ບຸນພະເຫວດປະເພນີທີສີ່ຂອງຊາດລາວ

 ໄລຍະນີ້ຫຼາຍບ້ານຫຼາຍເມືອງໃນທົ່ວປະເທດລ້ວນແຕ່ສືບທອດບຸນປະເພນີທີ່ດີງາມຂອງຊາດລາວເຮົາໂດຍສະເພາະໃນເດືອນ 4 ລາວເຮົານີ້ກໍມີບຸນພະເຫວດຫຼືບຸນມະຫາຊາດຊຶ່ງແມ່ນ 1 ໃນຮີດ 12 ຂອງລາວເຮົາ, ການເຮັດບຸນນີ້ຂຶ້ນກໍເພື່ອລະນຶກເຖິງຊາດໜຶ່ງຂອງພະພຸດທະອົງເກີດມາເປັນພະເຫວດສັນດອນອັນເປັນການໃຊ້ຊາດເທື່ອສຸດທ້າຍຂອງພະອົງ (ເຫວດສັນຕະ) ແລະຄວາມຈິງແລ້ວບຸນນີ້ເປັນບຸນປາງໃຫຍ່ປະຈຳປີ, ມີການຄົບງັນໃຫຍ່ຄຶກຄື້ນທີ່ສຸດ.

  ອີງຕາມຂໍ້ມູນຈາກຄູ່ມືຮີດສິບສອງຄອງສິບສີ່ປະເພນີລາວໃຫ້ຮູ້ວ່າ: ບຸນພະເຫວດ ຫຼືບຸນມະຫາຊາດຄືບຸນທີ່ມີການຟັງເທດເວດສັນຕະລະຊາດົກຊຶ່ງປະກອບໄປດ້ວຍຄາ ຖາພັນຈັດເປັນກັນໄດ້ 13 ກັນເປັນຊາດົກທີ່ໃຫຍ່ຍືດຍາວສຳນວນ ມ່ວນເທດງ່າຍຟັງເຂົ້າໃຈໄດ້ຄວາມຮູ້ຄວາມປະຕິບັດຟັງແລ້ວເກີດສັດທາປາສະທະໃນການທຳບຸນກຸສົນນິຍົມທຳກັນໃນລະຫວ່າງເດືອນ 4 ເຖິງ ເດືອນ 6 ຈະເປັນເດືອນຂຶ້ນ ຫຼື ເດືອນແຮມແລ້ວແຕ່ສະດວກເພາະມີກຳນົດການທຳໃນເດືອນ 4 ຈຶ່ງ ເວົ້າອີກຢ່າງໜຶ່ງວ່າບຸນເດືອນ 4 ຄື ບຸນພະເຫວດນັ້ນເອງ, ຊຶ່ງເປັນບຸນ ທີ່ເຮັດກ່ຽວກັບເລື່ອງລາວພະເຫວດ ສັນດອນ ເລື່ອງການສ້າງປາລະມີຂອງພະພຸດທະເຈົ້າໃນຊາດສຸດ ທ້າຍກ່ອນການຈັດງານຊາວບ້ານຕ້ອງມີການປຶກສາຫາລືກັນຕົກລົງກັນໃຫ້ຮຽບຮ້ອຍກ່ອນເພາະບຸນພະເຫວດເປັນບຸນໃຫຍ່ ແລະມີຫຼາຍຂັ້ນຕອນເຊັ່ນ: ມີການກະກຽມສະຖານທີ່,ການຈັດກັນເທດໃຫ້ຄົບຈຳນວນຜູ້ເທດ, ມີການເຊີນພະອຸປະຄຸດມາ, ບາງແຫ່ງກໍມີການແຫ່ພະເຫວດເຂົ້າເມືອງຢ່າງໃຫຍ່ໂຕ ແລະມີການຟັງເທດຕະຫຼອດວັນເປັນຕົ້ນ.

 ກ່ອນຈະເຮັດບຸນພະເຫວດນີ້ມີເລື່ອງກ່າວໄວ້ໃນໜັງສືມະໄລມື່ນມະໄລແສນວ່າ: ຄັ້ງເມື່ອພະມະໄລຂຶ້ນໄປໄຫວ້ທາດເກດແກ້ວຈຸນລະມະນີໃນຊັ້ນດາວວະດຶງໄດ້ພົບກັບພະອະຣິຍະເມດໄຕ ແລະເພິ່ນກໍໄດ້ຖາມຄວາມເປັນຢູ່ຂອງມະນຸດນຳພະມະໄລວ່າ: ຖ້າຢາກພົບພະອົງຈົ່ງຢ່າໄດ້ຂ້າຕີພໍ່ແມ່, ຢ່າທຳຮ້າຍພະພຸດທະເຈົ້າ, ຢ່າຍຸຍົງໃຫ້ພະຕີກັນ ແລະໃຫ້ອາສາຫະຟັງເທດເລື່ອງສັນຕະຊາດົກໃຫ້ຈົບໃນມື້ດຽວ ”ຍ້ອນແນວນີ້ຊາວບ້ານຈຶ່ງພ້ອມກັນເຮັດບຸນພະເຫວດ.

  ແນວໃດກໍດີກ່ອນຈະເຮັດບຸນພະເຫວດນັ້ນ, ອອກຕົນຍາດໂຍມໄດ້ພາກັນປຸກຜາມ ຫຼືຕູບ, ຕົກແຕ່ງຫໍແຈກ, ທາງເຂົ້າວັດດ້ວຍດອກໄມ້,ຊໍ່ທຸງທັງເນັ່ງຝ້າຍມຸງຄຸນອ້ອມຜາມ ແລະຫໍແຈກຕາມພິທີທາງສາສະໜາພາມ ແລະເມື່ອຮອດມື້ເຮັດບຸນແທ້ພໍຕາເວັນຄ້າຍຊາວບ້ານກໍແຫ່ພະເຫວດ ແລະນາງມະທີໂດຍຊາວບ້ານໄດ້ເລືອກເອົາຜູ້ທີ່ຄົນເຄົາລົບນັບຖືໄວ້ກ່ອນແລ້ວ ຫຼື ເປັນຜູ້ທີ່ມີຄວາມສຳຄັນໃນບ້ານຕາມທີ່ເລືອກໄວ້ກ່ອນແລ້ວ.

_______________

ໜັງສືພິມເສດຖະກິດ-ສັງຄົມ

ສົນໃຈລົງໂຄສະນາໄດ້ທີ່:  021 313645, 316511

แชร์