ນາຍົກຢຽ້ມຢາມກຸ່ມສະຫະກອນສົ່ງເສີມກະສິກໍາຢູ່ເມືອງຫົງສາ

  ໃນວັນທີ 3 ມີນາ 2020 ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍຄະນະໄດ້ເດີນທາງໄປຢ້ຽມຢາມກຸ່ມສະຫະກອນສົ່ງເສີມກະສິກຳ ເມືອງຫົງສາ ແຂວງໄຊຍະບູລີ ຊຶ່ງ ຖືກຕ້ອນຮັບຢ່າງອົບອຸ່ນຈາກທ່ານເຈົ້າ ແຂວງໄຊຍະບູລີ ພ້ອມດ້ວຍຄະນະນຳ ແຂວງ, ເມືອງຫົງສາ, ຄະນະການນຳຂອງ ບໍລິສັດໄຟຟ້າຫົງສາ ແລະປະຊາຊົນບ້ານນາແກ່ນຄຳເຂົ້າຮ່ວມ.

 ໂອກາດນີ້,ທ່ານນາຍົກພ້ອມດ້ວຍຄະນະກໍ່ໄດ້ຮັບຟັງການຜ່ານບົດລາຍງານຂອງກຸ່ມສະຫະກອນໂດຍ ຫຍໍ້ຈາກ ທ່ານ ທອງ ສີມາທອງ ຕາງ ໜ້າກຸ່ມສະຫະກອນສົ່ງເສີມກະສິກຳ. ຊຶ່ງສະຫະກອນດັ່ງກ່າວ, ໄດ້ຮັບການສ້າງຕັ້ງຂຶ້ນວັນທີ 20 ກໍລະກົດ 2018 ມີສະມາຊິກທັງໝົດ 137 ຄອບຄົວ,ໂດຍລວມເອົາ 10 ກຸ່ມອາຊີບຄື: ກຸ່ມຜະລິດກະສິກຳອິນຊີ 3 ກຸ່ມ, ກຸ່ມປຸງແຕ່ງຜົນຜະລິດກະສິກຳ 2 ກຸ່ມ, ກຸ່ມຕັດຫຍິບ 1 ກຸ່ມ, ກຸ່ມລ້ຽງສັດ 2 ກຸ່ມ, ກຸ່ມຫັດຖະກຳ ຈັກສານ 1 ກຸ່ມ ແລະກຸ່ມຮວບຮວມຜົນຜະລິດ 1 ກຸ່ມ ຊຶ່ງມີທຶນໝູນວຽນທັງໝົດ 1,36 ຕື້ກີບ.

 ພ້ອມດຽວກັນນັ້ນ, ທ່ານນາຍົກພ້ອມ ດ້ວຍຄະນະກໍໄດ້ຍ່າງຊົມຜະລິດຕະພັນ ຕ່າງໆທີ່ນຳມາວາງສະແດງ ພ້ອມທັງຊື້ ຜະລິດຕະພັນດັ່ງກ່າວ ເພື່ອສົ່ງເສີມງານ ສີໄມ້ລາຍມື ແລະຫົວຄິດປະດິດສ້າງຂອງ ປະຊາຊົນ.

 ພ້ອມນີ້, ທ່ານຍັງໄດ້ໂອ້ລົມ ແລະເນັ້ນໜັກໃຫ້ກຸ່ມສະຫະກອນຈົ່ງສືບຕໍ່ເອົາໃຈ ໃສ່ຂະຫຍາຍທ່າແຮງຂອງຕົນເປັນຕົ້ນ ແມ່ນການພັດທະນາຂະແໜງກະສິກຳ ໃຫ້ແທດເໝາະກັບສະພາບເງື່ອນໄຂຂອງ ແຕ່ລະດ້ານເຊັ່ນ: ການສົ່ງເສີມການປູກ, ການລ້ຽງ ເພື່ອສະໜອງພືດ, ພັກ, ຊີ້ນ ແລະເຂົ້າໃຫ້ໄດ້ຫຼາຍຂຶ້ນກວ່າເກົ່າແຕ່ກ່ອນອື່ນໝົດຕ້ອງມີການວາງແຜນຢ່າງ ລະອຽດຄັກແນ່ ພ້ອມທັງສ້າງຄອບຄົວ ຕົວແບບໃນການຜະລິດໃຫ້ຫຼາຍໂດຍ ມີການຊ່ວຍເຫຼືອເຊິ່ງກັນ ແລະກັນໃນນັ້ນ, ອໍານາດການປົກຄອງເມືອງ ແລະບໍລິສັດ ກໍ່ຕອ້ງໄດ້ຊີ້ນໍາໃຫ້ທິດທາງໃນການຜະລິດຢ່າງຕໍ່ເນື່ອງ ໂດຍສະເພາະແມ່ນຕ້ອງຊອກໃຫ້ເຫັນສິ່ງທີ່ປະຊາຊົນຍັງຕ້ອງການ ເພື່ອຊອກຫາວິທີໃນການແກ້ໄຂໃຫ້ແກ່ປະຊາຊົນນັບມື້ນັບດີຂຶ້ນເປັນກ້າວໆ.

-----

ຂ່າວ: ກິດຕິສັກ ບົວໄລ

แชร์