ສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະຂະໜາດກາງ

  ການຄ້າ ແລະອຸດສາຫະກຳແຫ່ງຊາດລາວໄດ້ຈັດງານສົ່ງເສີມຈຸນລະວິສະຫະກິດ, ວິສະຫະກິດຂະໜາດນ້ອຍ ແລະ ຂະໜາດກາງຂຶ້ນໃນວັນທີ 21 ກຸມພາ 2020 ວິທະຍາໄລເຕັກນິກວິຊາຊີບແຂວງຫຼວງພະບາງ ໂດຍການເຂົ້າຮ່ວມຂອງທ່ານ ສົມຈິດ ອິນທະມິດ ຮອງລັດຖະມົນຕີກະຊວງອຸດສາຫະກຳ ແລະການຄ້າ,ທ່ານ ສຽວ ສະ ຫວາດ ສະແຫວງສຶກສາປະທານທີ່ປຶກສາກິຕິມະສັກສະພາການຄ້າ ແລະ ອຸດສາຫະກຳແຫ່ງຊາດລາວ, ທ່ານ ບຸນທ່ຽງ ສຸລິວັນ ປະທານສະພາການຄ້າແລະອຸດສາຫະ ກຳ ແຂວງຫຼວງພະບາງ, ມີຕາງໜ້າກົມ, ຊ່ຽວຊານວິຊາການ, ຫົວໜ່ວຍທຸລະກິດ, ຜູ້ປະກອບການ, ຄະນະອໍານວຍການໂຮງຮຽນພ້ອມດ້ວຍນັກສຶກສາເຂົ້າຮ່ວມ.

  ທ່ານ ສົມຈິດ ອິນທະມິດ ກ່າວວ່າ: ຈຸດປະສົງກໍເພື່ອເປັນການຖ່າຍທອດຄວາມຮູ້, ປະສົບການ ແລະຂໍ້ມູນຈາກນັກທຸລະກິດໜຸ່ມນ້ອຍທີປະສົບຜົນສຳເລັດໃຫ້ນັກທຸລະ ກິດຂະໜາດນ້ອຍ, ຂະໜາດກາງພາຍໃນແຂວງຫຼວງພະບາງ ແລະ ເປັນການໃຫ້ຄວາມຮູ້, ແນະນຳແນວທາງໃນການດຳເນີນທຸລະກິດ, ການເຂົ້າເຖິງແຫຼ່ງທຶນຕ່າງໆ ເພື່ອເປັນການເປີດມູນມອງ, ເປີດແນວຄວາມຄິດໃໝ່ໃຫ້ກັບນັກຮຽນ-ນັກສຶກສາສ້າງໃຫ້ນັກສຶກສາທີ່ຮຽນຈົບອອກມາແລ້ວໄດ້ມີວຽກເຮັດງານທຳເປັນເຈົ້າຂອງທຸລະກິດ ແລະ ອື່ນໆ ໂດຍຫຼີກເວັ້ນການຄອງຄອຍໃນການເຂົ້າເປັນພະນັກງານລັດແຕ່ພຽງຢ່າງດຽວ.

  ປະຈຸບັນປະເທດລາວແມ່ນພວມກ້າວເຂົ້າຍຸກແຫ່ງການພັດທະນາມີຫຼາຍສິ່ງຫຼາຍຢ່າງໄດ້ມີການປ່ຽນແປງ ແລະ ມີການພັດທະນາດີຂຶ້ນເສດຖະກິດຂອງປະເທດໄດ້ມີ ການຂະຫຍາຍຕົວຢ່າງເນື່ອງເວົ້າລວມເວົ້າສະເພາະແມ່ນແຂວງຫຼວງພະບາງປີຜ່ານມາເສດຖະກິດໄດ້ມີການຂະຫຍາຍຕົວໃນລະດັບ 7,8%, ຫົວໜ່ວຍທຸລະກິດພາຍ ໃນແຂວງເພີ່ມ ຂຶ້ນ, ປີ 2019 ທົ່ວແຂວງມີຫົວທຸລະກິດເພີ່ມຂຶ້ນໃໝ່ 436 ແຫ່ງ, ປະຈຸບັນຫົວໜ່ວຍທຸລະກິດຖືວ່າມີຄວາມໝາຍສຳຄັນຫຼາຍໃນການສ້າງສາ ແລະຊ່ວຍໃຫ້ມີການລົງທຶນ, ເກີດການຜະລິດ, ການແປຮູບ, ການໝູນວຽນຂອງເງິນ ແລະກ້າວໄປເຖິງການສ້າງວຽກເຮັດງານທໍາມີອາຊີບທີ່ໝັ້ນທ່ຽງໃຫ້ຄອບຄົວ ແລະ ມີລາຍຮັບດີຂຶ້ນໄດ້ປະກອບສ່ວນຢ່າງຕັ້ງໜ້າເຂົ້າໃນການສ້າງສາ ແລະພັດທະນາປະເທດຊາດໃຫ້ມີຄວາມຮຸ່ງເຮືອງ.

  ເຊື່ອວ່າການຈັດງານຄັ້ງນີ້ຈະເປັນເວທີເປີດກວ້າງໃນການສົນທະນາ ແລະແລກປ່ຽນປະສົບການໃນການວາງແຜນການດໍາເນີນທຸລະກິດຂະໜາດນ້ອຍ,ຂະໜາດກາງ, ການສ້າງແຮງບັນດານໃຈຂອງການສ້າງທຸລະກິດໃຫ້ປະສົບຜົນສໍາເລັດ ແລະຈາກນັກທຸລະກິດຂອງ ແຂວງຫຼວງພະບາງ ທີ່ຈະມາບັນຍາຍໃຫ້ຜູ້ທີ່ເຂົ້າຮ່ວມໄດ້ຮັບຟັງ, ຢ້ຽມຊົມການວາງສະແດງສິນຄ້າຈາກບັນດາພາກສ່ວນທີ່ກ່ຽວຂ້ອງ ແລະພ້ອມນໍາເອົາບົດຮຽນວິທີການດໍາເນີນທຸລະກິດຈາກຜູ້ທີ່ປະສົບຜົນສໍາເລັດໄປຕໍ່ຍອດເຮັດທຸລະ ກິດຂອງຕົນເອງໃຫ້ສໍາເລັດ.

_______________

ຂຽນໂດຍ: ສີສຸວັນ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์