ຄຳມ່ວນ ສ້າງບ້ານວັດທະນະທຳ ກວມ 90,15%

 ການສ້າງຄອບຄົວ ແລະບ້ານວັດທະນະທຳຢູ່ແຂວງຄໍາມ່ວນຕາມ 5 ມາດຖານເງື່ອນໄຂໄດ້ປະກອບສ່ວນກະຕຸ້ນສະຕິຮັກຊາດຮັກບ້ານເກີດເມືອງນອນປຸກລະດົມສະຕິຄວາມຕື່ນຕົວເປັນເຈົ້າການປົກປັກຮັກສາມູນເຊື້ອມໍລະດົກວັດທະນະທຳອັນດີງາມຂອງປະຊາຊົນບັນດາເຜົ່າໄວ້ໄດ້ເປັນຢ່າງດີ, ປະກອບສ່ວນຊຸກຍູ້ຂະບວນການຄິດດີທຳດີມີຄວາມຮັບຜິດຊອບສູງໃນຂະບວນການພັດທະນາເສດຖະກິດ-ສັງຄົມໄລຍະຜ່ານມາໃຫ້ບັນລຸຄວາມສຳເລັດຢ່າງໜ້າເພິ່ງພໍໃຈ, ຊຶ່ງປະຈຸບັນທົ່ວແຂວງມີຄອບຄົວວັດທະ ນະທຳທັງໝົດ 73.558 ຄອບຄົວກວມເອົາ 90,88% ແລະບ້ານວັດທະນະທຳມີ 523 ບ້ານ ກວມເອົາ 90,15% ຂອງຈຳນວນບ້ານທັງໝົດ.

ສະໜັບສະໜູນໂດຍ: HONDA

  ອີງຕາມຂໍ້ມູນຈາກແຂວງຄໍາມ່ວນ ໃຫ້ຮູ້ວ່າ: ໃນໄລຍະ 5 ປີຜ່ານ ມາແຂວງຄໍາມ່ວນ ໄດ້ຊຸກຍູ້ການສ້າງຄອບຄົວວັດທະນະທຳຊຶ່ງສາມາດມອບໃບຢັ້ງຢືນເປັນຄອບຄົວວັດທະນະທຳໄດ້ທັງໝົດ 37.940 ຄອບຄົວ, ຮັບຮອງເປັນບ້ານວັດທະນະທຳໄດ້ 207 ບ້ານ,ປະຈຸບັນໃນທົ່ວແຂວງມີຄອບຄົວວັດທະນະທຳທັງໝົດ 73.558 ຄອບ ຄົວກວມເອົາ 90,88% ຂອງຈຳນວນຄອບຄົວທັງໝົດ,ບ້ານວັດທະນະທຳມີ 523 ບ້ານກວມເອົາ 90,15% ສ່ວນວຽກງານອື່ນໆ ໂດຍສະເພາະວຽກງານຄຸ້ມຄອງ ປ້າຍ, ຮ້ານບັນເທີງ, ວຽກງານອະນຸລັກມໍລະດົກ, ສົ່ງເສີມສີລະປະວັດທະນະທຳ, ຫໍພິພິທະພັນ, ຫໍສະໝຸດ ແລະວຽກງານສູນວັດທະນະທຳເດັກກໍ່ໄດ້ຮັບການຈັດຕັ້ງປະຕິບັດມີຜົນສຳເລັດໃນຫຼາຍດ້ານ.

   ສຳລັບທິດທາງແຜນການ 5 ປີໃນຕໍ່ໜ້າແມ່ນຈະສືບຕໍ່ເອົາໃຈໃສ່ຊຸກຍູ້ການສ້າງຄອບຄົວ ແລະ ບ້ານວັດທະນະທຳໃນນັ້ນສູ້ຊົນສ້າງຄອບຄົວວັດທະນະທຳໃຫ້ໄດ້ປີລະ 1.500 ຄອບຄົວຂຶ້ນໄປ ແລະຮັບຮອງເປັນບ້ານວັດທະນະທຳໃຫ້ໄດ້ ຢ່າງໜ້ອຍ 10 ບ້ານຕໍ່ປີ, ສືບຕໍ່ອອກໃບອະນຸຍາດເຄື່ອນໄຫວກິດຈະການບໍລິການຮ້ານອອກແບບ, ຜະລິດ ແລະຕິດຕັ້ງປ້າຍໃນທົ່ວ ແຂວງ, ອະນຸລັກຮັກສາມໍລະດົກ ບັນດາເຜົ່າທາງດ້ານວັດທະນະທຳ,ປະຫວັດສາດ, ທຳມະຊາດເປັນ ຕົ້ນວັດຖຸບູຮານ, ສະຖານບູຮານ, ສະຖານທີ່ປະຫວັດສາດ ແລະ ສະຖານທີ່ທຳມະຊາດທີ່ໂດດເດັ່ນ, ຄົ້ນຄວ້າທາງດ້ານເນື້ອໃນເພື່ອຂຽນປະຫວັດຄວາມເປັນມາຂອງວັດຖຸທີ່ເປັນປະຫວັດສາດເຊັ່ນ: ຮ່ອງ ຮອຍທາງດ້ານປະຫວັດສາດ, ທຳມະຊາດ, ມູນເຊື້ອການດຳລົງຊີວິດ ແລະການຕໍ່ສູ້ຕ່າງໆ ຂອງແຂວງເພື່ອວາງສະແດງຢູ່ໃນຫໍພິພິທະພັນ, ສົ່ງເສີມທາງດ້ານພູມປັນຍາປະດິດແຕ່ງບົດລະຄອນ, ບົດຟ້ອນ, ບົດລຳ, ບົດເພງເພື່ອອະນຸລັກສົ່ງເສີມທາງດ້ານວັດທະນະທຳອັນດີງາມຂອງທ້ອງຖິ່ນ, ເຜີຍແຜ່ຮີດ 12 ຄອງ 14 ປະເພນີອັນດີ ງາມຂອງຊາດລາວໂດຍສະເພາະຂະນົບທຳນຽມ, ການນົບໄຫວ້ ແລະການວາງກິລິຍາມາລະຍາດໃຫ້ກວ້າງຂວາງຂຶ້ນກວ່າເກົ່າ.

_______________

#ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

#ສົນໃຈລົງໂຄສະນາໄດ້ທີ່:  021 313645, 316511

 

แชร์