ຫັດຖະກຳຈັກສານເປັນອາຊີບໜຶ່ງທີ່ສ້າງລາຍຮັບໃຫ້ປະຊາຊົນ

  ທ່ານ ນາງ ລັດດາວັນ ໄຊຍະບູລີ ຫົວໜ້າກຸ່ມຫັດຖະກຳຈັກສານ ບ້ານແດງດານ ເມືອງລະຄອນເພັງ ແຂວງສາລະວັນ ໃຫ້ຮູ້ວ່າ: ກຸ່ມຂອງພວກເຮົາມີທັງໝົດ 35 ຄອບຄົວ, ກ່ອນຈະມາເຮັດຫັດຖະກຳຈັກສານເປັນຫວາຍແມ່ນເຮັດເປັນແຜ່ນໄມ້ຂາຍແບບພໍໃຜພໍລາວ ປີ 2010 ມາຈົນຮອດ ປີ 2011 ຈຶ່ງໄດ້ມີຊ່ຽວຊານມາຈາກຍີ່ປຸ່ນມາເຫັນແລ້ວກໍ່ໄດ້ມີການແນະນຳວ່າຜະລິດຕະພັນຂອງພວກເຮົານີ້ແມ່ນສາມາດແປຮູບ ຫຼື ປ່ຽນຈາກແຜ່ນໄມ້ມາເປັນຫວາຍແທນເພາະວ່າການເຮັດດ້ວຍຫວາຍ ຈະມີຄວາມສວຍງາມກວ່າ ແລະ ທົນທານກວ່າການເຮັດດ້ວຍໄມ້, ຂາຍກໍ່ໄດ້ລາຄາດີ, ຈາກນັ້ນຈຶ່ງໄດ້ປະສົມປະສານກັນມາແລ້ວກໍ່ ໃຫ້ແຕ່ລະຄົນອອກຄວາມຄິດປະດິດສ້າງລວດລາຍວ່າຈະເຮັດເປັນແບບໃດແດ່ດ້ວຍແນວຄວາມຂອງຕົນເອງປະສົມປະສານກັນໃຫ້ອອກມາມີຫຼາກຫຼາຍຮູບແບບເພື່ອໃຫ້ເໝາະສົມກັບຄວາມຮຽກຮ້ອງຕ້ອງ ການຂອງຜູ້ຊົມໃຊ້ກໍ່ຄືຜູ້ຊື້, ເພາະວ່າຜະລິດຕະພັນທີ່ເຮັດດ້ວຍຫວາຍອາດຈະມີຄວາມສວຍງາມຈົນເປັນທີ່ຕ້ອງການຂອງຕະຫຼາດພາຍໃນ ແລະເປັນສິນຄ້າສົ່ງອອກໄປຕ່າງປະເທດໃນຕໍ່ໜ້າໄດ້, ວັດຖຸດິບທີ່ນຳໃຊ້ໃນການຜະລິດແມ່ນສາມາດຊອກເອງໄດ້, ບາງຄອບຄົວທີ່ຜະລິດຫຼາຍກໍ່ໄດ້ລົງທຶນຊື້ເອົາໃນລາຄາໜຶ່ງໂລ 1.000-1.500 ກີບ, ສິນຄ້າທີ່ຜະລິດມີ: ກໍ້ເຈ້ຍ, ຂັນໃສ່ບາດ, ກະໂຕກໄມ້ ກະໂຕກຫວາຍ, ໂຖດອກໄມ້ ແລະ ອື່ນໆຜະລິດຕະພັນແຕ່ລະອັນແມ່ນ ມີລາຄາແຕກຕ່າງກັນໂດຍເລີ່ມຕົ້ນລາຄາຈະຢູ່ທີ່ 5 ພັນ 1 ແສນກີບ ຫຼື ຖ້າລູກຄ້າສັ່ງນອກເໜືອຈາກທີ່ຜະລິດລາຄາກໍ່ຈະປະມານ 1 ລ້ານກວ່າກີບ,  ໂດຍສະເລ່ຍຄອບຄົວໜຶ່ງມີລາຍຮັບຕໍ່າສຸດປະມານ 5 ແສນກີບ ແລະສູງສຸດ 3 ລ້ານກີບຕໍ່ເດືອນ, ລາຍຮັບດັ່ງກ່າວໄດ້ປະກອບສ່ວນເຮັດໃຫ້ຊີວິດການເປັນຢູ່ຂອງສະມາຊິກມີການພັດທະນາດີຂຶ້ນເທື່ອລະກ້າວ.

  ເມື່ອເປັນແນວນັ້ນບັນດາສະມາຊິກກຸ່ມໄດ້ພາກັນສຸ່ມໃສ່ເຮັດອາຊີບຈັກສານຫວາຍ, ເອົາໃຈໃສ່ຊ່ວຍເຫຼືອເຊິ່ງກັນ ແລະກັນໂດຍສະເພາະແມ່ນດ້ານສີມືກໍ່ໄດ້ມີການສອນກັນ ເພື່ອເຮັດໃຫ້ມີຫຼາກຫຼາຍຜະລິດຕະພັນ, ຫຼາກຫຼາຍລວດ ລາຍທີ່ສວຍງາມໃຫ້ເປັນທີ່ຍອມຮັບຈາກສັງຄົມເຮັດໃຫ້ພໍ່ຄ້າຊາວຂາຍ ແລະຜູ້ຄົນທີ່ມັກຮັກໃນການ ເຮັດຫັດຖະກຳຮູ້ຈັກຜະລິດຕະພັນບ້ານຂອງພວກເຮົາຫຼາຍຂຶ້ນທັງເຮັດໃຫ້ສະມາຊິກໃນກຸ່ມມີລາຍຮັບດີຂຶ້ນກວ່າຜ່ານມາ, ຖ້າຫາກຄອບຄົວໃດຢາກເຂົ້າມາຮ່ວມພວກເຮົາກໍຍິນດີ, ເພາະວ່າໃນຕໍ່ໜ້າແມ່ນຈະໄດ້ຂະຫຍາຍອອກຕື່ມອີກ ແລະ ທາງຫ້ອງການອຸດສາຫະກຳ ແລະ ການຄ້າເມືອງລະຄອນເພັງກໍ່ໄດ້ເອົາໃຈໃສ່ຊຸກຍູ້ສົ່ງເສີມວຽກເຮັດ ງານທຳແກ່ປະຊາຊົນບ້ານແດງດານເພື່ອເຮັດໃຫ້ເຂົາເຈົ້າມີລາຍຮັບເຂົ້າຄອບຄົວແກ້ໄຂຄວາມທຸກຍາກທັງເປັນການຫຼຸດຜ່ອນການໄປອອກແຮງງານຢູ່ຕ່າງປະເທດແບບຜິດກົດໝາຍຊຶ່ງການສົ່ງເສີມດັ່ງກ່າວໄດ້ເລັ່ງໃສ່ສ້າງກຸ່ມຈັກສານຫວາຍເປັນສິນຄ້າ.   

  ທ່ານ ສຸວິນ ບາງວິໄລ ຫົວໜ້າໜ່ວຍງານອຸດສາຫະກຳ ແລະການຄ້າ ເມືອງລະຄອນເພັງ ຮັບຜິດຊອບວຽກງານອຸດສາຫະກຳ-ຫັດຖະກຳໃຫ້ຮູ້ວ່າ: ກຸ່ມຈັກສານຂອງ ບ້ານແດງດານຕັ້ງຂຶ້ນໃນປີ 2010  ມີ 30 ກວ່າຄອບຄົວ ແລະຕໍ່ມາ ໄລຍະໜຶ່ງຄືປີ 2015-2016 ກໍ່ ໄດ້ມີການແຕກກຸ່ມເນື່ອງຈາກບໍ່ມີ ການສະໜັບສະໜູນດ້ານທຶນຮອນ ແລະບໍ່ມີຕະຫຼາດຮອງຮັບ, ແຕ່ ແນວໃດກໍ່ຕາມພາຍຫຼັງມີໂຄງການ SME ເຂົ້າມາສົ່ງເສີມດ້ານທຶນ ຮອນທາງເມືອງຈຶ່ງໄດ້ລົງມາລະ ດົມຄືນເມື່ອປີ 2017-2018 ຜ່ານ ມາ, ນອກຈາກນີ້, ກໍ່ໄດ້ຊອກຕະ ຫຼາດຮອງຮັບ ໂດຍນຳເອົາຜະລິດຕະພັນຂອງປະຊາຊົນໄປເປັນສິນ ຄ້າຂອງເມືອງທັງສົ່ງເສີມໃຫ້ນຳເອົາມາວາງສະແດງໃນງານບຸນສຳຄັນຂອງຊາດໂດຍສະເພາະແມ່ນບຸນພະທາດຫຼວງ, ບຸນວັດພູ ແລະງານວາງສະແດງຕ່າງໆກໍ່ມີການລະດົມໃຫ້ເອົາໄປວາງສະແດງຂາຍເພື່ອເຮັດໃຫ້ສັງຄົມໄດ້ຮັບຮູ້ຜະລິດຕະພັນຈັກສານຫວາຍຂອງປະຊາຊົນບ້ານແດງດານຫຼາຍຂຶ້ນ, ພ້ອມນີ້ກໍໄດ້ຍົກເວັ້ນການເກັບພາສີອາກອນນັບແຕ່ວັດຖຸດິບຮອດການຂາຍຜະລິດຕະພັນແມ່ນບໍ່ໃຫ້ເກັບພາສີ.

  ທ່ານກ່າວຕື່ມວ່າ: ການຈັກສານຫວາຍຂອງປະຊາຊົນບ້ານແດງດານປະຈຸບັນນີ້ມີ 9 ລາຍ ການນັບແຕ່ຂະໜາດນ້ອຍຈົນເຖິງຂະໜາດໃຫຍ່ຄື: ນັບແຕ່ຂັນຕັກບາດຈົນຮອດກະໂຕກ, ພິເສດແມ່ນພາຂວັນແຕ່ງງານຈະມີ 3 ຊັ້ນ, ພາຍຫຼັງໄດ້ລະດົມກັບຄືນມາປະກອບອາຊີບຈັກສານຫວາຍສົ່ງຜົນເຮັດໃຫ້ປະຊາຊົນມີລາຍຮັບທີ່ດີເຂົ້າຄອບ ຄົວໂດຍສະເລ່ຍຄອບຄົວທີ່ມີລາຍຮັບຕໍ່າສຸດຢູ່ທີ່ປະມານ 5 ແສນກີບ (ອີງຕາມການຜະລິດໄດ້ໜ້ອຍຫຼາຍ), ການສົ່ງເສີມດັ່ງກ່າວແມ່ນບໍ່ຢາກໃຫ້ປະຊາຊົນຜູ້ທີ່ບໍ່ມີວຽກເຮັດງານທຳໄປເຮັດວຽກຢູ່ຕ່າງປະເທດທັງເປັນການເຕົ້າໂຮມດຶງດູດເອົາລູກຫຼານທີ່ໄປເຮັດວຽກຢູ່ຕ່າງປະເທດກັບຄືນປະກອບອາຊີບທີ່ໝັ້ນຄົງ.

_______________

#ຂຽນໂດຍ: ຜ. ຜົນບຸນ  
#ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

#ສົນໃຈລົງໂຄສະນາໄດ້ທີ່:  021 313645, 316511

แชร์