ແຂວງສະຫວັນນະເຂດ ມີຜູ້ຕິດເຊື້ອໄຂ້ຍຸງລາຍ 6.396 ກໍລະນີ

 ກອງປະຊຸມຖອດຖອນບົດ ຮຽນການລະບາດພະຍາດໄຂ້ຍຸງ ລາຍ, ໄອໄກ່ ແລະໝາກແດງປີ 2019 ແລະປຶກສາຫາລືແນວ ທາງຄວບຄຸມພະຍາດລະບາດປີ 2020 ໄດ້ຈັດຂຶ້ນໃນວັນທີ 20 ກຸມພາ 2020 ທີ່ສະໂມສອນຫ້ອງວ່າການປົກຄອງແຂວງສະຫວັນນະເຂດໂດຍການໃຫ້ກຽດເຂົ້າຮ່ວມຂອງທ່ານ ສັນຕິພາບ ພົມ ວິຫານເຈົ້າແຂວງສະຫວັນ ນະເຂດ, ທ່ານ ດຣ ບົງສຸວັນ ພັນທະວົງສາ ຫົວໜ້າພະແນກສາທາລະນະສຸກແຂວງ, ມີບັນດາພະແນກ ການອ້ອມຂ້າງແຂວງ, ຕົວແທນຈາກ 14 ເມືອງ 1 ນະຄອນເຂົ້າ ຮ່ວມ.

  ທ່ານ ດຣ ເກດສະພອນ ຍາດ ຕິວົງ ຫົວໜ້າຂະແໜງຄວບຄຸມພະຍາດຕິດຕໍ່ໄດ້ລາຍງານຜົນການ ຕິດຕາມພະຍາດໄຂ້ຍຸງລາຍ ປີ 2019 ໃຫ້ຮູ້ວ່າ: ສປປ ລາວຂອງ ພວກເຮົາມີຜູ້ຕິດເຊື້ອໄຂ້ຍຸງລາຍ 39.090 ກໍລະນີ, ເສຍຊີວິດ 76 ກໍລະນີ, ໃນນີ້ແຂວງສະຫວັນນະເຂດມີຜູ້ຕິດເຊື້ອ 6.396 ກໍລະນີ, ເສຍຊີວີດ 22 ກໍລະນີ, ຮອງຈາກນະຄອນຫຼວງວຽງຈັນທີ່ເສຍຊີວິດ 25 ກໍລະນີ, ເມືອງທີ່ມີຜູ້ເສຍຊີວິດ ຫຼາຍທີ່ສຸດແມ່ນເມືອງອາດສະພອນ 7 ກໍລະນີ, ນະຄອນໄກສອນ 3 ກໍລະນີ ແລະອຸທຸມພອນ 3 ກໍລະນີ, ຜ່ານມາໄຂ້ຍຸງລາຍໄດ້ ເລີ່ມລະບາດແຕ່ທ້າຍເດືອນມີນາ ແກ່ຍາວມາເຖິງເດືອນພະຈິກປີ 2019, ຜູ້ທີ່ຕິດເຊື້ອຫຼາຍທີ່ສຸດ ມີອາຍຸ ສະເລ່ຍ15-49 ປີ ຊຶ່ງສາເຫດທີ່ມີຜູ້ເສຍຊີວິດຫຼາຍຍ້ອນວ່າ ຄອບຄົວ ຫຼື ຄົນເຈັບຖືເບົາປິ່ນປົວ ຢູ່ສະຖານທີ່ອື່ນໃນເວລາ 3-5 ວັນ ກ່ອນຈະໄປໂຮງໝໍ ແຂວງຈຶ່ງເຮັດ ໃຫ້ບໍ່ສາມາດຊ່ວຍເຫຼືອຄົນເຈັບໄດ້ ທັນເວລາເນື່ອງຈາກເຊື້ອພະຍາດມີການແຜ່ລາມເກີນຈະຄວບຄຸມ ໄດ້ຈຶ່ງເຮັດໃຫ້ເສຍຊີວິດ.

  ທ່ານ ກໍລະກັນ ພິຈິດໃຈ ຫົວ ໜ້າກຸ່ມວຽກລະບາດວິທະຍາຂະແໜງຄວບຄຸມພະຍາດຕິດຕໍ່ໄດ້ ຊຶ່ງໃຫ້ຮູ້ວ່າ: ພະຍາດໝາກແດງ ເລີ່ມລະບາດໃນເດືອນສິງຫາປີ 2019 ທີ່ບ້ານແກ້ງຈອງ ໂດຍພົບ ກໍລະນີເບື້ອງຕົ້ນເປັນເດັກຊາຍອາຍຸ 3 ປີ, ມີອາການໄຂ້, ເກີດຕຸ່ມຝື່ນ ແດງ ແລະໄອຈາກນັ້ນ, ພະຍາດກໍ່ໄດ້ແຜ່ລາມໄປເມືອງອື່ນໆ ຊຶ່ງ ມາໃນປະຈຸບັນແຂວງສະຫວັນນະເຂດມີ 6 ເມືອງ ທີ່ມີການແຜ່ລະບາດຂອງພະຍາດໝາກແດງຄື: ເມືອງເຊໂປນ, ນະຄອນໄກສອນ ພົມວິຫານ, ອາດສະພັງທອງ, ໄຊ ບູລີ, ຈຳພອນ ແລະເມືອງພີນ, ສຳ ລັບພະຍາດໄອໄກ່ແມ່ນເລີ່ມລະບາດພາຍໃນເມືອງທ່າປາງທອງ ຊຶ່ງເລີ່ມແຕ່ເດືອນກໍລະກົດປີ 2019 ເປັນຕົ້ນມາໃນນີ້ມີ ບ້ານແດນໂນນ, ສະຕຶງ, ປະຈູ, ແກະ, ໂອຍ ຊຶ່ງມີ ຜູ້ເສຍຊີວິດ 3 ຄົນ ເປັນເດັກນ້ອຍ ອາຍຸບໍ່ເຖິງ1 ປີ.

  ທ່ານ ດຣ ຕຽງຄຳ ປ້ອງວົງສາ ຮອງຫົວໜ້າພະແນກສາທາລະນະສຸກແຂວງໄດ້ໃຫ້ຮູ້ກ່ຽວກັບການປ້ອງກັນ ແລະຄວບຄຸມພະຍາດທັງ 3 ປະເພດນີ້ວ່າ: ພະຍາດ ໄຂ້ຍຸງລາຍແມ່ນໃຫ້ປະຊາຊົນທຸກ ຄົນເປັນເຈົ້າການທຳລາຍແຫຼ່ງ ເພາະພັນຂອງຍຸງລາຍເປັນຕົ້ນ ແມ່ນກະໂປະກະປ໋ອງທີ່ມີນໍ້າຂັງ,ບ່ອນທີ່ຮົກເຮື້ອໂດຍການປະຕິບັດ 5 ປ ຂອງກະຊວງສາທາລະນະສຸກກໍຄືພະແນກສາທາລະນະສຸກ ແຂວງສະຫວັນນະເຂດ ໄດ້ວາງ ອອກຄື: ປິດພາຊະນະເກັບນໍ້າ, ປ່ຽນນໍ້າ, ປ່ອຍປາຫາງນົກຍູງ, ປັບປຸງບໍ່ໃຫ້ມີນໍ້າຂັງ ແລະປະຕິ ບັດເປັນປະຈຳສະນັ້ນເພື່ອບໍ່ໃຫ້ພະຍາດໝາກແດງ ແລະໄອໄກ່ທຸກຄົນຕ້ອງເປັນເຈົ້າການເຝົ້າລະວັງ ແລະຕ້ອງໄດ້ສັກວັກຊິນປ້ອງກັນ, ສ່ວນຜູ້ທີ່ຕິດເຊື້ອ ຫຼື ມີອາການສົງ ໄສຄວນໄປພົບແພດໝໍພ້ອມທັງ ໃສ່ຜ້າປິດປາກມິດຊິດ ເພື່ອບໍ່ໃຫ້ພະຍາດແຜ່ກະຈາຍໄປຫາຄົນອື່ນໄດ້.

-----

ໜັງສືພິມເສດຖະກິດ-ສັງຄົມ

แชร์