ນວ ຄັດເລືອກນັກຮຽນເກັ່ງກຽມຮ່ວມແຂ່ງຂັນລະດັບຊາດ

 ວັນທີ 27 ກຸມພາ ຜ່ານມາ ທີ່ໂຮງຮຽນມັດທະຍົມປາຍມິດ ຕະພາບວຽງຈັນ-ໂຮ່ຈິມິນ ນະຄອນຫຼວງວຽງຈັນ ພະແນກສຶກສາທິ ການ ແລະກີລານະຄອນຫຼວງ ວຽງຈັນ (ນວ) ໄດ້ຈັດການສອບ ເສັງນັກຮຽນເກັ່ງລະດັບນະຄອນຫຼວງວຽງຈັນ ສົກຮຽນ 2019-2020 ໂດຍເປັນກຽດເຂົ້າຮ່ວມ ແລະຕັດຫົວບົດສອບເສັງຂອງ ທ່ານ ຊົມພູ ແກ້ວປັນຍາ ຫົວໜ້າ ພະແນກສຶກສາທິການ ແລະກີລານະຄອນຫຼວງວຽງຈັນ, ມີທ່ານ ພູທອນ ແສງດາວົງ, ທ່ານ ນາງ ຄໍາຫວັນ ລາຊະຂັນຕີ ຮອງຫົວໜ້າ ພະແນກສຶກສາທິການ ແລະກີລາ, ທ່ານ ບຸນຈັນ ສີສຸກ ຜູ້ອໍານວຍ ການໂຮງຮຽນມັດທະຍົມປາຍມິດຕະພາບວຽງຈັນ-ໂຮ່ຈິມິນ, ພ້ອມດ້ວຍຕາງໜ້າຈາກຫ້ອງການສຶກສາທິການ ແລະກີລາເມືອງ, ຄະນະກໍາມະການ, ຄູນໍາພາ ແລະນ້ອງ ນັກຮຽນເຂົ້າຮ່ວມ.

  ທ່ານ ບຸນທັນ ແສງມະນີ ຫົວໜ້າຂະແໜງສາມັນສຶກສາພະແນກ ສຶກສາທທິການ ແລະກີລາກ່າວ ວ່າ: ການສອບເສັງໃນຄັ້ງນີ້ເພື່ອ ເປັນການຈັດຕັ້ງປະຕິບັດແຜນພັດ ທະນາສຶກສາທິການ ແລະກີລາ ວາງອອກແນໃສ່ຍົກສູງຄຸນນະພາບຂອງການສຶກສາໃຫ້ເທົ່າທຽມ ກັບສາກົນເທື່ອລະກ້າວ, ເພື່ອສ້າງ ຂະບວນການໃຫ້ນັກຮຽນໄດ້ມີໂອ ກາດເຂົ້າຮ່ວມການແຂ່ງຂັນໃນແຕ່ ລະຂັ້ນ, ສົ່ງເສີມການຮຽນ-ການ ສອນຢູ່ໃນສາຍສາມັນສຶກສາ ໂດຍສະເພາະແມ່ນຊັ້ນປະຖົມ ແລະມັດທະຍົມໃນທົ່ວນະຄອນຫຼວງໃຫ້ມີ ບັນຍາກາດຟົດຟື້ນ, ມີລັກສະນະແຂ່ງຂັນເຮັດໃຫ້ຂະບວນການສອນດີ-ຮຽນເກັ່ງ, ຊຶ່ງນອນຢູ່ໃນ 3 ຂໍ້  ແຂງຂັນຂອງກະຊວງສຶກສາທິການ ແລະກີລາວາງອອກປາກົດ ຜົນເປັນຈິງ, ສ້າງໂອກາດໃຫ້ນັກ ຮຽນທີ່ມີພອນສະຫວັນໄດ້ສະແດງ ອອກທາງດ້ານຄວາມຮູ້,  ຄວາມສາມາດ ແລະຫົວຄິດປະດິດສ້າງຂອງ ຕົນເອງ, ທັງນີ້ກໍເພື່ອຈັດການຍ້ອງ ຍໍຊົມເຊີຍຜູ້ບໍລິຫານໂຮງຮຽນທີ່ມີຄວາມຫ້າວຫັນເອົາໃຈໃສ່ການປະຕິບັດໜ້າທີ່ໃນການບໍລິຫານ ໂຮງຮຽນຍ້ອງຍໍຄູ-ອາຈານ ທີ່ເອົາໃຈໃສ່ໃນການສິດສອນ ແລະ ນ້ອງນັກຮຽນທີ່ເອົາໃຈໃສ່ໃນການຮໍ່າຮຽນທັງເປັນການຄັດເລືອກເອົານັກຮຽນທີ່ໄດ້ອັນດັບທີ 1 ເປັນຕົວແທນຂອງນັກຮຽນທົ່ວນະຄອນຫຼວງວຽງຈັນ ເຂົ້າຮ່ວມການສອບເສັງລະດັບຊາດ (ສໍາລັບຊັ້ນມັດທະຍົມ ມ4 ແລະ ມ7).

  ສໍາລັບການສອບເສັງນັກຮຽນ ເກັ່ງຂັ້ນນະຄອນຫຼວງວຽງຈັນ ສົກນີ້, ແມ່ນສອບເສັງວິຊາພາສາລາວ, ຄະນິດສາດ, ໂລກອ້ອມຕົວ (ສໍາ ລັບຊັ້ນ ປ5), ວິຊາພາສາລາວ-ວັນນະຄະດີ, ຄະນິດສາດ, ເຄມີສາດ ແລະຟີຊິກສາດ (ສໍາລັບຊັ້ນມັດທະຍົມ ມ4 ແລະມ7), ໂດຍ ມີນັກສອບເສັງທັງໝົດ 558 ນ້ອງ, ຍິງ 362 ນ້ອງ ຈັດເປັນ 26 ຫ້ອງສອບເສັງທີ່ໂຮງຮຽນ ມ ປາຍ ມິດ ຕະພາບວຽງຈັນ-ໂຮ່ຈິມິນ ໃນນັ້ນ, ຊັ້ນ ປ5 ມີນັກສອບເສັງຈໍານວນ 129 ນ້ອງ, ຍິງ 86 ນ້ອງ ຈັດ ເປັນ 6 ຫ້ອງສອບເສັງ; ຊັ້ນ ມ4 ມີນັກສອບເສັງ ຈໍານວນ 218 ນ້ອງ, ຍິງ 148 ນ້ອງ ຈັດ ເປັນ 10 ຫ້ອງສອບເສັງ, ຊັ້ນ ມ4 ມີນັກສອບເສັງ ຈໍານວນ 211 ນ້ອງ, ຍິງ 133 ນ້ອງ ຈັດເປັນ 10 ຫ້ອງສອບເສັງ.

  ພາຍຫຼັງສໍາເລັດການຈັດຕັ້ງສອບເສັງຄັ້ງນີ້ແລ້ວກໍຈະໄດ້ຄັດເລືອກເອົານ້ອງນັກຮຽນ ມ4 ແລະ ມ7 ເປັນຕົວແທນນັກຮຽນເກັ່ງຂອງນະຄອນຫຼວງວຽງຈັນຈໍານວນ 8 ນ້ອງ (ຊັ້ນ ມ4 ວິຊາລະ 1 ນ້ອງ ລວມ 4 ນ້ອງ ແລະມ7 ວິຊາລະ 1 ນ້ອງ ລວມ 4 ນ້ອງ) ເຂົ້າຮ່ວມການແຂ່ງຂັນລະດັບຊາດທີ່ຈະຈັດຂຶ້ນໃນລະຫວ່າງວັນທີ 17-20 ມີນາ 2020 ທີ່ມະຫາວິທະຍາໄລ ແຫ່ງຊາດ.

--------

ໜັງສືພິມເສດຖະກິດ-ສັງຄົມ

แชร์