1 ເດືອນ ເຈົ້າໜ້າທີ່ຢືດໄມ້ຜິດກົດໝາຍໄດ້ 918 ທ່ອນ

  ເພື່ອເປັນການຕ້ານ ແລະສະກັດກັ້ນການລັກລອບຕັດໄມ້ທຳລາຍປ່າ, ລ່າສັດນໍ້າ-ສັດປ່າ ແລະເຄື່ອງປ່າຂອງດົງໃຫ້ຫຼຸດໜ້ອຍຖອຍລົງທັງເປັນການປົກປັກຮັກສາພັນໄມ້ ແລະປ່າໄມ້, ອະນຸລັກພັນສັດນໍ້າ, ສັດປ່າທີ່ໃກ້ຈະສູນພັນຊຶ່ງເປັນຊັບພະຍາກອນອັນລໍ້າຄ່າຂອງຊາດໃຫ້ຄົງຢູ່ຕະຫຼອດໄປນັ້ນກະຊວງກະສິກຳ ແລະ ປ່າໄມ້ກໍຄືພາກສ່ວນທີ່ກ່ຽວຂ້ອງໄດ້ເອົາໃຈໃສ່ຫຼາຍດ້ານຊຶ່ງເຮັດໃຫ້ໃນໄລຍະ 1 ເດືອນຜ່ານມາສາມາດຢຶດໄມ້ຜິດກົດໝາຍໄດ້ 918 ທ່ອນ.

 ຕາມນບົດລາຍງານການປະຕິບັດວຽກງານປະຈຳເດືອນກຸມພາ 2020 ແລະແຜນວຽກຈຸດສຸມໃນເດືອນມີນາ 2020 ຂອງກະຊວງກະສິກໍາ ແລະປ່າໄມ້ ໃຫ້ຮູ້ວ່າ: ໃນໄລຍະໜຶ່ງເດືອນຜ່ານມາເຈົ້າໜ້າທີ່ປ່າໄມ້ກອງກວດກາປ່າໄມ້ປະຈໍາແຂວງ ແລະນະຄອນຫຼວງສາມາດກວດຢຶດໄມ້,ສັດນໍ້າ-ສັດປ່າ ແລະ ເຄື່ອງປ່າຂອງດົງທີ່ຜູ້ກະທໍາຜິດຕໍ່ກົດໝາຍ ແລະເຄື່ອງປ່າຂອງດົງໄດ້ຈຳນວນໜຶ່ງໃນນັ້ນປະກອບມີ: ໄມ້ແຕ້ຂ່າ, ໄມ້ດຸ່,ໄມ້ແດງ,ໄມ້ແຄນຫີນທັງໝົດ 918 ທ່ອນຕໍ່ໂຕຕໍ່ຕັບ,ບໍລິມາດ 40,028 ແມັດກ້ອນ,ໄມ້ຟືນ 14,151 ຫຼາ ແລະໄດ້ສືບສວບ-ສອບສວນທັງໝົດ 33 ຄະດີ (ຄະດີກ່ຽວກັບໄມ້ 29 ຄະດີ,ຄະດີກ່ຽວກັບສັດນໍ້າແລະສັດປ່າ 1 ຄະດີ ແລະຄະດີເຄື່ອງປ່າຂອງດົງ 3 ຄະດີໃນນີ້ກໍາລັງສືບສວນ-ສອບສວນ 32 ຄະດີ, ສຶກສາອົມຮົມ 1 ຄະດີ ແລະປັບໃໝເປັນເງິນທັງໝົດ 110,7 ລ້ານກີບ.

  ນອກນັ້ນຍັງໄດ້ລົງຕິດຕາມກວດກາການບຸກລຸກເນື້ອທີ່ດິນປ່າໄມ້ຖາງປ່າເຮັດໄຮ່ຈໍານວນ 4 ເຮັກຕາ ທີ່ເມືອງປະຊຸມພອນແຂວງຈໍາປາສັກ ແລະລົງກວດກາສາງເກັບຊື້ເຄື່ອງປ່າຂອງດົງ (ບໍ່ມີເອກະສານ) ປະເພດຮາກຜັກກູດດິບຈໍານວນ 10 ໂຕນ ທີ່ບ້ານພັນສະຫວັນ ເມືອງຊໍາໃຕ້ ແຂວງຫົວພັນ ສ່ວນຜູ້ທີ່ກະທຳຜິດຈະຖືກສຶກສາອົບ ຮົມພ້ອມທັງເຮັດບົດບັນທຶກກ່າວເຕືອນແລະຖືກປະຕິບັດຕາມກົດໝາຍ.

  ພ້ອມທັງໄດ້ຕິດຕາມຂຸດຄົ້ນເຄື່ອງປ່າຂອງດົງປະຈໍາປີ 2019 ແລະແຜນການຂຸດຄົ້ນເຄື່ອງປ່າຂອງດົງປະຈໍາປີ 2020 ຊຶ່ງມີທັງໝົດ 32.232 ໂຕນ ໃນນັ້ນເຄື່ອງປ່າຂອງດົງທີ່ເປັນຢາ 8.929 ໂຕນ, ໄມ້ຕິ້ວຜະລິດຖ່ານຂາວ 108.014 ແມັດກ້ອນ, ໄມ້ປ່ອງ10.600.800 ລໍາ, ຫວາຍ 740.100 ເສັ້ນ ແລະ ໝາກຕາວ 1.700 ໂຕນ

  ດັ່ງນັ້ນເພື່ອເປັນການຕອບຕ້ານກັບຜູ້ທີ່ກະທໍາຜິດຫວັງເອົາຊັບສົມບັດອັນລວມຂອງຊາດມາເປັນຂອງຕົນ, ເປັນການອະນຸລັກ,ປົກປັກຮັກສາຊັບພະຍາກອນອັນມີຄຸນຄ່າ ທາງທຳມະຊາດໄວ້ໃຫ້ຢູ່ຄູ່ກັບຜືນແຜ່ນດິນອັນດົມຮັ່ງມີຂອງລາວຕະຫຼອດໄປຮຽກຮ້ອງໃຫ້ປະຊາຊົນທຸກຊັ້ນຄົນທະຫານ, ຕຳຫຼວດຈົ່ງພ້ອມຈິດພ້ອມໃຈກັນເປັນຫູເປັນ ຕາຊ່ວຍກັນຕອບຕ້ານການລັກລອບຕັດໄມ້ທຳລາຍປ່າ, ລ່າສັດນໍ້າ, ສັດປ່າທີ່ຜິດກົດໝາຍໃຫ້ຫຼຸດໜ້ອຍຖອຍລົງ ແລະໝົດໄປເທື່ອລະກ້າວ.

------------------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

ສົນໃຈລົງໂຄສະນາໄດ້ທີ່:  021 313645, 316511

แชร์