ຊາວໜຸ່ມຮາກຖານວິທະຍາໄລພາກເອກະຊົນ ເລືອກຄະນະບໍລິຫານງານຊຸດໃໝ່

 ເມື່ອອາທິດຜ່ານມາທີ່ວິທະຍາໄລສຸດສະກະເພື່ອການບໍລິການ ແລະເຕັກໂນໂລຊີ, ໄດ້ຈັດກອງປະຊຸມໃຫຍ່ຜູ້ແທນຊາວໜຸ່ມປະຊາຊົນປະຕິວັດລາວຮາກຖານວິທະຍາໄລພາກເອກະຊົນຄັ້ງທີ 2 ໂດຍໃຫ້ກຽດເຂົ້າຮ່ວມຂອງສະຫາຍ ສໍາລານ ພັນຄະວົງ ຄະນະເລຂາທິການສູນກາງຊາວໜຸ່ມປະຊາຊົນປະຕິວັດລາວ, ເລຂາຊາວໜຸ່ມກະຊວງສຶກສາທິການ ແລະກີລາ, ສະຫາຍ ບຸນຕີ ສິດທິນົນທອງ ຮອງປະທານສະມາຄົມການສຶກສາພາກເອກະຊົນຜູ້ຊີ້ນໍາວຽກງານອົງການຈັດຕັ້ງມະຫາຊົນ, ພ້ອມດ້ວຍເລຂາຊາວໜຸ່ມຮາກຖານ, ປະທານສະຫະພັນແມ່ຍິງ, ກໍາມະບານຮາກຖານວິທະຍາໄລ, ເລຂາ-ຮອງເລຂາໜ່ວຍຊາວໜຸ່ມ ແລະສະມາຊິກຊາວໜຸ່ມເຂົ້າຮ່ວມ.

 ສະຫາຍ ພູນປະເສີດ ນາມລືເດດ ເລຂາຊາວໜຸ່ມຮາກຖານວິທະຍາໄລພາກເອກະຊົນໄດ້ຂຶ້ນລາຍງານຜົນສໍາເລັດໃນໄລຍະຜ່ານມາໂດຍໄດ້ຕັ້ງໜ້າສູ້ຊົນນໍາພາສະມາຊິກຊາວໜຸ່ມ, ພະນັກງານ, ຄູ-ອາຈານ ແລະນັກຮຽນ-ນັກສຶກສາຜ່ານຜ່າຕໍ່ອຸປະສັກຄວາມຫຍຸ້ງຍາກເຮັດໜ້າທີ່ທາງດ້ານການເມືອງແນວຄິດໄດ້ຮັບຜົນສໍາເລັດເພື່ອພັດ ທະນາຊາວໜຸ່ມ-ໄວໜຸ່ມ ທົ່ວຮາກຖານຊາວໜຸ່ມວິທະຍາໄລພາກເອກະຊົນໃຫ້ກ້າວຂຶ້ນໄປສູ່ຄຸນນະພາບໃໝ່ສູ້ຊົນພັດທະນາອົງການຈັດຕັ້ງຂອງຕົນ, ການບໍລິຫານວຽກ ງານ, ຊີ້ນໍາ-ນໍາພາປະຕິບັດວຽກງານໃຫ້ປາກົດຜົນເປັນຈິງ; ໄດ້ເອົາໃຈໃສ່ສຶກສາອົບຮົມການເມືອງແນວຄິດ, ຄຸນສົມບັດສິນທໍາປະຕິວັດໃຫ້ສະມາຊິກຊາວໜຸ່ມພະນັກ ງານ, ຄູ-ອາຈານ ແລະນັກຮຽນ-ນັກສຶກສາໄປຄຽງຄູ່ກັບການພັດທະນາຄຸນນະພາບທາງດ້ານວິຊາສະເພາະຕາມແຜນຍຸດທະສາດການສຶກສາຂອງກະຊວງສຶກສາທິການ ແລະກີລາ; ຊີ້ນໍາໆ ພາຂະບວນການແຂ່ງຂັນຂອງຂະແໜງການສຶກສາຕາມ 3 ເນື້ອໃນຂໍ້ແຂ່ງຂັນ.

 ນອກນັ້ນໃນປະຊຸມດັ່ງກ່າວໄດ້ປ່ອນບັດຄັດເລືອກເອົາຄະນະບໍລິຫານງານຊາວໜຸ່ມຮາກຖານວິທະຍາໄລ ແລະສະຖາບັນເອກະຊົນສະໄໝທີ 2 ໂດຍມີຜູ້ລົງສະໝັກເລືອກຕັ້ງຈໍານວນ 13 ສະຫາຍ ໂດຍເລືອກເອົາ 9 ສະຫາຍ, ຜ່ານການຄັດເລືອກ ແລະຕົກລົງເຫັນດີຈາກຄະນະສາມາດເລືອກໄດ້ສະຫາຍ ພູນປະເສີດ ນາມລືເດດ ເປັນເລຂາ, ສະຫາຍ ບຸນກອງ ຈອມມະນີ ເປັນຮອງເລຂາ ແລະສະຫາຍ ນາງ ວຽງສະຫວັນ ເຮືອງທະວົງ ຮອງເລຂາທັງເປັນປະທານກວດກາ ແລະເປັນຄະນະປະຈໍາຈໍານວນ 5 ສະຫາຍ.

  ໃນກອງປະຊຸມຍັງໄດ້ມີການມອບໃບຍ້ອງຍໍຂັ້ນກະຊວງສຶກສາທິການ ແລະກີລາໃຫ້ແກ່ໜ່ວຍຊາວໜຸ່ມມີຈໍານວນ 10 ໜ່ວຍ ແລະບຸກຄົນຈໍານວນ 27 ສະຫາຍ ທີ່ມີຜົນງານດີເດັ່ນປະກອບສ່ວນເຂົ້າໃນການພັດທະນາວຽກງານຊາວໜຸ່ມປະຊາຊົນປະຕິວັດລາວໄລຍະ 2015-2019.

_______________

ໜັງສືພິມເສດຖະກິດ-ສັງຄົມ

แชร์