ສ້ອມແປງຊົນລະປະທານຮັບປະກັນສະໜອງນໍ້າແກ່ການຜະລິດລະດູແລ້ງ

 ຕາມຂໍ້ມູນລາຍງານຂອງກະຊວງກະສິກໍາ ແລະປ່າໄມ້ ກ່ຽວກັບວຽກຊົນລະປະທານໃຫ້ຮູ້ວ່າ: ຕົວເລກການສະໜອງນໍ້າລະດູແລ້ງ ໃນສົກປີ 2018-2019 ຜ່ານມາ ມີເນື້ອທີ່ທັງໝົດ 159.043 ເຮັກຕາໃນນັ້ນມີເນື້ອທີ່ປູກເຂົ້າ 94.043 ເຮັກຕາ, ປູກພືດ 65.500 ເຮັກຕາ ໃນຈໍານວນ 5.718 ໂຄງການ, ພ້ອມທັງໄດ້ສັງລວມໂຄງການຟື້ນຟູ-ສ້ອມແປງຊົນລະປະທານ 2 ແຂວງພາກກາງ ແລະແຂວງພາກໃຕ້ (ໄລຍະ 1) ທີ່ໄດ້ຮັບຜົນກະທົບຈາກໄພທໍາມະຊາດໃນລະດູຝົນປີ 2019ເພື່ອຮັບປະກັນການສະໜອງນໍ້າໃຫ້ແກ່ເນື້ອທີ່ການຜະລິດລະດູແລ້ງສົກປີ 2019-2020 ມີເນື້ອທີ່ ຫຼັງສ້ອມແປງ31.010ເຮັກຕາ ລວມມູນຄ່າທັງໝົດ 68,11 ຕື້ກີບ, ໄດ້ລົງຊຸກຍູ້ຕິດຕາມການຈັດຕັ້ງປະຕິບັດການກໍ່ສ້າງໂຄງການພັດທະນາພື້ນຖານໂຄງລ່າງກະສິກໍາຕາມ ແລວທາງເສດຖະກິດຕາເວັນອອກ-ຕາເວັນຕົກ ທີ່ແຂວງສະຫວັນນະເຂດ ແລະຕິດຕາມການຈັດຕັ້ງປະຕິບັດການກໍ່ສ້າງໂຄງການຊົນລະປະທານນໍ້າຊານ-ນໍ້າກອນ ເມືອງລ້ອງຊານ ແຂວງ ໄຊສົມບູນ, ພ້ອມລົງຊຸກຍູ້ຕິດຕາມການຜະລິດ,ຕິດຕາມການຈັດຕັ້ງປະຕິບັດແຜນການຟື້ນຟູໄພພິບັດທໍາມະຊາດ ແລະ ແຜນການຊຸກຍູ້ການຜະລິດລະດູແລ້ງ ເປັນຕົ້ນແມ່ນການຜະລິດເຂົ້ານາແຊງ ແລະພືດລະດູແລ້ງປີ 2020 ທັງນໍາເອົາ ລົດໄປຕິດປໍ້າຈັກສູບນໍ້າຢູ່ແຂວງຫຼວງພະບາງ.

  ນອກນັ້ນຍັງໄດ້ແຕ່ງຕັ້ງຄະນະຮັບຜິດຊອບຊີ້ນໍາ ແລະຄະນະລົງເກັບກໍາຂໍ້ມູນແຜນສະໜອງນໍ້າໃນການຜະລິດລະດູແລ້ງ ແລະຜົນກະທົບຈາກໄພນໍ້າຖ້ວມ ເພື່ອເປັນການວາງແຜນການຟື້ນຟູການຜະລິດ, ຕິດຕາມການຜະລິດເຂົ້າໜ້າ ແຊງ ແລະພືດລະດູແລ້ງປີ 2019-2020 ໃນ 17 ແຂວງທົ່ວປະເທດ ແລະໄດ້ລົງຊຸກຍູ້ຕິດຕາມການຟື້ນຟູລະບົບຫົວງານ ຈັກສູບນໍ້າ,ກໍ່ສ້າງລະບົບສົ່ງນໍ້າພ້ອມດ້ວຍອາຄານຕາມຄອງເໝືອງ ແລະລະບົບຄອງລະບາຍ,ໂຄງການຈັກສູບນໍ້າລະຫານໍ້າ 1, 2 ແລະໂພນມ່ວງ ເພື່ອຮັບປະກັນການສະໜອງນໍ້າໃຫ້ແກ່ການຜະລິດທັງ 2 ລະດູ ໃນເນື້ອທີ່ທັງມົດ 1.763 ເຮັກຕາ ທີ່ເມືອງສອງຄອນ, ເມືອງຈໍາ ພອນ ແຂວງສະຫວັນນະເຂດ ແລະໄດ້ ລົງເກັບກໍາຂໍ້ມູນການສໍາຫຼວດອອກ ແບບໂຄງການຊົນລະປະທານ 5 ຈຸດ ໃນ 5 ເມືອງຂອງແຂວງ ອຸດົມໄຊ (ເມືອງ ໄຊ, ນາໝໍ້, ແບງ, ງາ ແລະມືອງຮຸນ) ບ້ວງທຶນ 4 ຕື້ຢວນ.

------

ໜັງສືພິມເສດຖະກິດ-ສັງຄົມ

แชร์