ຮອງນາຍົກຢຽ້ມຢາມໂຮງງານນໍ້າດື່ມແລະນໍ້າກ້ອນໂລມາຄໍາ

ໃນວັນທີ 2 ມີນາ 2020 ທ່ານ ສົມດີ ດວງດີ ຮອງນາຍົກລັດຖະມົນຕີລັດຖະມົນຕີກະຊວງການເງິນຫົວໜ້າຄະນະຊີ້ນຳການສຳຫຼວດລະດັບຊາດພ້ອມດ້ວຍຄະນະ ແລະນັກວິຊາການໄດ້ຢ້ຽມຢາມ, ຕິດຕາມ, ຊີ້ນຳວຽກງານສະຖິຕິຢູ່ໂຮງງານຜະລິດນ້ຳດື່ມ ແລະນ້ຳກ້ອນໂລມາຄຳທີ່ແຂວງສະຫວັນນະເຂດຊຶ່ງມີທ່ານ ເກຍ ອູ໊ສິດທິເດດ ເຈົ້າຂອງໂຮງງານ ພ້ອມດ້ວຍພະນັກງານໃຫ້ການຕ້ອນຮັບຢ່າງອົບອຸ່ນ.

  ການລົງຢ້ຽມຢາມຄັ້ງນີ້ແມ່ນເນື່ອງໂອກາດທີ່ ທ່ານຮອງນາຍົກ ແລະຄະນະເຂົ້າຮ່ວມດຳເນີນກອງປະຊຸມຄະນະຊີ້ນຳເພື່ອຕິດຕາມ ແລະຊຸກຍູ້ການສຳຫຼວດເສດຖະກິດຄັ້ງທີ III ຂອງແຂວງສະຫວັນນະເຂດ ແລະກໍຖືໂອກາດດັ່ງກ່າວລົງສຳຫຼວດຕົວຈິງແລະ ເປີດການສຳຫຼວດຢ່າງເປັນທາງການເປັນຄັ້ງທຳອິດຂອງແຂວງສະຫວັນນະເຂດ ທີ່ໂຮງງານຜະລິດນ້ຳດື່ມ ແລະນ້ຳກ້ອນໂລມາຄຳທັງນີ້ກໍຍ້ອນວ່າໂຮງງານແຫ່ງນີ້ເປັນໜື່ງໃນຫຼາຍໂຮງງານຕົວແບບທົ່ວປະເທດ, ເປັນໂຮງງານຕົວແບບຂອງແຂວງເປັນຂອງຄົນລາວ 100% ທີ່ໃຫ້ຄວາມສຳຄັນ ເນັ້ນເລື່ອງຄຸນນະພາບ ຂອງຜະລິດຕະພັນໄດ້ຮັບໃບຢັ້ງຢືນມາດຕະຖານຢູ່ພາຍໃນ ແລະຕ່າງປະເທດ.

 ສຳລັບໂຮງງານຜະລິດນ້ຳດື່ມ ແລະ ນ້ຳກ້ອນໂລມາຄຳແມ່ນໄດ້ຮັບການສ້າງຕັ້ງຂຶ້ນໃນປີ 1957 ແຕ່ທ່ານ ເກຍ ອູ໊ສິດ ທິເດດໄດ້ກ້າວເຂົ້າມາເປັນເຈົ້າຂອງ ແລະໄດ້ພັດທະນາຍົກລະດັບໃຫ້ເປັນໂຮງ ງານຂະໜາດໃຫຍ່ ແລະທັນສະໄໝຂຶ້ນມາເລື້ອຍໆນັບແຕ່ປີ 1989 ເປັນຕົ້ນມາ ມາຮອດປະຈຸບັນໂຮງງານສາມາດຜະລິດ ນ້ຳດື່ມໄດ້ວັນລະ 4,8 ແສນລິດ ສ່ວນນ້ຳ ກ້ອນແທ່ງ ແລະຫຼອດຜະລິດໄດ້ 240 ໂຕນຕໍ່ວັນ ໂດຍມີພະນັກງານກຳມະກອນ ຫຼາຍຮ້ອຍຄົນນັບເປັນຄົວຄອບຄົວໃຫຍ່ ໂດຍມີເງິນເດືອນພື້ນຖານ ແລະເງິນແຮງ ງານ ປະຕິບັດນະໂຍບາຍເບີກຈ່າຍເງິນເດືອນທຸກໆວັນທີ 1 ຂອງທຸກໆເດືອນ ຊຶ່ງເງິນເດືອນຂອງກຳມະກອນປະມານ 1,5 ລ້ານກີບ ຫາ 3,5 ລ້ານກີບ.

 ສຳລັບການລົງທຶນກໍ່ສ້າງ ແລະຊື້ອຸປະກອນການຜະລິດລວມທັງໝົດ ແລ້ວ 50 ຕື້ກວ່າກີບ ຂະນະທີ່ທ່ານ ເກຍ ອູ໊ສິດທິເດດ ເປີດເຜີຍວ່າ:ກ່ອນໜ້ານີ້ທີ່ຂ້າພະເຈົ້າຈະກ້າວເຂົ້າເປັນນັກທຸລະກິດແມ່ນ ປະກອບອາຊີບເປັນກຳມະກອນ ແລະມີຄວາມ ພາກພູມໃຈທີ່ສຸດ ທີ່ມີທຸລະກິດຫຼາຍຢ່າງເປັນຂອງຕົນເອງຊຶ່ງແຕ່ໃດມາຕົນເອງຍາມໃດກໍມັກສິດໃນຄວາມເປັນເຈົ້າຂອງ ແລະເປົ້າໝາຍຫຼັກການເຮັດທຸລະກິດຂອງຂ້າພະເຈົ້າມັກກັບການຊ່ວຍເຫຼືອສັງຄົມ.

--------

ໜັງສືພິມເສດຖະກິດ-ສັງຄົມ

แชร์