ເຜີຍແຜ່ວຽກງານຂັບຂີ່ປອດໄພທ້ອງຖະໜົນ

  ວັນທີ 3 ມີນາ ຜ່ານມາ ຄະນະຊາວໜຸ່ມແຂວງບໍ່ແກ້ວ ຮ່ວມກັບສູນກາງຊາວໜຸ່ມປະຊາຊົນປະຕິວັດລາວໄດ້ຈັດກອງປະຊຸມເຜີຍແຜ່ວຽກງານໄພພິບັດ, ວຽກງານຂັບຂີ່ປອດໄພທ້ອງຖະໜົນ, ວຽກງານບໍລິຈາກເລືອດຕິດພັນກັບວຽກງານຂະບວນການ ປີ 2019-2020 ທີ່ພະແນກໄປສະນີໂທລະຄົມມະນາຄົມ ແລະການສື່ສານແຂວງບໍ່ແກ້ວ ໂດຍໃຫ້ກຽດເຂົ້າຮ່ວມຂອງທ່ານ ສຸລິຍາ ແກ້ວພິລາວົງ ກໍາມະການສູນກາງຊາວໜຸ່ມຫົວໜ້າຂະບວນການຊາວໜຸ່ມ, ທ່ານ ອຸ່ນແສງ ທູນອິນໃຈ ກໍາມະການສູນ ກາງຊາວໜຸ່ມເລຂາຄະນະບໍລິຫານງານຊາວໜຸ່ມແຂວງ, ມີບັນດາຮອງກົມ, ສູນບໍລິຈາກເລືອດແຫ່ງຊາດ ແລະ ເລຂາ, ຮອງເລຂາຊາວໜຸ່ມອ້ອມຂ້າງແຂວງເຂົ້າຮ່ວມ.

 ໃນກອງປະຊຸມທ່ານ ສຸລິຍາ ແກ້ວພິລາວົງ ໄດ້ຍົກໃຫ້ເຫັນເຖິງ ຄວາມສໍາຄັນຂອງວຽກງານຂະບວນການຊາວໜຸ່ມໃນທົ່ວປະເທດ ໂດຍສະເພາະແມ່ນ 5 ເນື້ອໃນ ທີ່ສໍາຄັນຄືຄວາມສໍານຶກກ່ຽວກັບຂະບວນການຂອງຊາວໜຸ່ມປະຊາຊົນປະຕິວັດລາວ, ຄວາມສໍາຄັນຂອງຂະບວນການ, ຫຼັກການສ້າງຂະບວນການ, ເນື້ອໃນ, ລັກສະນະ, ຮູບ ແບບ, ຮູບການ, ວິທີການ ແລະບາດກ້າວການສ້າງຂະບວນການ ແລະວຽກງານຊຸກຍູ້ການຈັດຕັ້ງປະຕິບັດຂໍ້ແຂ່ງຂັນ 4 ບຸກ ຂອງຊາວໜຸ່ມປະຊາຊົນປະຕິວັດລາວ, ຍົກໃຫ້ເຫັນເຖິງການບໍລິຈາກເລືອດຊ່ວຍສັງຄົມຂອງສະມາຊິກຊາວໜຸ່ມຢູ່ບັນດາແຂວງໃນທົ່ວປະເທດ.

 ປະຈຸບັນໜ່ວຍຊາວໜຸ່ມແຂວງ ບໍ່ແກ້ວ ມີ 529 ໜ່ວຍ, ມີ 12 ຮາກຖານ ໄດ້ເປີດຂະບວນການແຂ່ງຂັນ 4 ບຸກແລ້ວ 491 ໜ່ວຍ ໃນນີ້ໄດ້ປະກາດຮັບຮອງ 4 ບຸກ ໄດ້ແລ້ວ 472 ໜ່ວຍ, ໄດ້ຮັບທຸງໄຊນໍາໜ້າໃນການຈັດຕັ້ງປະຕິບັດຂໍ້ແຂ່ງຂັນ 4 ບຸກ ຈໍານວນ 3 ຮາກຖານ 17 ໜ່ວຍ.

   ຕອນທ້າຍກອງປະຊຸມທ່ານ ສຸລິຍາ ແກ້ວພິລາວົງ ກໍາມະການສູນກາງຊາວໜຸ່ມຫົວໜ້າຂະບວນການຍັງໄດ້ເນັ້ນໜັກໃຫ້ສະມາຊິກຊາວໜຸ່ມທຸກສະຫາຍຈົ່ງເປັນສ່ວນ ໜຶ່ງໃນການບູລະນະ ແລະສ້າງສາພັດທະນາປະເທດຊາດເປັນແຂນຂວາຂອງພັກດັ່ງຄໍາເວົ້າທີ່ວ່າ: ປຽບເໝືອນນົກອິນຊີທີ່ບໍ່ຫວັນໄຫວຍ້ານກົວຕໍ່ລົມພາຍຸແດງ.

____________

ໜັງສືພິມເສດຖະກິດ-ສັງຄົມ

แชร์