ທາດໜາກໂມ ສະຖານທີ່ທ່ອງທ່ຽວຂອງຫຼວງພະບາງ

  ຫຼວງພະບາງ ຫຼາຍຄົນອາດຮູ້ຈັກໃນນາມເມືອງມໍລະດົກໂລກ ແລະເປັນເມືອງທ່ອງທ່ຽວທີ່ມີຄວາມສວຍງາມທາງດ້ານພູຜາປ່າໄມ້ ແລະ ວັດທະນະທຳເຮືອນຊານບ້ານຊ່ອງທີ່ເປັນເອກະລັກທີ່ຖືບູລະນະຮັກສາໃຫ້ຄົງຄຸນຄ່າໃຫ້ແຂກຕ່າງດ້າວທ້າວຕ່າງແດນໄດ້ເຂົ້າມາທ່ຽວຊົມສຳພັດກັບຄວາມງຽບສະຫງົບ ແລະຄົງຄຸນຄ່າທາງດ້ານວັດທະ ນະທຳອັນດີງາມທີ່ສືບທອດກັນມາແຕ່ດຶກດຳບັນ, ວັດວິຊຸນນະຮາມ ຫຼືວັດທາດໜາກໂມເປັນວັດໜຶ່ງທີ່ມີຄວາມໂດດເດັ່ນ ແລະໜ້າສະດຸດຕໍ່ສາຍຕາຂອງນັກທ່ອງທ່ຽວທີ່ໄດ້ມາພົບເຫັນເປັນຈຸດໜຶ່ງທີ່ສາມາດດຶງດູດນັກທ່ອງທ່ຽວໄດ້ເປັນຢ່າງດີ.

  ວັດວິຊຸນ ຫຼືວັດທາດໜາກໂມເປັນສະຖານທີ່ທ່ອງທ່ຽວໜຶ່ງທີ່ຕັ້ງຢູ່ໃນຕົວເມືອງຫຼວງພະບາງ ມີຄວາມສວຍງາມ ແລະໂດດເດັ່ນຄື: ມີພະທາດໃຫ່ຍຊົງກົມຕັດເຄິ່ງເບິ່ງແລ້ວຄ່າຍຄືໜາກໂມຕ່າງຈາກວັດອື່ນໆ ຊຶ່ງຊາວຫຼວງພະບາງຈະເອີ້ນກັນວ່າທາດໜາກໂມ (ທາດປະທຸມ) ໂດຍມະເຫສີ (ເມຍ) ຂອງພະເຈົ້າວິຊຸນນະຣາດເປັນຜູ້ນຳພາໃນການສ້າງ, ວັດວິຊຸນນະຣາດແມ່ນວັດທີ່ເກົ່າແກ່ທີ່ສຸດຂອງ ເມືອງຫຼວງພະບາງ ອາຍຸໄດ້ 500 ກວ່າປີ ຊຶ່ງສ້າງຂຶ້ນໃນໄລຍະຊຸມປີ ຄສ 1500 ແຕ່ພໍມາເຖິງປີ ຄສ

1800 ບັນດາພວກໂຈນທຸງດໍາທະຫານຂ້າເສີກຂອງຫໍ້ (ຈີນ) ໄດ້ເຂົ້າມາຮຸກຮານເຮັດໃຫ້ສະຖານທີ່ນີ້ຖືກທຳລາຍເປັນບາງສ່ວນຈົນມາເຖິງປີ ຄສ 1898 ຈຶ່ງໄດ້ມີການບູລະນະປະຕິສັງຂອນຄືນໃໝ່ ແລະໄດ້ອັນເຊີນພະບາງມາປະຕິສັນຖານໃນວັດແຫ່ງນີ້, ເອກະລັກຂອງວັດດັ່ງກ່າວແມ່ນສັງເກດເຫັນໄດ້ຈາກປະຕູໄມ້ທີ່ມີການຄວັດລວດ ລາຍຢ່າງສວຍງາມ ແລະ ປ່ອງຢ້ຽມທີ່ເປັນສະຖາປັດຍະກໍາ ແບບຂອມ, ທີ່ບໍ່ມີວັດແຫ່ງໃດຄື ເພາະໄດ້ເອົາແບບມາຈາກວັດພູຈຳ ປາສັກ ທີ່ຕັ້ງຢູ່ພາກໃຕ້ຂອງລາວ, ສ່ວນທາງດ້ານໃນຂອງວັດແຫ່ງນີ້ ແມ່ນມີພະພຸດທະຮູບທີ່ເກົ່າແກ່ ແລະ ຫີນສິລາຈາລຶກຮູບແບບຕ່າງໆເປັນຈຳນວນຫຼວງຫຼາຍ, ມາເຖິງປີ ຄສ 1942 ວັດແຫ່ງນີ້ກໍຖືກນຳໃຊ້ໃຫ້ເປັນພິພິຕະພັນສີລະປະທາງດ້ານສາດສະໜາ ແລະສະຖານທີ່ປະດິດສະຖານຂອງພະພຸດທະຮູບຄຳ ແລະ ວັດຖຸບູຮານອື່ນໆ.

  ວັດວິຊຸນ ຫຼືວັດທາດໜາກໂມຖືເປັນສະຖານທີ່ແຫ່ງໜຶ່ງນັກທ່ອງທ່ຽວໃຫ້ຄວາມສົນໃຈດ້ວຍສະພາບບັນຍາກາດທີ່ງຽບສະຫງົບ ແລະຍັງເປັນບ່ອນທີ່ຊາວຫຼວງພະບາງ ໃຫ້ຄວາມເຄົາລົບນັບຖືຖ້າທ່ານໃດສົນໃຈຢາກສືກສາທາງດ້ານຄວາມເປັນມາຄວາມເກົ່າແກ່ຂອງສະຖານທີ່ດັ່ງກ່າວກໍສາມາດເຂົ້າໄປທ່ຽວຊົມໄດ້ທຸກເວລາສະຖານທີ່ດັ່ງກ່າວ ແມ່ນຕັ້ງຢູ່ພາຍໃນຂອບເຂດຕົວເມືອງຫຼວງພະບາງນັ້ນເອງ.

__________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

ສົນໃຈລົງໂຄສະນາໄດ້ທີ່:  021 313645, 316511

 

แชร์