ຫຼວງພະບາງ ຝຶກອົບຮົມທິດສະດີການເມືອງ ໃຫ້ຄະນະພັກບ້ານ

  ຊຸດຝຶກອົບຮົມດັ່ງກ່າວໄດ້ຈັດຂຶ້ນໃນວັນທີ 25 ກຸມພາ 2020 ນີ້, ຢູ່ຫ້ອງປະຊຸມໂຮງຮຽນການເມືອງ ແລະການປົກຄອງ ແຂວງຫຼວງພະບາງ ໂດຍມີທ່ານ ຄໍາຫຼ້າ ລຽນປະດິດ ຄະນະປະຈໍາພັກແຂວງຫຼວງພະບາງ, ສະຫາຍ ສົມສັກ ອ່ອນຈັນ ຫົວໜ້າໂຮງຮຽນການເມືອງການປົກຄອງແຂວງຫຼວງພະບາງ, ມີພະນັກງານ, ຄະນະ ພັກຮາກຖານບ້ານ-ນາຍບ້ານ, ຄູສອນ, ນັກຝຶກອົບຮົມພ້ອມດ້ວຍແຂກຖືກເຊີນເຂົ້າຮ່ວມ.

   ທ່ານ ສົມສັກ ອ່ອນຈັນ ກ່າວວ່າ: ການເປີດຝຶກອົບຮົມຫຼັກສູດທິດສະດີການເມືອງ ແລະ ການປົກຄອງໃຫ້ຄະນະພັກຮາກຖານບ້ານ, ນາຍບ້ານຈາກ 4 ເມືອງ ຄື: ເມືອງປາກອູ, ໂພນທອງ, ປາກແຊງ ແລະເມືອງງອຍ ຈະດໍາເນີນໄປເປັນເວລາ 10 ວັນ, ສໍາລັບຫຼັກສູດການຮຽນແບ່ງອອກເປັນ 3 ກຸ່ມຄື: ກຸ່ມທີ 1: ທິດທາງລວມ, ກຸ່ມທີ 2: ວຽກພັກ ແລະກຸ່ມທີ 3: ວຽກງານບໍລິຫານ ແລະການເມືອງການປົກຄອງທັງນີ້ກໍເພື່ອແນໃສ່ສ້າງໃຫ້ຜູ້ເຂົ້າຝຶກອົບຮົມກາຍເປັນຜູ້ທີ່ມີຄວາມຮູ້ກ່ຽວກັບທັດສະ ນະຂອງພັກ; ຍົກສູງທິດສະດີການເມືອງ-ການປົກຄອງ, ປະຕິບັດກົດລະບຽບກົດໝາຍຂອງລັດໃນແຕ່ລະ ໄລຍະ, ກໍ່ສ້າງໃຫ້ນັກຝຶກອົບຮົມກໍາໄດ້ ແລະຮູ້ເລືອກເຟັ້ນເອົາບັນດາຫຼັກມູນທິດສະດີທີ່ກ້າວໜ້າໄປໝູນໃຊ້ໃນການວາງແຜນ ແລະ ປະຕິບັດຍຸດທະສາດພັດທະນາຢ່າງຖືກຕ້ອງ, ສ້າງໃຫ້ຄະນະພັກຮາກຖານຂັ້ນບ້ານ, ອົງການຈັດ ຕັ້ງມະຫາຊົນໃຫ້ມີຄວາມຮູ້ພື້ນຖານທາງດ້ານທິດສະດີການເມືອງ-ການປົກຄອງ, ຍົກສູງໃຫ້ໄດ້ທັດສະນະຫຼັກໝັ້ນຊົນຊັ້ນກໍາມະກອນ, ຖືເອົາບັນດາຫຼັກມູນພື້ນຖານທີ່ມີລັກສະນະຂອງທິດສະດີມາກ-ເລນິນ, ເປັນເຂັມຊີ້ທິດເຍືອງທາງໃນການເຄື່ອນໄຫວປະຕິບັດວຽກງານຕ່າງໆຢູ່ພາຍໃນບ້ານຂອງຕົນເອງ.

 ຕອນທ້າຍພິທີ ທ່ານ ຄຳຫຼ້າ ລຽນປະດິດ ໄດ້ໂອ້ລົມໂດຍໄດ້ເນັ້ນໜັກໃຫ້ຄູອາຈານຜູ້ສອນຕ້ອງເອົາໃຈໃສ່ໃນການຊີ້ນໍາ-ນໍາພາ, ຕິດຕາມ, ກວດກາການຄຸ້ມຄອງບໍລິຫານຊຸດຝຶກອົບຮົມຢ່າງເປັນປົກກະຕິຕໍ່ເນື່ອງ, ຄົ້ນຄວ້າ-ແຕ່ງບົດສອນ, ເນື້ອໃນບົດສອນຕ້ອງຮັບປະກັນທາງທິດສະດີການເມືອງ-ການປົກຄອງ, ມີວິທີການຮຽນທີ່ສອດຄ່ອງ ແລະເໝະສົມເພື່ອເຮັດໃຫ້ການປະຕິບັດໜ້າທີ່ວຽກງານນັບມື້ນັບມີຄຸນນະພາບສູງຂຶ້ນ.

_________________

#ຂຽນໂດຍ: ສີສຸວັນ  
#ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

#ສົນໃຈລົງໂຄສະນາໄດ້ທີ່:  021 313645, 316511

แชร์