ຮອງນາຍົກລົງຊຸກຍູ້ການສໍາຫຼວດເສດຖະກິດທົ່ວປະເທດຄັ້ງທີ III ຢູ່ຄໍາມ່ວນ

  ວັນທີ 3 ມີນາ 2020 ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ຫົວໜ້າຄະນະຊີ້ນຳການສຳຫຼວດເສດຖະກິດທົ່ວ ປະເທດ ຄັ້ງທີ III ປີ 2020 ພ້ອມດ້ວຍ ຄະນະໄດ້ລົງຕິດຕາມ ແລະຊຸກຍູ້ການສຳຫຼວດເສດຖະກິດຂອງແຂວງຄຳມ່ວນ ເພື່ອເກັບກຳຂໍ້ມູນກ່ຽວກັບສະພາບການດຳເນີນທຸລະກິດຂອງບັນດາຄົວເຮືອນ ແລະບັນດາຫົວໜ່ວຍທຸລະກິດຕ່າງໆທີ່ກຳລັງດຳເນີນທຸລະກິດໃນ ສປປ ລາວ ໂດຍແບ່ງຕາມຂະແໜງການເສດຖະກິດ, ຮູບແບບການຈັດຕັ້ງຂອງຫົວໜ່ວຍເສດຖະກິດ, ສະພາບແຮງ ງານ,ການຖືບັນຊີ ແລະອັດຕາການຖື ຮຸ້ນພາຍໃນ ແລະຕ່າງປະເທດ ເພື່ອເປັນບ່ອນອີງໃຫ້ແກ່ການຕີລາຄາທ່າອ່ຽງ ການຂະຫຍາຍຕົວທາງດ້ານເສດຖະກິດ ໂດຍລວມຂອງປະເທດ.

ໂອກາດນີ້ ທ່ານຮອງນາຍົກລັດຖະມົນຕີ ພ້ອມຄະນະໄດ້ຮັບຟັງການລາຍ ງານຄວາມຄືບໜ້າຂອງການຈັດຕັ້ງປະຕິບັດວຽກງານການສຳຫຼວດພາຍໃນ ແຂວງ ຈາກທ່ານ ບຸນມີ ພິມມະສອນ ຮອງເຈົ້າແຂວງຄຳມ່ວນ ຫົວໜ້າຄະນະຊີ້ນຳການສຳຫຼວດເສດຖະກິດຂັ້ນແຂວງ ເຊິ່ງໃນນັ້ນແມ່ນໄດ້ສຳເລັດການຄັດ ເລືອກບຸກຄະລາກອນສຳລັບຄູຝຶກ, ນັກກວດກາ ແລະນັກເດີນສຳຫຼວດ ໂດຍມີ ນັກເດີນສຳຫຼວດຈຳນວນ 26 ທ່ານ ແລະນັກກວດກາ 1 ທ່ານ ໃນຈຳນວນ 3.421 ຫົວໜ່ວຍ, ອອກແຈ້ງການຫາຄະນະຊີ້ນຳຂັ້ນເມືອງ, ຫົວໜ້າຫົວໜ່ວຍ ທຸລະກິດ, ຮ້າງຮ້ານ, ໂຮງງານ, ບັນດາ ບ້ານ ເພື່ອອຳນວຍຄວາມສະດວກໃຫ້ ແກ່ນັກເດີນສຳຫຼວດພາກສະໜາມ ແລະ ສຳເລັດການຂຶ້ນແຜນງົບປະມານນຳໃຊ້ ເຂົ້າໃນການສຳຫຼວດ ແລະເບີກຈ່າຍ ໃຫ້ນັກເດີນສຳຫຼວດພາກສະໜາມ ສ່ວນ ໄລຍະການຈັດຕັ້ງປະຕິບັດດຳເນີນການ ສຳຫຼວດແມ່ນເລີ່ມແຕ່ວັນທີ 2-28 ມີນາ 2020 ເອກະພາບກັນໃນຂອບເຂດ ທົ່ວປະເທດ.

  ໂອກາດດຽວກັນທ່ານຮອງນາຍົກ ໄດ້ເນັ້ນໃຫ້ຢຶດໝັ້ນໃນຫຼັກການ, ວິທີການ ແລະຂັ້ນຕອນທີ່ໄດ້ເປັນເອກະພາບບົນ ພື້ນຖານຄວາມຕັດສິນໃຈ ແລະຄວາມ ຮັບຜິດຊອບສູງ, ເອົາໃຈໃສ່ການສ້າງ ແຜນເດີນສຳຫຼວດໃຫ້ຈະແຈ້ງ ພ້ອມທັງ ແຈ້ງໃຫ້ບັນດາຫົວໜ່ວຍໄດ້ຮັບຮູ້ເພື່ອກະກຽມບັນດາເອກະສານທີ່ຈຳເປັນ ເຊັ່ນ: ໃບທະບຽນວິສາຫະກິດ, ໃບເສຍ ພັນທະອາກອນ, ບັນຊີລາຍຮັບ-ລາຍ ຈ່າຍ ແລະອື່ນໆ, ປະຕິບັດລະບອບການລາຍງານໃຫ້ນັກກວດກາ ແລະຫ້ອງການສຳຫຼວດຢ່າງເປັນປະຈຳ ເພື່ອໃຫ້ສາ ມາດກຳໄດ້ບັນຫາ ແລະແກ້ໄຂໄດ້ທັນເວລາ ພ້ອມທັງຮັບປະກັນເກັບກຳທຸກຫົວ ໜ່ວຍ, ສຳພາດທຸກຄຳຖາມ, ບັນທຶກທຸກ ຄຳຕອບຢ່າງຖືກຕ້ອງ ແລະຄົບຖ້ວນ.

  ຈາກນັ້ນບັນດາຄະນະຊີ້ນຳການສຳ ຫຼວດເສດຖະກິດລະດັບຊາດ ແລະລະດັບຂັ້ນແຂວງຄຳມ່ວນ ກໍ່ໄດ້ລົງຕິດຕາມຫົວໜ່ວຍທຸລະກິດບໍລິສັດເອັມຊີເອັສ ມາຍນິງອິນດັສທຣີລາວ ຈຳກັດ ຊຶ່ງ ແມ່ນ ໂຮງງານຂຸດຄົ້ນ ແລະປຸງແຕ່ງຫີນປູນ ຢູ່ບ້ານພີນ ເມືອງທ່າແຂກ.

-------

ຂ່າວ: ກອງຄຳ

แชร์