ເມືອງທ່າພະບາດເສດຖະກິດຂະຫຍາຍຕົວໃນລະດັບ 5,7%

  ກອງປະຊຸມໃຫຍ່ອົງຄະນະພັກເມືອງທ່າພະບາດຄັ້ງທີ VI ໄດ້ໄຂຂຶ້ນຢ່າງເປັນທາງການໃນວັນທີ 27 ກຸມພາ 2020 ຢູ່ສະໂມສອນໃຫຍ່ເມືອງທ່າພະບາດພາຍໃຕ້ການເປັນປະທານຂອງ ສະຫາຍ ດວງຕາ ມໍລະຄາສຸກ ເລຂາພັກເມືອງເຈົ້າເມືອງທ່າພະບາດ, ເປັນກຽດເຂົ້າຮ່ວມຂອງສະຫາຍ ກອງແກ້ວ ໄຊສົງຄາມ ກຳມະການສູນກາງພັກ ເລຂາຄະນະບໍລິຫານງານພັກແຂວງເຈົ້າແຂວງບໍລິຄຳໄຊ, ມີຜູ້ແທນສົມບູນ 105 ສະຫາຍ, ຍິງ 8 ສະຫາຍ, ແຂກຖືກເຊີນຈາກບັນດາເມືອງ ແລະພະແນກການອ້ອມຂ້າງແຂວງເຂົ້າຮ່ວມ.

  ໃນໂອກາດນີ້ ສະຫາຍ ດວງຕາ ມໍລະຄາສຸກ ໄດ້ຕາງໜ້າໃຫ້ແກ່ອົງ ຄະນະພັກເມືອງ ຂຶ້ນຜ່ານບົດລາຍ ງານການເມືອງທັງສອງພາກ ຊຶ່ງເປັນຜົນງານໃນການຊີ້ນຳ-ນຳພາຂອງອົງຄະນະພັກເມືອງ ທ່າພະບາດຕະຫຼອດໄລຍະ 5 ປີ ຜ່ານມາ (ແຕ່ປີ 2014-2019) ເຫັນວ່າ ໄດ້ສຸມຈິດໃຈຜັນຂະຫຍາຍມະຕິຂອງອົງຄະນະພັກເມືອງຊຸດທີ V ຂອງຕົນຢ່າງຕັ້ງໜ້າ ໂດຍຍົກສູງຄວາມສາມາດນຳພາ, ປັບປຸງ ແບບແຜນວິທີເຮັດວຽກ, ຍຶດໝັ້ນ ແນວທາງປ່ຽນແປງຂອງພັກ, ປົກປັກຮັກສາສະຖຽນລະພາບທາງ ດ້ານການເມືອງ, ພັດທະນາເສດຖະກິດເຂັ້ມແຂງ, ສັງຄົມມີຄວາມສະຫງົບ, ຄຸ້ມຄອງລັດ-ຄຸ້ມຄອງ ສັງຄົມດ້ວຍລະບຽບກົດໝາຍ ຢ່າງໜັກແໜ້ນ ແລະຍຸຕິທຳ, ສາມາດແກ້ໄຂປາກົດການຫຍໍ້ທໍ້ ທາງສັງຄົມ ໄດ້ລົດໜ້ອຍຖອຍລົງ ໂດຍສະເພາະແມ່ນການແກ້ໄຂ 4 ເຖື່ອນ.

  ການພັດທະນາພື້ນຖານໂຄງລ່າງ ກໍ່ມີບາດກ້າວຂະຫຍາຍຕົວຢ່າງຕໍເນື່ອງຄື:ລະບົບຄົມມະນາຄົມ, ໂທລະຄົມມະນາຄົມ ແລະການນຳໃຊ້ໄຟຟ້າກໍໄດ້ເຂົ້າເຖິງພໍ່ແມ່ປະຊາຊົນຢ່າງທົ່ວເຖິງ, ການຜະລິດສະບຽງອາຫານ ສາມາດ ກຸ້ມກິນ, ແຮໄວ້ ແລະຂາຍເປັນສິນຄ້າເຮັດໃຫ້ເສດຖະກິດຂະຫຍາຍຕົວໃນລະດັບສະເລ່ຍ 5,7% ຕໍ່ປີ ແລະລາຍຮັບສະເລ່ຍໄດ້ 1.730 ໂດລາຕໍ່ຄົນຕໍ່ປີ,ປະຈຸບັນຄອບຄົວທຸກຍາກ ແລະອານາຖາຍັງ ເຫຼືອ 0,47%, ຄອບຄົວພັດທະນາ94,95%, ໄດ້ປະເມີນການສ້າງ ເມືອງເປັນຫົວໜ່ວຍເຂັ້ມແຂງຮອບດ້ານຕາມ 5 ດ້ານ ໃນນັ້ນ ສາມາດ ບັນລຸໄດ້ 4 ດ້ານ ແລະສ້າງບ້ານເປັນຫົວໜ່ວຍພັດທະນາ 4 ດ້ານ, ສ້າງຄອບຄົວວັດທະນະທໍາ 94,4%, ບ້ານວັດທະນະທຳ 100%, ປັບປຸງອົງການປົກຄອງ ບ້ານໄປຕາມທິດ 3 ສ້າງ ໄດ້ 100%, ມີສະມາຊິກພັກແຂງກວມ 95,5%, ສ້າງຕັ້ງຄະນະພັກຮາກຖານບ້ານໃຫຍ່ 2 ຮາກຖານ ແລະ ໜ່ວຍພັກປອດໃສເຂັ້ມແຂງໜັກແໜ້ນກວມເອົາ 86,76%.

___________

#ໜັງສືພິມເສດຖະກິດ-ສັງຄົມ

#ສົນໃຈລົງໂຄສະນາໄດ້ທີ່:  021 313645, 316511

แชร์