ໂຮງຮຽນສາທາຄໍາມ່ວນສະຫຼຸບສົກຮຽນ

   ພິທີສະຫຼຸບສົກຮຽນ 2017- 2018 ແລະທິດທາງແຜນການສົກ ປີ 2019 ຂອງໂຮງຮຽນສາທາລະນະສຸກແຂວງຄຳມ່ວນແມ່ນໄດ້ຈັດຂຶ້ນໃນວັນທີ 31  ມັງກອນ 2019 ນີ້ທີ່ຫ້ອງປະຊຸມຂອງໂຮງຮຽນດັ່ງກ່າວ ໂດຍການເຂົ້າຮ່ວມຂອງທ່ານ ດຣ ບຸດທະວົງ ແພງສີສົມບູນຮອງຫົວໜ້າກົມການສຶກສາສາທາລະນະສຸກ,ທ່ານ ດຣ ສົມຈິດ ອຳພິລາວົງ ຮອງຫົວໜ້າພະແນກສາທາລະນະສຸກແຂວງ,ທ່ານ ດຣ ເຂັມພາວັນມະນີວົງອຳນວຍການໂຮງຮຽນສາທາລະນະສຸກແຂວງ, ພ້ອມດ້ວຍບັນດາພາກສ່ວນຕ່າງໆທີ່ກ່ຽວຂ້ອງ, ຕະຫຼອດເຖິງພະນັກງານ ຄູ-ອາຈານ ແລະນັກສຶກສາ ເຂົ້າຮ່ວມ.

 ໃນພິທີຄັ້ງນີ້ທ່ານ ດຣ ສົມເພັດ ສຸວັນນະລາສີຮອງອຳນວຍການໂຮງຮຽນສາທາລະນະສຸກແຂວງໄດ້ສະຫຼຸບຄືນການເຄື່ອນໄຫວຈັດຕັ້ງປະຕິບັດາກນຮຽນ-ການສອນ ໃນໄລຍະຜ່ານມາ ຊຶ່ງທ່ານໄດ້ຍົກໃຫ້ເຫັນໂຮງຮຽນສາທາລະນະສຸກ ແຂວງຄຳມ່ວນເປັນສະຖາບັນການສຶກສາວິຊາຊີບສາທາລະນະສຸກຊຶ່ງມີກົມສຶກສາສາ ທາລະນະສຸກຊີ້ນຳ ດ້ານວິຊາການ ແລະ ອານຸຍາດເປີດຫຼັກສູດການຮຽນ-ການສອນສ່ວນດ້ານການເມືອງ-ແນວຄິດ ແລະ ດ້ານງົບປະມານແມ່ນຂຶ້ນກັບພະ ແນກສາທາລະນະສຸກແຂວງ.ໂຮງຮຽນສາທາລະນະສຸກມີພາລະບົດ ບາດ ແລະໜ້າທີ່ໃນການກໍ່ສ້າງ ແລະພັດທະນາບຸກຄະລາກອນດ້ານສາທາລະນະສຸກເວົ້າລວມ, ເວົ້າສະ ເພາະແມ່ນປະຕິບັດຕາມບົດແນະນຳວ່າດ້ວຍການບໍລິຫານ ແລະການຈັດຕັ້ງປະຕິບັດຂອງສະຖາບັນການສຶກສາສາທາລະນະສຸກລະດັບລຸ່ມມະຫາວິທະຍາໄລຂອງກະຊວງສາທາລະນະສຸກ.ປະຈຸບັນໂຮງຮຽນ ສາທາລະນະສຸກແຂວງຄຳມ່ວນໄດ້ເປີດການຮຽນ-ການສອນ 4 ຫຼັກສູດຄື: ຫຼັກສູດຊັ້ນສູງພະຍາບານ ສາຍກົງ,ຫຼັກສູດຊັ້ນສູງຜະດຸງຄັນສາຍກົງ,ຫຼັກສູດຊັ້ນສູງພະຍາບານຕໍ່ເນື່ອງ ແລະ ຫຼັກສູດຊັ້ນສູງຜະດຸງ ຄັນຕໍ່ເນື່ອງ.ນອກນັ້ນຍັງໄດ້ເຮັດໜ້າທີ່ຝຶກອົບຮົມໃຫ້ບັນດາພະນັກງານສາທາລະນະສຸກຕາມຄວາມຮຽກຮ້ອງຕ້ອງການຂອງສັງຄົມ.

  ດ້ານວຽກງານວິຊາສະເພາະໂດຍປະຕິບັດຕາມແຜນຍຸດທະສາດ ການພັດທະນາສາທາລະນະສຸກຮອດປີ 2020 ໂຮງຮຽນສາທາລະນະສຸກກໍ່ແມ່ນສ່ວນໜຶ່ງທີ່ຮັບຜິດ ຊອບວຽກງານພັດທະນາຊັບພະຍາກອນມະນຸດທີ່ໄດ້ວາງຄາດໝາຍ ຈັດຕັ້ງປະຕິບັດການຮຽນ-ການສອນທັງພາກທິດສະດີ ແລະການຈັດຕັ້ງປະຕິບັດຕົວຈິງຢູ່ໂຮງໝໍ ແຂວງ, ໂຮງໝໍເມືອງ, ສຸກສາລາ ແລະຊຸມຊົນ. ໃນສົກປີ 2017-2018 ມີນັກສຶກສາທັງໝົດ 308 ຄົນ, ຍິງ 267 ຄົນ, ໃນນັ້ນຫັກສູດຊັ້ນສູງພະຍາບານສາຍກົງຈຳ ນວນ 179 ຄົນ, ຍິງ 146 ຄົນ, ຫຼັກສູດຊັ້ນສູງຜະດຸງຄັນສາຍກົງ 80 ຄົນ, ຍິງໝົດ, ຫຼັກສູດຊັ້ນສູງ ສາຍພະຍາບານຕໍ່ເນື່ອງ 30 ຄົນ, ຍິງ 22 ຄົນ ແລະຫຼັກສູດຊັ້ນສູງ ຜະດຸງຄັນສາຍຕໍ່ເນື່ອງ 19 ຄົນ, ຍິງໝົດ.

  ຜົນສຳເລັດຂອງການຈັດຕັ້ງປະຕິບັດການຮຽນ-ການສອນຄະນະອຳນວຍການ, ພະນັກງານຄູ-ອາຈານໄດ້ເອົາໃຈໃສ່ຢ່າງຕັ້ງໜ້າໃນການປະກອບສ່ວນເຂົ້າໃນການຈັດຕັ້ງປະຕິບັດການຮຽນ-ການສອນຕາມໂຄງສ້າງຫຼັກສູດທີ່ກະຊວງສາທາລະນະສຸກໄດ້ກຳນົດອອກໂດຍຕິດພັນກັບຮູບແບບການສຶກສາໃນ 3 ລັກສະນະ ແລະ 5 ຫຼັກມູນຄື:ລັກສະນະຊາດ, ລັກສະນະມະຫາຊົນ, ແລະ ລັກສະນະວິທະຍາສາດ. 5 ຫຼັກມູນຄື: ຄຸນສົມບັດ ສຶກສາ, ປັນຍາສຶກສາ, ສີລະປະສຶກສາ, ພາ ລະສຶກສາ ແລະ ແຮງງານສຶກສາ. ໃນສົກ 2017-2018 ມີນັກສຶກສາສອບເສັງໄດ້ໃບປະກາສະນີຍະບັດຈຳນວນ 74 ຄົນ, ຍິງ 66 ຄົນ, ສຳລັບການສຶກສາ 100%. ໃນພິທີຄັ້ງນີ້ຍັງໄດ້ມອບໃບຍ້ອງຍໍໃຫ້ແກ່ຜູ້ທີ່ມີຜົນງານດີເດັ່ນປະກອບສ່ວນເຂົ້າໃນການຮຽນ.

 

แชร์