ກອງຄຸ້ມຄອງພາສີ VI ເກັບລາຍຮັບໄດ້ 1.090 ຕື້ກວ່າກີບ

  ກອງຄຸ້ມຄອງພາສີ VI ໄດ້ຈັດກອງປະຊຸມສະຫຼຸບຕີລາຄາການຈັດຕັ້ງປະຕິບັດວຽກງານພາສີປະຈໍາປີ 2019 ໃນຕອນເຊົ້າຂອງວັນທີ 24 ກຸມພາ ຜ່ານມາທີ່ຫ້ອງປະ ຊຸມຂອງກອງຄຸ້ມຄອງພາສີດັ່ງກ່າວໃຫ້ກຽດເປັນປະທານໃນພິທີໂດຍ ທ່ານ ຄໍາມິດ ໄຊອາສາ ຮອງຫົວໜ້າກົມພາສີກະຊວງການເງິນ, ທ່ານ ພົມມະຈັກ ສີພັນດອນ ຫົວໜ້າກອງຄຸ້ມຄອງພາສີ VI, ມີບັນດາພະນັກງານພາຍໃນ ແລະແຂກທີ່ຖືກເຊີນເຂົ້າຮ່ວມ.

 ທ່ານ ພົມມະຈັກ ສີພັນດອນ ກໍ່ໄດ້ລາຍງານຜົນການຈັດຕັ້ງປະຕິບັດວຽກງານວິຊາສະເພາະໃນປີ 2019 ຕໍ່ກອງປະຊຸມຊຶ່ງໃຫ້ຮູ້ວ່າ: ກອງຄຸ້ມຄອງພາສີ VI ມີຂອບ ເຂດການເຄື່ອນໄຫວວຽກງານວິຊາສະເພາະກວມເອົາ 2 ແຂວງ ຄື: ແຂວງສະຫວັນນະເຂດ ແລະແຂວງຄໍາມ່ວນ ຊຶ່ງມີສໍານັກງານໃຫຍ່ຕັ້ງຢູ່ແຂວງສະຫວັນນະເຂດ, ມີດ່ານຊາຍແດນທັງໝົດ 13 ແຫ່ງ, ມີພະນັກງານລັດຖະກອນທັງໝົດ 197 ຄົນ, ຍິງ 46 ຄົນ, ໃນນີ້ແຂວງສະຫວັນນະເຂດມີ 119 ຄົນ ແລະແຂວງຄໍາມ່ວນ 78 ຄົນ.

   ດ້ານວຽກງານການຈັດເກັບລາຍຮັບສາມາດປະຕິບັດໄດ້ 1.090 ຕື້ກວ່າກີບ, ເທົ່າກັບ 90,84% ຂອງແຜນການປີ; ທຽບໃສ່ປີ2018 ເພີ່ມຂຶ້ນ 2,42% ຫຼື ເທົ່າກັບ 25 ຕື້ກວ່າກີບ ໃນນັ້ນ, ແຂວງສະຫວັນນະເຂດ ປະຕິບັດໄດ້ 702 ຕື້ກວ່າກີບ, ເທົ່າກັບ87,51% ແລະ ແຂວງຄໍາມ່ວນປະຕິບັດໄດ້ 388 ຕື້ກວ່າກີບ, ເທົ່າ ກັບ 97,56%, ລາຍຮັບຕົ້ນຕໍແມ່ນໄດ້ຈາກປະເພດນໍ້າມັນເຊື້ອໄຟ, ພາຫະນະຂັບຂີ່, ສິນຄ້ານໍາເຂົ້າ-ສົ່ງອອກ, ຄ່າທໍານຽມ ແລະອື່ນໆ.

ສະໜັບສະໜູນໂດຍ: HONDA

  ຈາກນັ້ນ, ທ່ານ ຄໍາມິດ ໄຊອາສາ ກໍ່ໄດ້ກ່າວໂອ້ລົມໂດຍທ່ານໄດ້ຮຽກຮ້ອງໃຫ້ພະນັກງານພາຍໃນກໍ່ຄືພະນັກງານວິຊາສະເພາະສຸມກໍາລັງເຫື່ອແຮງປະຕິບັດໜ້າທີ່ໆໄດ້ຮັບມອບໝາຍເປັນຕົ້ນແມ່ນການເກັບລາຍຮັບ, ຕິດຕາມກວດກາສິນຄ້ານໍາເຂົ້າ-ສົ່ງອອກ

  ເພື່ອແກ້ໄຂປາກົດການຫຍໍ້ທໍ້ໂດຍສະເພາະແມ່ນການລັກລອບຫຼົບຫຼີກໜີພາສີຕາມເຂດຊາຍແດນເນື່ອງຈາກວ່າດ່ານພາສີຊາຍແດນຈໍານວນໜຶ່ງມີທ່າອ່ຽງການນໍາເຂົ້າສິນຄ້າຫຼຸດລົງ. ດັ່ງນັ້ນ, ພະນັກງານທຸກຊັ້ນຄົນຈົ່ງຕັ້ງໃຈປະຕິບັດໜ້າທີ່ຂອງຕົນເອງຢ່າງສຸດຄວາມສາມາດ, ບໍ່ສວຍໃຊ້ໜ້າທີ່ຕໍາແໜ່ງໃນທາງບໍ່ຖືກຕ້ອງ,ຫຼີກລ້ຽງການສໍ້ລາດບັງຫຼວງເພື່ອເຮັດໃຫ້ເຂດທີ່ຕົນຄຸ້ມຄອງກໍ່ຄືປະເທດຊາດມີລາຍຮັບເພີ່ມຂຶ້ນເພື່ອເສີມຂະຫຍາຍລະບົບເສດຖະກິດຂອງປະເທດໃຫ້ມີຄວາມເຂັ້ມແຂງ.

_______________

#ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

#ສົນໃຈລົງໂຄສະນາໄດ້ທີ່:  021 313645, 316511

 

 

แชร์