ອາດສະພອນ ຄາຣາວານທ່ອງທ່ຽວທຳມະຊາດ

 ຄາຣາວານທ່ອງທ່ຽວທຳມະຊາດຂອງເມືອງອາດສະພອນ ແຂວງສະຫວັນນະເຂດ ໄດ້ຈັດຂຶ້ນ ເມື່ອທ້າຍອາທິດຜ່ານມາ ໂດຍການນຳທ່ຽວຂອງທ່ານ ຄຳແພງ ເພັດ ທຸມພອນ ເຈົ້າເມືອງອາດສະພອນ ໂດຍມີບັນດາທ່ານການນຳຂອງ ເມືອງ, ພະນັກງານຫ້ອງການ-ກົມ ກອງອ້ອມຂ້າງເມືອງຕະຫຼອດຮອດ ອຳນາດການປົກຄອງບ້ານ ແລະພໍ່ ແມ່ປະຊາຊົນເຂົ້າຮ່ວມຈຳນວນ 200 ກວ່າຄົນ ເຂົ້າຮ່ວມໃນຂະ ບວນຄັ້ງນີ້.

ຈຸດໝາຍການທ່ອງທ່ຽວຂອງ ຄາຣາວານໃນຄັ້ງນີ້ແມ່ນທ່ຽວຊົມ ທໍາມະຊາດດານຖໍ້າພະ,ດານຫີນສາມເສົ້າ, ດານກະເຕີບ ແລະດານ ຖໍ້າປ່ອງ ເຂດບ້ານສອງຫ້ອງ, ຂະບວນຄາຣາວານທ່ອງທ່ຽວໄດ້ເລີ່ມ ເດີນທາງຈາກເທສະບານເມືອງ ຈາກນັ້ນ, ກໍໄດ້ແວ່ກາບໄຫວ້ພະທາດດອກແກ້ວ ຊຶ່ງເປັນພະທາດ ມິ່ງເມືອງ ແລ້ວກໍເດີນທາງໄປທີ່ ໂຮງຮຽນປະຖົມບ້ານສອງຫ້ອງ ເພື່ອມອບອຸປະກອນການສຶກສາ ໃຫ້ກັບໂຮງຮຽນ ໂດຍມີຄູ-ອາຈານ ແລະນ້ອງນັກຮຽນໃຫ້ການຕ້ອນ ຮັບ.

 ຫຼັງຈາກນັ້ນຂະບວນກໍໄດ້ເດີນ ທາງມຸ້ງໜ້າຂຶ້ນສູ່ດານຖໍ້າພະຊຶ່ງຢູ່ຫ່າງຈາກບ້ານສອງຫ້ອງປະມານ 10 ກວ່າກິໂລແມັດ, ຂະບວນຄາ ຣາວານທ່ອງທ່ຽວຍັງເດີນທາງຕໍ່ດ້ວຍການຍ່າງເປັນໄລຍະທາງ 5-6 ກິໂລແມັດ ເພື່ອທ່ຽວຊົມທຳມະຊາດດານຫີນສາມເສົ້າ, ດານກະເຕີບ ແລະດານຖໍ້າປ່ອງ, ພ້ອມ ທັງຊົມທຳມະຊາດພູຜາປ່າໄມ້ຕາມ ສາຍພູຊ້າງແຫ່ ແລະທິວທັດທຳມະຊາດໃນຊ່ວງລະດູບານໃໝ່ທີ່ສວຍ ງາມ.

ທັງນີ້ກໍເພື່ອເປັນການສົ່ງເສີມ ວຽກງານການທ່ອງທ່ຽວພາຍໃນ ເມືອງໃຫ້ມີບົດບາດເດ່ັນ, ທັງເປັນ ການປູກຈິດສຳນຶກໃຫ້ລູກຫຼານ ແລະພໍ່ແມ່ປະຊາຊົນຮັບເຂົ້າ ແລະ ເຂົ້າໃຈໃນວຽກງານການທ່ອງ ທ່ຽວ, ການບໍລິການ, ອີກທັງຮູ້ຈັກປົກປັກຮັກສາທຳມະຊາດພູຜາປ່າ ໄມ້ ຊຶ່ງເປັນທີ່ຢູ່ຂອງສັດປ່ານາໆ ພັນເພື່ອໃຫ້ຄົງຢູ່ຕະຫຼອດໄປ.

แชร์