ສາລະວັນຫາລືການສຳຫຼວດເສດຖະກິດ

  ກອງປະຊຸມປຶກສາຫາລືກ່ຽວກັບການສຳຫຼວດເສດຖະກິດ ແລະຫົວໜ່ວຍວິສາຫະກິດໄດ້ເປີດຂຶ້ນ ແລະອັດລົງໃນວັນທີ25 ກຸມພາ 2020 ທີ່ຫ້ອງປະຊຸມພະແນກແຜນການ ແລະການລົງທຶນແຂວງໂດຍການເປັນປະທານຂອງ ທ່ານ ວິຊຽນ ນະວິກຸນ ຮອງເຈົ້າແຂວງໆ ສາລະວັນ ຜູ້ຊີ້ນຳວຽກງານເສດຖະກິດ, ທັງແມ່ນຫົວໜ້າຄະນະຊີນຳການສຳຫຼວດເສດຖະກິດ, ໃຫ້ກຽດເຂົ້າຮ່ວມມີຄະນະຊີ້ນຳການເດີນສຳຫຼວດ ແລະພະນັກງານວິຊາການທີ່ກ່ຽວຂ້ອງ.

  ທ່ານ ຄຳກິງ ແກ້ວສຸພັນ ຫົວໜ້າສູນສະຖິຕິທັງແມ່ນຫົວໜ້າຫ້ອງການສຳຫຼວດເສດຖະກິດຂັ້ນແຂວງກໍໄດ້ລາຍງານການຈັດຕັ້ງປະຕິບັດວຽກງານໃນໄລຍະຜ່ານມາ, ເປັນຕົ້ນກໍແມ່ນດ້ານການຈັດຕັ້ງພາຍຫຼັງໄດ້ຮັບຂໍ້ຕົກລົງຂອງນາຍົກລັດຖະມົນຕີສະບັບເລກທີ 37/ນຍ ລົງວັນທີ 24 ພຶດສະພາ 2018 ວ່າດ້ວຍການແຕ່ງຕັ້ງຄະນະຊີ້ນຳລະດັບຊາດການສຳຫຼວດເສດຖະກິດທົ່ວປະເທດຄັ້ງທີ III ປີ 2018 ໃນນາມຫ້ອງການສຳຫຼວດກໍໄດ້ມີການຫ້າງຫາກະກຽມບັນດາເອກະສານຕ່າງທີ່ກ່ຽວຂ້ອງກັບການສຳຫຼວດຊຶ່ງມາຮອດປະຈຸບັນນີ້ແມ່ນໄດ້ສຳເລັດການແຕ່ງຕັ້ງຄະນະຊີ້ນຳການສຳຫຼວດເສດຖະກິດຂັ້ນແຂວງ ແລະຂັ້ນເມືອງ, ໄດ້ສຳເລັດການແບ່ງຄວາມຮັບຜິດ ຊອບໃນຄະນະຊີ້ນຳຂັ້ນແຂວງ ແລະໄດ້ສຳເລັດການແຕ່ງຕັ້ງຫ້ອງການສຳຫຼວດຂັ້ນແຂວງ ແລະຂັ້ນເມືອງ, ການແບ່ງຄວາມຮັບຜິດຊອບພາຍໃນຫ້ອງການສຳຫຼວດຂັ້ນແຂວງ, ພ້ອມທັງສຳເລັດການຈັດກອງປະຊຸມຄະນະຊີ້ນຳການສຳຫຼວດເສດຖະກິດຂັ້ນແຂວງຄັ້ງທີ 1 ແລະ ດ້ານວິຊາການແມ່ນໄດ້ສໍາເລັດການຂຶ້ນບັນຊີຄົວເຮືອນທົ່ວແຂວງ, ການເຂົ້າຮ່ວມຝຶກອົບຮົມຄູຝຶກ, ນັກກວດກາຂັ້ນແຂວງ, ພ້ອມທັງໄດ້ສຳເລັດແຕ່ງຕັ້ງຄູຝຶກ, ນັກກວດກາຂັ້ນແຂວງ ແລະ ນັກເດີນສຳຫຼວດ, ໄດ້ສຳເລັດການກວດກາບັນຊີຫົວໜ່ວຍວິສາຫະກິດຕົວແທນທີ່ເປັນເປົ້າໝາຍຂອງການສຳຫຼວດທົ່ວແຂວງຊຶ່ງມີທັງໝົດ 3.559 ຫົວໜ່ວຍ, ພ້ອມທັງຂຶ້ນແຜນງົບປະມານຕ່າງໆ.

  ທິດທາງຕໍ່ໜ້າສືບຕໍ່ປະຊຸມຄົບຄະນະຊີ້ນຳຂັ້ນແຂວງ ແລະຂັ້ນເມືອງຄັ້ງທີ 2 ໂດຍຕິດພັນກັບການເປີດການສຳຫຼວດທົ່ວແຂວງ ແລະໂຄສະນະເຜີຍແຜ່ເນື້ອໃນຕ່າງໆທີ່ກ່ຽວຂ້ອງກັບການສຳຫຼວດດ້ວຍຫຼາຍຮູບແບບ, ກະກຽມແຈ້ງການຫາຄະນະຊີນຳຂັ້ນເມືອງເພື່ອແຈ້ງຕອບຫາອຳນາດການປົກບ້ານ ແລະ ຫົວໜ່ວຍທຸລະກິດຕ່າງໆ, ພ້ອມທັງສ້າງແຜນດຳເນີນງານແຜນການເຄື່ອນໄຫວນັກເດີນສຳຫຼວດແຕ່ລະເມືອງ, ເພື່ອສະດວກໃນການຕິດຕາມກວດກາ ແລະຈັດແບ່ງອຸປະກອນການສຳຫຼວດເປັນຕົ້ນແມ່ນແທັບເລັດ CAPI, ປ້າຍຄ້ອງຄໍ, ກະເປົ໋າ, ເສື້ອ, ໝວກ, ແບບສອບຖາມ ແລະອື່ນໆທີ່ກ່ຽວຂ້ອງ, ພ້ອມທັງລົງເດີນສຳຫຼວດພາກສະໜາມໃນລະຫວ່າງວັນທີ 1-28 ມີນາ 2020.

________________

ຂຽນໂດຍ: ສິດຕາ ເພັດວົງສາ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

ສົນໃຈລົງໂຄສະນາໄດ້ທີ່:  021 313645, 316511

 

แชร์