ມອບເຂົ້າ 1,108 ໂຕນ ຊ່ວຍປະຊາຊົນຈາກໄພພິບັດຢູ່ສະຫວັນນາເຂດ

 ພິທີມອບ-ຮັບເຂົ້າຊ່ວຍເຫຼືອໃຫ້ປະຊາຊົນຜູ້ທີ່ໄດ້ຮັບຜົນກະທົບຈາກໄພພິບັດປີ 2019 ຢູ່ແຂວງສະຫວັນນະເຂດ,ໄດ້ຈັດຂຶ້ນໃນວັນທີ 27 ກຸມພາຜ່ານມາ ທີ່ສະໂມສອນເມືອງໄຊບູລີ,ໂດຍການເຂົ້າຮ່ວມຂອງ ທ່ານ ໂພໄຊ ໄຊຍະສອນ ຮອງເຈົ້າແຂວງສະຫວັນນະເຂດ, ທ່ານ ນາງ ໃບຄຳ ຂັດຕິຍະຮອງລັດຖະມົນຕີ ກະຊວງແຮງງານ ແລະສະຫວັດດີການ-ສັງຄົມ, ມີບັນດາທ່ານເຈົ້າເມືອງ, ຮອງເຈົ້າເມືອງທີ່ໄດ້ຮັບຜົນກະທົບໃນທົ່ວ ແຂວງ, ຫ້ອງການແຮງງານ ແລະສະຫວັດດີການ-ສັງຄົມເມືອງເຂົ້າຮ່ວມ.

  ໃນການມອບ-ຮັບເຂົ້າຄັ້ງນີ້ປະກອບ ມີເຂົ້າຊ່ວຍເຫຼືອຈາກກະຊວງແຮງງານ ແລະສະຫວັດດີການ-ສັງຄົມຈຳນວນ 1.108 ໂຕນ ມູນຄ່າ 9,9 ຕື້ກວ່າກີບ, ມອບໂດຍທ່ານ ນາງ ໃບຄຳ ຂັດຕິຍະ ແລະຮັບໂດຍ ທ່ານ ໂພໄຊ ໄຊຍະສອນ, ຈາກນັ້ນກໍ່ໄດ້ມອບຕໍ່ໃຫ້ບັນດາເມືອງທີ່ໄດ້ຮັບຜົນກະທົບຈາກໄພພິບັດປີ 2019, ໃນນັ້ນປະກອບດ້ວຍ: ເມືອງໄຊບູລີ 85 ໂຕນ, ເມືອງສອງຄອນ 120 ໂຕນ, ເມືອງຈຳພອນ 130 ໂຕນ, ເມືອງຊົນ ນະບູລີ 80 ໂຕນ, ນະຄອນໄກສອນພົມ ວິຫານ 52 ໂຕນ (ແຮໄວ້ 32 ໂຕນ), ເມືອງອຸທຸມພອນ 20 ໂຕນ, ເມືອງອາດ ສະພັງທອງ 20 ໂຕນ, ເມືອງໄຊພູທອງ 20 ໂຕນ, ເມືອງທ່າປາງທອງ 90 ໂຕນ, ເມືອງວິລະບູລີ 110 ໂຕນ, ເມືອງນອງ 110 ໂຕນ, ເມືອງເຊໂປນ 110 ໂຕນ, ເມືອງພີນ 110 ໂຕນ, ເມືອງພະລານໄຊ 20 ໂຕນແລະເມືອງອາດສະພອນ 30 ໂຕນ, ຊຶ່ງເຂົ້າຈຳນວນດັ່ງກ່າວທາງເມືອງ ກໍ່ຄືຫ້ອງການທີ່ກ່ຽວຂ້ອງຈະໄດ້ ພ້ອມ ກັນແຈກຢາຍໃຫ້ບັນດາຄອບຄົວຜູ້ທີ່ໄດ້ຮັບຜົນກະທົບຈາກໄພພິບັດໃນໄລຍະຜ່ານມາ.

  ໂອກາດດັ່ງກ່າວ ທ່ານ ນາງ ໃບຄຳຂັດຕິຍະກໍ່ໄດ້ພ້ອມກັນມີຄຳເຫັນ ແລະ ໄດ້ເນັ້ນໜັກໃຫ້ທຸກພາກສ່ວນຈົ່ງພ້ອມກັນເອົາໃຈໃສ່ຊ່ວຍເຫຼືອພໍ່ແມ່ປະຊາຊົນ ກໍ່ຄືຄອບຄົວຜູ້ທີ່ໄດ້ຜົນກະທົບໃນການ ແຈກຢາຍເຂົ້າໃນຄັ້ງນີ້ໃຫ້ທົ່ວເຖິງທຸກ ຄອບຄົວ, ເຖິງແມ່ນວ່າມັນຈະບໍ່ທ່ວງທັນ ກັບສະພາບປານໃດກໍ່ຕາມແຕ່ການນຳ ພັກລັດກໍ່ເປັນຫ່ວງເປັນໄຍຕໍ່ຄອບຄົວຜູ້ ທີ່ໄດ້ຮັບຜົນກະທົບໃນປີທີ່ຜ່ານມາ.

ໜັງສືພິມເສດຖະກິດ-ສັງຄົມ

แชร์