫຼ້າ ໄຊປະສົງ ບ້ານສີບຸນເຮືອງທົ່ງ ເມືອງສີໂຄດ ນະຄອນຫຼວງວຽງຈັນ, ແມ່ອອກຄຳເພັດ ບ້ານໜອງບອນ ເມືອງໄຊເສດຖານະຄອນຫຼວງວຽງຈັນ ແລະແມ່ອອກສອນລະສິດ ບຸດສະບົວບານ ຈາກ (USA) ສະຫະລັດອາເມລິກາ ເປັນເຈົ້າສັດທາ, ພ້ອມດຽວກັນນັ້ນໃນພິທີໄດ້ແຮ່ຍອດຊໍ່ຟ້າ 5 ຍອດ ອ້ອມພັດທະສີມວັດດັ່ງກ່າວ 3 ຮອບ ແລະໄດ້ຍົກຍອດຊໍ່ໄຟ້ຂຶ້ນເທິງຈອມສິມ.

  ໃນວັນທີ 8 ເດືອນ ມີນາ (3) ມື້ຂຶ້ນ 15 ຄໍ່າ ເດືອນ 4 ລາວ ພສ 2563 ໄດ້ມີພິທີຕັກບາດ (ແຈກຈັ່ງຫັນ) ພະສົງ 41 ອົງ, ທັງນີ້ ກໍ່ເພື່ອປະຕິບັດ, ສືບທອດເຮັດຕາມຮີດຄອງອັນດີງາມຂອງຊາວພຸດ,ກໍ່ຄືຊາວລາວທັງຊາດ, ເຮັດຕາມຄຳສອນຂອງພະພຸດທະເຈົ້າ, ເປັນການສ້າງບຸນກຸສົນ, ສ້າງຄຸນງາມຄວາມດີ ແລະນຳເອົາຄຳສອນໄປ ພັດທະນາເຂົ້າໃນຊີວິດປະຈຳວັນເປັນຢູ່ຂອງຕົນໃຫ້ພົບແຕ່ຄວາມສຸກ, ຄວາມຈະເລີນໃນຊີວິດ, ອີກຢ່າງໜຶ່ງເພື່ອເປັນການເຮັດບຸນຕາມເຈດຕະນາປະສົງປາສະຈາກ ຄວາມທຸກ, ນຳມາຊຶ່ງຄວາມສຸກ ແລະອຸທິດສວນບຸນສ່ວນກຸສົນໄປຫາຜູ້ມີພະຄຸນ, ຍາດຕິພີ່ນ້ອງທີ່ໄດ້ລ່ວງລັບໄປແລ້ວນັ້ນໃຫ້ໄປສູ່ສຸກຄະຕິ.

____________

#ຂຽນໂດຍ: ຟ້າ
#ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

#ສົນໃຈລົງໂຄສະນາໄດ້ທີ່:  021 313645, 316511

 

แชร์