ເຈົ້າແຂວງຊີ້ນໍາເມືອງກະລຶມ ໃຫ້ຍົກສູງການພັດທະນາແກ້ໄຂຄວາມທຸກຍາກ

  ທ່ານເຈົ້າແຂວງໆເຊກອງ ໄດ້ກ່າວແນະນຳໃຫ້ການນໍາເມືອງກະລຶມຕ້ອງຖືສໍາຄັນການພັດທະນາເສດຖະກິດ-ສັງຄົມແລະແກ້ໄຂຄວາມທຸກຍາກຂອງປະຊາຊົນເປັນບູລິມະສິດຫຼັກ, ເອົາວຽກງານປ້ອງກັນຊາດ-ປ້ອງກັນຄວາມສະຫງົບເປັນຂອງທົ່ວປວງຊົນ, ສ້າງ ໃຫ້ເມືອງສືບຕໍ່ມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບສຸກ, ປະຊາຊົນມີຄວາມສາມັກຄີປອງດອງ, ຍຸຕິທໍາ ແລະສີວິໄລ.

  ທ່ານ ຄໍາເຜີຍ ບຸດດາວຽງ ເຈົ້າແຂວງໆເຊກອງ ໄດ້ກ່າວມີຄໍາເຫັນໂອ້ລົມ ແລະຊີ້ນໍາຕໍ່ກອງປະຊຸມ ໃຫຍ່ຄັ້ງທີ IX ອົງຄະນະພັກເມືອງກະລຶມໃນອາທິດຜ່ານມາໂດຍທ່ານ ໄດ້ເນັ້ນໜັກໃຫ້ການນໍາເມືອງເອົາ ໃຈໃສ່ວຽກງານສຶກສາອົບຮົມ ການເມືອງ-ນໍາພາແນວຄິດໄປ ພ້ອມໆກັບວຽກງານປ້ອງກັນຊາດ-ປ້ອງກັນຄວາມສະຫງົບໃຫ້ມີ ຄວາມໜັກແໜ້ນ ແລະເຂົ້ມແຂງ, ສືບຕໍ່ຫັນພະນັກງານການນໍາຫຼັກແຫຼ່ງລົງກໍ່ສ້າງຮາກຖານການເມືອງ, ພັດທະນາຊົນນະບົດ ແລະ ສ້າງບ້ານ-ກຸ່ມບ້ານພັດທະນາ ແນໃສ່ແກ້ໄຂຄວາມທຸກຍາກຂອງປະຊາຊົນບັນດາເຜົ່າຢ່າງມີປະສິດທິພາບ, ປະຕິບັດເປົ້າໝາຍສະຫັດສະ ວັດດ້ານການພັດທະນາ, ຊຸກຍູ້ສົ່ງເສີມປະຊາຊົນຜະລິດເປັນສິນຄ້າຕາມທ່າແຮງບົ່ມຊ້ອນ,ຄວາມສາມາດຕົວຈິງຂອງແຕ່ລະທ້ອງຖິ່ນໃຫ້ນັບມື້ກວ້າງຂວາງ ແລະເປັນຂະບວນການຟົດຟື້ນທັງນີ້ກໍເພື່ອແນໃສ່ສ້າງພື້ນຖານເສດຖະກິດໃຫ້ເຂັ້ມແຂງ, ປະຊາຊົນມີອາຊີບທີ່ໝັ້ນຄົງ ແລະມີຊີວິດການເປັນຢູ່ທີ່ດີຂຶ້ນ, ປັບປຸງ,ກໍ່ສ້າງພື້ນຖານໂຄງລ່າງ,ຂະຫຍາຍຕາໜ່າງການສຶກສາໄປສູ່ຊົນນະບົດຫ່າງໄກສອກຫຼີກໃຫ້ໄດ້ທັງປະລິມານ ແລະຄຸນນະພາບເພື່ອເປັນໜໍ່ແໜງຜູ້ສືບທອດທີ່ດີ ແລະມີຄຸນນະພາບໃນອະນາຄົດ.

   ຂະນະດຽວກັນພາກລັດກໍ່ຕ້ອງເອົາໃຈໃສ່ປະຕິບັດໜ້າທີ່ວຽກງານວິຊາການວິຊາສະເພາະຂອງຕົນເປັນຕົ້ນແມ່ນການເກັບລາຍຮັບເຂົ້າງົບປະມານໃຫ້ບັນລຸຕາມແຜນ ການ, ຕ້ານ ແລະແກ້ໄຂປະກົດການຫຍໍ້ທໍ້ຢ່າງເປັນລະບົບ, ມີຂັ້ນຕອນ, ເອົາໃຈໃສ່ປັບປຸງແບບແຜນວິທີນໍາພາ, ແບບແຜນວິທີເຮັດວຽກງານ, ແບບແຜນການບໍລິຫານລັດ ແລະກົງຈັກການຈັດຕັ້ງຢູ່ຂັ້ນຮາກຖານ, ສ້າງບັນດາໜ່ວຍພັກໃຫ້ກາຍເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະເພີ່ມທະວີຄຸນນະພາບການກວດພັກ-ກວດກາລັດໃຫ້ເຂັ້ມງວດ.

   ດ້ານທ່ານ ອໍບົວລາ ອ່ອນມະໄລວົງ ເຈົ້າເມືອງກະລຶມ ກໍໄດ້ລາຍງານສະພາບຈຸດພິເສດ ແລະການປະຕິບັດແຜນພັດທະນາເສດຖະກິດ-ສັງຄົມຂອງເມືອງໃນ 5 ປີ (2015-2019) ຜ່ານມາວ່າ: ເມືອງກະລຶມ ມີເນື້ອທີ່ທັງໝົດ 369.730 ເຮັກຕາ, ມີ 52 ບ້ານ, ມີພົນລະເມືອງ 18.039 ຄົນ, ຍິງ 8.993 ຄົນ, ມີເນື້ອທີ່ການຜະລິດເຂົ້າ 1.266 ເຮັກຕາ, ສະເລ່ຍສະມັດຕະພາບ 2,8 ໂຕນຕໍ່ເຮັກຕາ, ຈັ່ງຫວະການຂະຫຍາຍຕົວຂອງເສດຖະກິດໂດຍສະເລ່ຍຢູ່ໃນລະດັບ 6,54% ຕໍ່ປີ, ສະເລ່ຍລາຍໄດ້ GDP ໃສ່ຫົວຄົນໄດ້ 6 ລ້ານກວ່າກີບຕໍ່ຄົນຕໍ່ປີ, ປະຊາຊົນໄດ້ຊົມໃຊ້ໄຟຟ້າກວມເອົາ 96% ຂອງຄອບ ຄົວທັງໝົດ, ບ້ານທີ່ມີເສັ້ນທາງເຂົ້າເຖິງແລ້ວ 44 ບ້ານ ແລະມີ ຄອບຄົວພົ້ນທຸກ 1.336 ຄອບຄົວ.

_______________

ຂຽນໂດຍ: ສັນຍາ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

ສົນໃຈລົງໂຄສະນາໄດ້ທີ່:  021 313645, 316511

แชร์