ຫຼວງພະບາງເນັ້ນກວດສະພາບເຕັກນິກລົດທຸກປະເພດ

 ເພື່ອຄວາມປອດໄພຂອງການ ໂດຍສານລົດທຸກປະເພດຢູ່ພາຍໃນ ແລະອອກຕ່າງປະເທດ ພະແນກໂຍທາທິການ ແລະຂົນສົ່ງແຂວງຫຼວງພະບາງ ໂດຍສະເພາະຂະແໜງວຽກງານຄຸ້ມຄອງພາຫະນະ ແລະການຂັບຂີ່ ໄດ້ເນັ້ນ ກວດກາດ້ານເຕັກນິກເດັດຂາດ ແລະເຂັ້ມ ງວດ ແນໃສ່ໃຫ້ການເດີນທາງມີຄວາມ ປອດໄພ ແລະເຖິງຈຸດໝາຍ, ຂະນະທີ່ຈໍານວນລົດທົ່ວແຂວງມາຮອດປີ 2019 ເພີ່ມຂຶ້ນ 29,4%.

  ທ່ານ ບຸນຄົງ ສຸກສະຫວັດ ຮອງຫົວໜ້າພະແນກໂຍທາທິການ ແລະຂົນສົ່ງ ແຂວງຫຼວງພະບາງໃຫ້ຮູ້ວ່າງບໍ່ດົນນີ້ວ່າ: ແຂວງຫຼວງພະບາງ ໄດ້ເນັ້ນກວດກາດ້ານເຕັກນິກເດັດຂາດ ແລະເຂັ້ມງວດ ແນໃສ່ໃຫ້ການເດີນທາງ ມີຄວາມປອດໄພ ແລະເຖິງຈຸດໝາຍຂອງ ຜູ້ໂດຍສານ, ຊຶ່ງໃນປະຈຸບັນທົ່ວແຂວງ ມີລົດຂື້ນທະບຽນທັງໝົດ 129.344 ຄັນ, ເພີ່ມຂື້ນ 29,4%, ໄດ້ອອກໃບຂັບຂີ່ທັງໝົດ 38.175 ໃບ, ມີສູນກວດກາເຕັກນິກ 2 ແຫ່ງ, ມີລົດເຂົ້າກວດກາເຕັກນິກທັງໝົດ 25.900 ຄັນ, ມີລົດເຮັດທຸລະກິດຂົນ ສົ່ງທັງໝົດ 3.963 ຄັນ, ໄດ້ຂະຫຍາຍ ຈໍານວນຖ້ຽວແລ່ນລົດໂດຍສານຮ່ວມກັບ 8 ແຂວງ ແລະ1 ນະຄອນ, ຂະຫຍາຍສາຍ ທາງໄປຕ່າງປະເທດຈາກ 2 ສາຍເປັນ 5 ສາຍຄື: ນະຄອນ ຫຼວງພະບາງ-ຮ່າໂນຍ-ນະຄອນເວ້ (ສສ ຫວຽດນາມ), ຊຽງ ຮຸ່ງ ( ສປ.ຈີນ), ຊຽງໃໝ່-ແຂວງເລີຍ (ປະເທດໄທ), ມີສະຖານີຈອດລົດ 15 ແຫ່ງ.

  ທ່ານຍັງໃຫ້ຮູ້ຕື່ມວ່າ: ຜ່ານມາຜູ້ປະກອບການເຮັດທຸລະກິດໂດຍສານຍັງຖື ເບົາຕໍໍ່ການກວດສະພາບເຕັກນິກຂອງລົດ ທີ່ແລ່ນໂດຍສານປະຈໍາສາຍທາງຕ່າງໆ ຍ້ອນຄວາມປະໝາດ ຈຶ່ງເຮັດໃຫ້ເກີດອຸບັດເຫດຕາມທ້ອງຖະໜົນດັ່ງທີ່ເກີດຂື້ນຫຼາຍຄັ້ງໃນທີ່ຜ່ານມາໂດຍສະເພາະແມ່ນເສັ້ນທາງຕັດໃໝ່ແຕ່ກາສີຫາເມືອງນານ ສົ່ງຜົນເຮັດໃຫ້ມີຜູ້ເສຍຊີວິດເປັນຈໍານວນຫຼາຍ ລວມເຖິງຊັບສິນຕ່າງໆ ສະນັ້ນເພື່ອ ຍົກສູງດ້ານຄວາມປອດໄພທາງ ຍທຂ ຈະໄດ້ຊຸກຍູ້ຜູ້ປະກອບການໃຫ້ເອົາໃຈໃສ່ ແລະເປັນເຈົ້າການກວດກາສະພາບເຕັກນິກລົດທຸກປະເພດໃຫ້ເດັກຂາດ ແລະເຂັ້ມ ງວດດ້ານຄຸນນະພາບນັບຈາກນີ້ໄປ.

------------

ຂຽນໂດຍ: ສີສຸວັນ      

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ 

    

 

แชร์