ເສດຖະກິດຂອງເມືອງທຸລະຄົມຂະຫຍາຍຕົວ 7,6%

  ຕະຫຼອດໄລຍະ 5 ປີ (2015- 2019), ພາຍໃຕ້ການຊີ້ນຳ-ນຳພາຂອງອົງຄະນະພັກເມືອງທຸລະຄົມທີ່ໄດ້ເອົາໃຈໃສ່ຈັດຕັ້ງປະຕິ ບັດມະຕິກອງປະຊຸມໃຫຍ່ຄັ້ງທີ X ຂອງພັກ, ມະຕິກອງປະຊຸມໃຫຍ່ຄັ້ງທີ V ຂອງອົງຄະນະພັກແຂວງວຽງຈັນ ແລະມະຕິກອງປະຊຸມໃຫຍ່ຄັ້ງທີ VI ຂອງອົງຄະນະພັກເມືອງທຸລະຄົມຢ່າງມີຄວາມຫ້າວ ຫັນ ແລະຮັບຜິດຊອບສູງເຊິ່ງເຮັດໃຫ້ມີຜົນສຳເລັດຢ່າງຮອບດ້ານໂດຍສະເພາະເຮັດໃຫ້ເສດຖະກິດຂະຫຍາຍຕົວຕໍ່ເນື່ອງສະເລ່ຍ 7,6% ຕໍ່ປີ ລວມຍອດຜະລິດຕະພັນພາຍໃນບັນລຸໄດ້ 1 ຕື້ກວ່າກີບ.

  ສະຫາຍ ນາງ ວົງເດືອນ ວັດຕະໂສ ຮັກສາການເຈົ້າເມືອງໆທຸລະຄົມກ່າວລາຍງານການເມືອງຕໍ່ກອງປະຊຸມໃຫຍ່ຜູ້ແທນອົງຄະນະພັກເມືອງທຸລະຄົມຄັ້ງທີ VII ຊຶ່ງຈັດ ຂຶ້ນໃນວັນທີ 24-25 ກຸມພາ 2020 ຢູ່ສະໂມສອນເມືອງດັ່ງກ່າວວ່າ: ຜ່ານການຈັດຕັ້ງປະຕິບັດແຜນພັດ ທະນາເສດຖະກິດ-ສັງຄົມ 5 ປີ ຄັ້ງທີ VI ຂອງເມືອງທຸລະຄົມຜ່ານມາໂດຍໄດ້ນຳໃຊ້ທ່າແຮງດ້ານເສດຖະກິດທີ່ມີຢ່າງຕັ້ງໜ້າດ້ວຍການນຳພາປະຊາຊົນຜະລິດເປັນສິນຄ້າຢ່າງຕໍ່ເນື່ອງຕາມກົນໄກເສດຖະກິດຕະຫຼາດ, ຂະ ຫຍາຍຕາຂ່າຍການບໍລິການໃຫ້ເພີ່ມຂຶ້ນອັນໄດ້ເຮັດໃຫ້ເສດຖະກິດຂອງເມືອງຂະຫຍາຍຕົວຕໍ່ເນື່ອງສະເລ່ຍ7,6% ຕໍ່ປີ,ລວມຍອດຜະລິດຕະພັນພາຍໃນບັນລຸ 1.090 ຕື້ກີບ, ສະເລ່ຍໃສ່ພົນລະເມືອງໄດ້ຜູ້ລະ18,9 ລ້ານກີບ, ສະເລ່ຍເຂົ້າເປືອກໄດ້ຜູ້ລະ 1.193 ກິໂລຕໍ່ຄົນຕໍ່ປີ.

  ໂຄງປະກອບເສດຖະກິດໄດ້ມີການຫັນປ່ຽນໄປຕາມທິດກະສິກຳຕິດພັນກັບອຸດສາຫະກຳ ແລະການບໍລິການຢ່າງຕັ້ງໜ້າຊຶ່ງໄລຍະ 5 ປີຜ່ານມາໄດ້ມີການຫັນປ່ຽນຊຶ່ງ ກະສິກຳຈາກ 57,96% ໃນ 2014 ມາເປັນ 47,33% ໃນປີ 2019, ອຸດສາຫະກຳຈາກ 19,58% ມາເປັນ 24,86% ໃນປີ 2019, ບໍລິການປ່ຽນຈາກ 22,46% ມາເປັນ 27,81% ໃນປີ 2019.

  ອັນພົ້ນເດັ່ນແມ່ນປະຊາຊົນມີການຫັນປ່ຽນຈາກການຜະລິດກະສິກຳແບບຄອງເດີມມາເປັນການຜະລິດເປັນສິນຄ້າເຊັ່ນ: ກຸ່ມລ້ຽງໄກ່ລາດບ້ານບຸ່ງພ້າວ, ການປູກພືດ ພັກເຮືອນຮົ່ມ, ການປູກໝາກແຕງເມລອນຢູ່ບ້ານໄຮ່ຢ່ອນ, ການຜະລິດແນວພັນເຂົ້າຢູ່ບ້ານແຈ້ງ ແລະອື່ນໆ.

  ບັນດາເສັ້ນທາງໄດ້ມີການກໍ່ສ້າງ, ສ້ອມແປງໃຫ້ສາມາດສັນຈອນໄດ້ສະດວກດີ, ປະຊາຊົນໄດ້ຊົມໃຊ້ໄຟຟ້າ 100%, ອັດຕາການຊົມໃຊ້ນໍ້າສະອາດກວມ 97%, ນຳ ໃຊ້ວິດຖ່າຍກວມ 97%,ບັນດາຫົວໜ່ວຍຂຸດຄົ້ນດ້ານແຮ່ໄດ້ຫັນເຂົ້າສູ່ລະບຽບກົດໝາຍຢ່າງເຂັ້ມງວດ,ທຸລະກິດຂະໜາດໜ້ອຍ ແລະຂະໜາດກາງໄດ້ມີການຂະຫຍາຍຕົວຊຶ່ງມີລວມຍອດການຈໍລະຈອນສິນຄ້າພາຍໃນ 316 ຕື້ກວ່າກີບ.

  ດ້ານລາຍຮັບສາມາດເກັບລາຍຮັບເຂົ້າງົບປະມານໄດ້ 23 ຕື້ກວ່າກີບ ທຽບໃສ່ 5 ປີເພີ່ມຂຶ້ນ 10,26%, ລະບົບທະນາຄານສາມາດລະດົມເງິນຝາກໄດ້ 190 ຕື້ກວ່າກີບ, ປ່ອຍສິນເຊື່ອໄດ້ 12 ຕື້ກວ່າກີບ, ສຳຫຼວດ ແລະອອກໃບຕາດິນໄດ້ 3.104 ຕອນ.

_______

ຂຽນໂດຍ: ພູຂອງ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์