ຍ້ອງຍໍບຸກຄົນທີ່ມີຜົນງານດີເດັ່ນ

 ພິທີປາຖະກະຖາເລົ່າຄືນມູນເຊື້ອ ແລະປະດັບຫຼຽນໄຊ-ຫຼຽນກາ, ມອບໃບຍ້ອງລັດຖະບານໃຫ້ກັບກົມກອງລວມໝູ່ ແລະບຸກຄົນທີ່ມີຜົນງານດີເດັ່ນເນື່ອງໃນໂອກາດວັນສ້າງຕັ້ງອົງການໄອຍະການປະຊາຊົນຄົບຮອບ 30 ປີ (9 ມັງກອນ 1990-9 ມັງກອນ 2020) ໄດ້ມີຂຶ້ນໃນວັນທີ 25 ກຸມພາ 2020 ທີ່ ອຍກ ແຂວງເຊກອງໂດຍມີທ່ານ ຄໍາພຽມ ບົວລະພາ ຮອງເລຂາພັກແຂວງ; ທ່ານ ນີສອນ ວືອິນຢາວ ຮອງປະທານສະພາປະຊາຊົນແຂວງ, ພ້ອມນີ້ກໍມີຮອງຫົວໜ້າພະແນກ, ຫ້ອງການ, ອົງ ການທຽບເທົ່າ ແລະວິຊາການເຂົ້າຮ່ວມ.

  ໃນພິທີທ່ານ ສົມນິດ ສີລິບຸນລ້ຽງ ຫົວໜ້າອົງການໄອຍະການປະຊາຊົນແຂວງເຊກອງໄດ້ຍົກໃຫ້ເຫັນເຖິງປະຫວັດການກໍາເນີດ ແລະການເຕີບໃຫຍ່ຂະຫຍາຍຕົວໂດຍຕິດພັນກັບວຽກງານປັບປຸງບູລະນະອົງການອໍານາດລັດປະຊາຊົນລາວເປັນກ້າວໆມາ, ໂດຍສະເພາະແມ່ນໝາກຜົນ ແລະ ຜົນງານການເຄື່ອນໄຫວປະຕິບັດໜ້າທີ່ວຽກ ງານຂອງອົງການໄອຍະການປະຊາຊົນແຂວງເຊກອງນັບແຕ່ປີ 1990 ເຖິງປະຈຸບັນ.

  ຈາກນັ້ນ ທ່ານ ຂັນທະລີ ວັນລາເບືອມ ຮອງຫົວໜ້າພະແນກພາຍໃນແຂວງກໍໄດ້ຂຶ້ນຜ່ານລັດຖະດໍາລັດຂອງປະທານປະເທດແຫ່ງ ສປປ ລາວ ສະບັບເລກທີ 391/ປປທ, ລົງວັນທີ 24 ທັນວາ 2019;ດໍາລັດຂອງນາຍົກລັດຖະມົນຕີສະບັບເລກທີ 437/ນຍ, ລົງວັນທີ 13 ທັນວາ 2019 ວ່າດ້ວຍການຍ້ອງຍໍສັນລະເສີນກົມກອງລວມໝູ່ ແລະບຸກຄົນທີ່ມີຜົນງານປະກອບສ່ວນເຂົ້າໃນການພັດທະນາວຽກງານອົງການໄອຍະການຕະຫຼອດໄລຍະ 30 ປີ ຊຶ່ງເປັນການປະກອບສ່ວນສໍາຄັນເຂົ້າໃນການປົກປັກຮັກສາແລະພັດທະນາປະເທດຊາດ, ໃນນີ້ໄດ້ຮັບຫຼຽນໄຊແຮງງານຊັ້ນ I ມີ 1 ທ່ານ; ຫຼຽນໄຊແຮງງານຊັ້ນ II ມີ 2 ທ່ານ; ຫຼຽນໄຊແຮງງານຊັ້ນ III ມີ 6 ທ່ານ; ຫຼຽນການແຮງງານມີ 1 ທ່ານ 2 ກົມກອງ ແລະໃບຍ້ອງຍໍລັດຖະບານມີ 21 ທ່ານ, ຍິງ 8 ທ່ານ.

  ໃນໂອກາດດັ່ງກ່າວ ທ່ານ ຄໍາພຽມ ບົວລະພາ ຮອງເລຂາພັກແຂວງ, ທ່ານ ນີສອນ ວືອິນຢາວ ຮອງປະທານສະພາປະຊາຊົນແຂວງ, ທ່ານ ສົມນິດ ສີລິບຸນລ້ຽງ ຫົວ ໜ້າອົງການໄອຍະການປະຊາຊົນແຂວງ ແລະ ທ່ານ ສໍລະເສີນສັກ ຟອງສານຸວົງ ຮອງຫົວໜ້າອົງການໄອຍະການປະຊາຊົນແຂວງໄດ້ເປັນກຽດຜັດປ່ຽນກັນຂຶ້ນປະດັບຫຼຽນໄຊ-ຫຼຽນກາ ແລະມອບໃບຍ້ອງຍໍຕາມລໍາດັບ.

_____________

ຂຽນໂດຍ: ສັນຍາ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

ສົນໃຈລົງໂຄສະນາໄດ້ທີ່:  021 313645, 316511

 

แชร์