ປາຖະຄາຖາກຽ່ວກັບການປ້ອງກັນແລະສະກັດກັ້ນພະຍາດ COVID-19

   ຄະນະໂຄສະນາອົບຮົມສູນກາງ ພັກຮ່ວມກັບກະຊວງສາທາລະນະສຸກ ໄດ້ຈັດປາຖະກະຖາກ່ຽວກັບການປ້ອງກັນສະກັດກັ້ນການລະບາດຂອງພະຍາດ ອັກເສບປອດຈາກເຊື້ອຈຸລະໂລກສາຍ ພັນໃໝ່ (COVID-19) ຂຶ້ນວັນທີ 4 ມີນາ 2020 ທີ່ຄະນະໂຄສະນາອົບຮົມສູນກາງພັກເປັນກຽດປາຖະກະຖາຂອງ ທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ມີທ່ານ ຄຳເຈນ ວົງໂພສີ ຮອງຫົວໜ້າຄະນະໂຄສະນາ ອົບຮົມສູນກາງພັກ ແລະຮອງເລຂາຄະນະພັກ ຄະນະພັກພະນັກງານຫຼັກແຫຼ່ງ ຜູ້ທີ່ເຮັດວຽກງານການເມືອງ-ແນວຄິດກະຊວງອົງການສູນກາງແນວລາວສ້າງຊາດອົງການຈັດຕັ້ງ ມະຫາຊົນຂັ້ນສູນກາງນະຄອນຫຼວງ ແລະພາກສ່ວນກ່ຽວຂ້ອງເຂົ້າຮ່ວມ.

 ໃນໂອກາດນີ້ ທ່ານລັດຖະມົນຕີກະຊວງສາທາລະນະສຸກ ໄດ້ຮຽກຮ້ອງໃຫ້ທຸກຄົນ ກໍ່ຄືສັງຄົມເອົາໃຈໃສ່ປະຕິບັດຕາມມາດຕະການປ້ອງກັນ ພ້ອມທັງຮັກສາ ແລະປ້ອງກັນຕົນເອງຢ່າງເອົາໃຈໃສ່ ໂດຍສະເພາະມາດຕະການປ້ອງກັນ ແລະ ຄວບຄຸມຢ່າງຖືກວິທີ ເພາະໃນລະຫວ່າງ ເດືອນມີນາຫາເມສານີ້ ເປັນເດືອນທີ່ມີ ຄວາມສ່ຽງສູງທີ່ຈະເກີດພະຍາດນີ້ ແລະ ອີກຢ່າງໜຶ່ງ ມາເຖິງປະຈຸບັນ ພະຍາດ ດັ່ງກ່າວຍັງບໍ່ທັນມີຢາປິ່ນປົວໂດຍສະເພາະ ແລະພະຍາດນີ້ຍັງໄດ້ສົ່ງຜົນກະທົບ ໃນຫຼາຍໆດ້ານ.

 ນອກຈາກນັ້ນກໍ່ຮຽກຮ້ອງໃຫ້ສື່ມວນຊົນເອົາໃຈໂຄສະນາໂດຍອີງຕາມການໃຫ້ຂໍ້ມູນຄວາມເປັນຈິງຈາກກະຊວງສາທາລະນະສຸກສະໜອງໃຫ້ເພື່ອໃຫ້ສັງຄົມຮັບຮູ້ ແລະເຂົ້າໃຈຢ່າງຖືກຕ້ອງສະເໜີໃຫ້ສັງຄົມຫຼີກເວັ້ນການບໍລິໂພກສື່ທີ່ ບໍ່ເປັນທາງການກໍຄືຂ່າວທີ່ບໍ່ມີຂໍ້ມູນຂ່າວ ຈິງ ຮຽກຮ້ອງໃຫ້ພາກສ່ວນກ່ຽວຂ້ອງຕິດຕາມສະກັດກັ້ນຂ່າວທີ່ບິດເບືອນ ຄວາມເປັນຈິງ ແລະໃຫ້ທຸກພາກສ່ວນນຳເອົາແຈ້ງການໄປຜັນຂະຫຍາຍ ແລະ ຈັດຕັ້ງປະຕິບັດເພື່ອປ້ອງກັນ ແລະຄວບ ຄຸມພະຍາດນີ້.

-------

ໜັງສືພິມເສດຖະກິດ-ສັງຄົມ

แชร์