ແຂວງເຊກອງ ຈະສູ້ຊົນໃຫ້ຈີດີພີ ບັນລຸ 1,8 ພັນຕື້ກີບ

 ແຂວງເຊກອງຕັ້ງເປົ້າໝາຍ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມໃນປີ 2020 ໂດຍລວມແມ່ນໃຫ້ຂະຫຍາຍຕົວນັບມື້ເພີ່ມຂຶ້ນໃນລະດັບ 8% ຕໍ່ປີ ແລະລວມຍອດຜະລິດຕະພັນພາຍໃນ ຫຼື GDP ໃຫ້ບັນລຸ 1,8 ພັນຕື້ກີບ.

 ຕາມການລາຍງານຂອງທ່ານ ຄໍາປະກອນ ອຸເທນທະປັນຍາ ຮອງຫົວໜ້າພະແນກແຜນການ ແລະ ການລົງທຶນ ແຂວງເຊກອງໃຫ້ຮູ້ ວ່າ: ໃນປີ 2020 ເປັນປີໜຶ່ງທີ່ສຳຄັນ ຊຶ່ງເປັນປີສຸດທ້າຍໃນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ X ຂອງພັກ, ຄັ້ງທີ IX ຂອງອົງຄະນະພັກແຂວງກໍຄືແຜນພັດທະນາເສດຖະກິດ-ສັງຄົມ 5 ປີຄັ້ງທີ VIII (2016-2020)ແລະແຂວງຍັງໄດ້ຖືເອົາວຽກງານ ການພັດທະນາເສດຖະກິດເປັນຈຸດ ໃຈກາງແນໃສ່ສ້າງເສດຖະກິດຂະຫຍາຍຕົວເພື່ອເຮັດໃຫ້ການພັດທະນາມີຄວາມໝັ້ນທ່ຽງ, ຍືນຍົງ ແລະ ຖືກທິດຕິດພັນກັບການພັດທະນາຂົງເຂດວັດທະນະທຳສັງຄົມຢ່າງຕໍ່ເນື່ອງ.

 ໃນນັ້ນດ້ານເສດຖະກິດໃຫ້ຂະຫຍາຍຕົວຢູ່ໃນລະດັບ 8% ຕໍ່ປີ ແລະລວມຍອດຜະລິດຕະພັນພາຍ ໃນໃຫ້ບັນລຸ 1.857 ຕື້ກີບ, ສະເລ່ຍລາຍຮັບຕໍ່ຫົວຄົນໃຫ້ໄດ້ 14,5 ລ້ານກີບ ຫຼື ເທົ່າກັບ 1.791 ໂດ ລາສະຫະລັດ, ໃນນັ້ນຂະແໜງກະ ສິກຳ ແລະປ່າໄມ້ເພີ່ມຂຶ້ນ 6,65% ກວມເອົາ 39,54%; ຂະແໜງ ອຸດສາຫະກຳເພີ່ມຂຶ້ນ 9,70% ກວມເອົາ 23,64% ແລະຂະ ແໜງບໍລິການເພີ່ມຂຶ້ນ 8,40% ກວມເອົາ 36,82% ຂອງ GDP.

 ສ່ວນດ້ານການລົງທຶນຖືເປັນ ໝາກຫົວໄຈຫຼັກຂອງການຊຸກຍູ້ ເຮັດໃຫ້ເສດຖະກິດມີການຂະຫຍາຍຕົວແມ່ນມີຄວາມຕ້ອງການ ຢູ່ປະມານ 745 ຕື້ກີບ ກວມເອົາ 40% ຂອງ GDP ໃນນັ້ນການ ລົງທຶນຈາກງົບປະມານລັດໂດຍ ກົງ 112 ຕື້ກີບ ກວມເອົາ 15%; ທຶນຊ່ວຍເຫຼືອລ້າ ແລະກູ້ຢືມ 112 ຕື້ກີບ ກວມເອົາ15%, ທຶນຂອງ ເອກະຊົນພາຍໃນ ແລະຕ່າງປະເທດ 335 ຕື້ກີບ ກວມເອົາ 45% ແລະທຶນຈາກສິນເຊື່ອທະນາຄານ 186 ຕື້ກີບ ກວມເອົາ 25% ໂດຍ ຈະສຸມໃສ່ການພັດທະນາພື້ນຖານ ໂຄງລ່າງເປັນຕົ້ນເສນັ້ນທາງ, ໄຟ ຟ້າ, ນໍ້າສະອາດ, ຊົນລະປະທານ... ພ້ອມນັ້ນກໍ່ສຸມໃສ່ການເຕົ້າໂຮມ ບ້ານ, ຈັດສັນອາຊີບ ແລະຊຸກຍູ້ ການຜະລິດຈຳນວນໜຶ່ງ ເພື່ອເປັນ ການສ້າງວຽກເຮັດງານທຳ ແລະ ລາຍໄດ້ທີ່ໝັ້ນຄົງໃຫ້ປະຊາຊົນ.

  ແນວໃດກໍຕາມເພື່ອບັນລຸຄາດໝາຍດັ່ງກ່າວທ່ານ ຄໍາປະກອນ ອຸເທນທະປັນຍາ ກ່າວວ່າ: ຄະນະພັກ, ການນຳທຸກຂັ້ນຂອງແຂວງ ຕ້ອງສືບຕໍ່ສຶກສາອົບຮົມການເມືອງ ແນວຄິດພະນັກງານ, ສະມາຊິກ ພັກ ແລະປະຊາຊົນຢ່າງເປັນປົກກະຕິຕໍ່ເນື່ອງເພື່ອໃຫ້ມີຄວາມເປັນເອກະພາບໃນແນວທາງການປະຕິບັດ, ພ້ອມດຽວກັນນີ້ຕ້ອງຕັ້ງໜ້າຜັນຂະຫຍາຍມະຕິກອງປະຊຸມ ໃຫຍ່ຄັ້ງທີ X ຂອງພັກ ໂດຍຕິດ ພັນກັບການປະຕິບັດວຽກງານ 3 ສ້າງ, ທັງນີ້ ເພື່ອສ້າງເງື່ອນໄຂ ໃຫ້ແກ່ການພັດທະນາເສດຖະກິດ-ສັງຄົມ ແລະການແກ້ໄຂຄວາມທຸກຍາກຂອງປະຊາຊົນໃຫ້ດີຂຶ້ນ.

 ເພີ່ມທະວີມາດຕະການເຂັ້ມ ງວດຕໍ່ກັບການປະຕິບັດໂຄງການ ລົງທຶນຂອງລັດ, ການເກັບລາຍຮັບ ເຂົ້າງົບປະມານ, ຍາດແຍ່ງດຶງດູດ ການລົງທຶນຂອງພາກເອກະຊົນ ໃຫ້ເປັນໄປຕາມຄາດໝາຍ ແລະ ແຜນການທີ່ວາງໄວ້ເພື່ອຫັນເອົາແຫຼ່ງທຶນດັ່ງກ່າວເຂົ້າໃສ່ການພັດທະນາເສດຖະກິດ-ສັງຄົມໂດຍສະເພາະການພັດທະນາພື້ນຖານໂຄງ ລ່າງ ແລະສົ່ງເສີມການຜະລິດ ພາຍໃນໃຫ້ແຂງແຮງກວ່າເກົ່າ.

----

ຂ່າວ: ສັນຍາ

แชร์