ຄຳມ່ວນ ສອບເສັງນັກຮຽນເກັ່ງ

 ພິທີສອບເສັງຄັດເລືອກນັກຮຽນເກັ່ງທົ່ວແຂວງຄຳມ່ວນຈັດຂຶ້ນໃນວັນທີ 25 ກຸມພາ ຜ່ານມາທີ່ສູນ ITC ໂດຍການເປັນປະທານຂອງທ່ານ ນັນຕະໄຊ ອິນທະສອນ ຮອງຫົວໜ້າພະແນກສຶກສາທິການ ແລະກີລາແຂວງ, ມີບັນດາຄະນະຮັບຜິດຊອບຈັດການສອບເສັງ, ພະນັກງານຄູ-ອາຈານຕະຫຼອດຮອດນັກຮຽນຊັ້ນ ປ5, ມ4  ແລະມ7 ຈາກໂຮງຮຽນຕ່າງໆ ໃນທົ່ວແຂວງເຂົ້າຮ່ວມ.

ທ່ານ ນັນຕະໄຊ ອິນທະສອນ ກ່າວໃຫ້ຮູ້ວ່າ: ການສອບເສັງນັກຮຽນເກັ່ງສົກປີ 2019-2020 ມີ ນັກຮຽນຊັ້ນ ປ5, ມ4 ແລະ ມ7 ເຂົ້າຮ່ວມສອບເສັງທັງໝົດ 130 ຄົນ ຈາກ 63 ໂຮງຮຽນໃນທົ່ວແຂວງ, ໃນນັ້ນສຳລັບຊັ້ນ ປ5 ແມ່ນຈະສອບເສັງໃນ 3 ວິຊາຄື: ວິຊາພາສາລາວ, ຄະນິດສາດ ແລະ ວິທະຍາສາດສິ່ງແວດລ້ອມ, ສ່ວນ ຊັ້ນ ມ4 ແລະ ມ7 ແມ່ນມີ 5 ວິຊາ ຄື: ພາສາລາວ-ວັນນະຄະດີ, ຄະນິດສາດ, ເຄມີສາດ, ຟີຊິກສາດ ແລະພາສາອັງກິດ, ຈຸດປະສົງໃນການສອບເສັງນັກຮຽນເກັ່ງໃນຄັ້ງນີ້ແມ່ນເພື່ອຄັດເລືອກເອົານັກຮຽນ ຜູ້ທີ່ມີພອນສະຫວັນທີ່ຜ່ານການ ສອບເສັງໃນລະດັບແຂວງກ້າວໄປ ສູ່ການສອບເສັງນັກຮຽນເກັ່ງໃນ ລະດັບຊາດ ແລະເພື່ອຊຸກຍູ້ໃຫ້ເຂົາເຈົ້າໄດ້ຮັບການສົ່ງເສີມໃຫ້ກາຍເປັນຜູ້ທີ່ເກັ່ງທາງດ້ານວິທະຍາສາດເປັນຊັບພະຍາກອນມະນຸດທີ່ສຳຄັນຂອງຊາດເພື່ອພັດທະນາ ປະເທດຊາດໃຫ້ຈະເລີນຮຸ່ງເຮືອງໃນອະນາຄົດ.

-------------

  ສຳລັບບັນດານ້ອງທີ່ຢູ່ໃນການຕິດຕາມຢູ່ຂັ້ນແຂວງແມ່ນໄດ້ສົ່ງເສີມໃຫ້ເຂົາເຈົ້າໄດ້ເຂົ້າຮຽນໃນຫ້ອງຮຽນພອນສະຫວັນເພື່ອໃຫ້ຄູ-ອາຈານໄດ້ຕິດຕາມຊຸກຍູ້ການຮຽນ-ການສອນເປັນພິເສດເພື່ອເປັນແບບຢ່າງເຮັດໃຫ້ນັກຮຽນຜູ້ອື່ນໆໄດ້ປະຕິບັດຕາມໃນການສຶກສາຮໍ່າຮຽນຂອງເຂົາເຈົ້າ, ສ່ວນໃນຂັ້ນເມືອງແມ່ນມີຄະນະຮັບຜິດຊອບລົງຊຸກ ຍູ້ຕິດຕາມ ແລະປະເມີນໃນຂະບວນການໆຮຽນ-ການສອນເພື່ອຕີລາ ຄາວຽກງານການສຶກສາໃຫ້ສາມາດຮູ້ໄດ້ໂຮງຮຽນໃດມີນັກຮຽນພອນສະຫວັນຫຼາຍ ແລະໂຮງຮຽນ ທີ່ມີນັກຮຽນພອນສະຫວັນໜ້ອຍລວມໄປເຖິງການໃຫ້ຄວາມຮ່ວມມືຂອງຄະນະພັດທະນາການສຶກສາຂັ້ນບ້ານ, ອຳນາດການປົກຄອງແຕ່ລະຂັ້ນກ່ຽວກັບການໃຫ້ຄວາມສຳຄັນຕໍ່ການສຶກສາເພື່ອກຳນົດ, ແກ້ໄຂບັນຫາ ແລະປັບປຸງລະບົບການສຶກສາໃຫ້ສອດຄ່ອງກັບສະພາບຕົວຈິງຂອງນັກຮຽນໃນແຕ່ລະທ້ອງຖິ່ນເພື່ອເຮັດໃຫ້ລະບົບການສຶກສາມີການພັດທະນາດີຂຶ້ນເປັນກ້າວໆ.

____________

#ຂຽນໂດຍ: ກອງຄຳ
#ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

#ສົນໃຈລົງໂຄສະນາໄດ້ທີ່:  021 313645, 316511

 

แชร์