ນະຄອນຫຼວງພາບາງ ເສຍຫາຍໜັກຈາກພະຍຸລະດູຮ້ອນ

 ວັນທີ 4 ມີນາ 2020 ນີ້ ໄດ້ເກີດມີ ໝາກເຫັບ ແລະລົມພັດແຮງສົມຄວນ ເຂົ້າຕົວເມືອງ ແລະເຂດຊານເມືອງຂອງ ນະຄອນຫຼວງພະບາງ ສົ່ງຜົນເຮັດໃຫ້ຫຼາຍ ພື້ນທີ່ໄດ້ຮັບຜົນກະທົບ ລວມທັງສິ່ງຂອງ ເສຍຫາຍເປັນຈໍານວນຫຼວງຫຼາຍ ແຕ່ໂຊກ ດີບໍ່ມີຜູ້ໃດໄດ້ຮັບບາດເຈັບ ຫຼືເສຍຊີວິດ.

  ລົມພາຍຸລະດູຮ້ອນໄດ້ເລີ່ມພັດຢ່າງ ຮ້າຍແຮງໃນເວລາປະມານ 16:26 ໂມງ ຫຼັງພາຍຸໜີໄປໄດ້ຖິ້ມເສດເຫຼືອຄື ຕົ້ນໄມ້ ຫັກທັບຖົມບ້ານເຮືອນຂອງພໍ່ແມ່ປະຊາຊົນ, ສໍາລັບເຂດມໍລະດົກທີ່ໄດ້ຮັບຄວາມເສຍຫາຍແມ່ນເຂດບ້ານວັດໜອງ, ຄີຣີ ລວມເຖິງບັນດາຮ້ານອາຫານທີ່ຕັ້ງລຽບ ແຄມຂອງແຕ່ບ້ານຄີຣີຮອດເຂດບ້ານ ທາດຫຼວງ ແລະລົດທີ່ຈອດໄວ້ຂ້າງທາງ ໄດ້ຮັບຄວາມເສຍຫາຍຍ້ອນຕົ້ນໄມ້ຫັກ ລົ້ມທັບ, ຫຼັງຄາເຮືອນບາງບ່ອນໄດ້ຮັບຄວາມເສຍຫາຍຫັກພັງລົງ ໂດຍສະເພາະ ແມ່ນຢູ່ເຂດບ້ານເມືອງຂາຍ, ບ້ານອູ້ ທີ່ຕັ້ງ ຢູ່ຫ່າງຈາກເທດສະບານນະຄອນຫຼວງ ພະບາງໄປທາງຕາດກວາງຊີປະມານ 25 ກິໂລແມັດ, ສ່ວນຢູ່ບ້ານວັງເງິນໝໍ້ແປງ ໄຟຟ້າຊັອດ ແລະມີຕົ້ນໄມ້ຫັກທັບສາຍ ໄຟຫຼາຍຈຸດ ແຕ່ພາກສ່ວນກ່ຽວຂ້ອງໄດ້ ລົງແກ້ໄຂໃນເຊົ້າວັນທີ 5 ມີນາ ນີ້ສໍາ ເລັດແລ້ວ ແລະໄດ້ປ່ອຍໄຟຟ້າໃຫ້ປະຊາຊົນຊົມໃຊ້ເປັນປົກກະຕິແລ້ວ.

ສໍາລັບມູນຄ່າຄວາມເສຍຫາຍຄັ້ງນີ້ ທາງພາກສ່ວນທີ່ກ່ຽວຂ້ອງຂອງ ນະຄອນຫຼວງພະບາງກໍາລັງລົງສົມທົບກັບພາກສ່ວນທີ່ໄດ້ຮັບຜົນກະທົບຢູ່ແລ້ວຈະລາຍງານໃຫ້ຊາບຄືນທີ ຫຼັງ.

 -----

ຂ່າວ: ສີສຸວັນ      

แชร์