ນໍ້າຕົກຕາດແຊພະ ແຫຼ່ງທ່ອງທ່ຽວແຂວງອັດຕະປື

  ນໍ້າຕົກຕາດແຊພະ ຕັ້ງຢູ່ ບ້ານຫີນລາດ ເມືອງສະໜາມໄຊ ແຂວງອັດຕະປື ຫ່າງຈາກເທສະບານເມືອງໄປປະມານ 56 ກິໂລແມັດ, ທີ່ໄດ້ກໍາເນີດຈາກສາຍນໍ້າເຊປຽນ, ເປັນນໍ້າຕົກຕາດທີ່ສວຍສົດງົດງາມ ແລະມີຄວາມສູງປະມານ 23 ແມັດ, ກວ້າງ 120 ແມັດ, ມີເນື້ອທີ່ກວ້າງກວ່າ 100 ເຮັກຕາ, ເຖິງແມ່ນຢູ່ບໍລິເວນອ້ອມຕາດຕົ້ນໄມ້ໃບຫຍ້າຈະຖືກທໍາລາຍຈາກໄພນໍ້າຖ້ວມກໍຕາມ, ຊຶຶ່ງມາຮອດປະຈຸບັນກໍໄດ້ຟື້ນໂຕກັບຄືນມາຢ່າງເປັນປົກກະຕິອັນເຕັມໄປ ດ້ວຍປ່າໄມ້ທີ່ດົກໜາຂຽວງາມອຸ່ມ ທຸ່ມ, ມີສາຍລົມເຢັນພັດຜ່ານຕະຫຼອດເວລາເຮັດໃຫ້ອາກາດເຂດນີ້ ມີຄວາມ ສົດຊື່ນ ແລະເຢັນດີ.

  ຕາມຕໍານານທີ່ໄດ້ເລົ່າຂານກັນມາວ່າ, ໃນເມື່ອກ່ອນຢູ່ບໍລິເວນຕາດແຫ່ງນີ້ໄດ້ມີຖໍ້າແຫ່ງໜຶ່ງ ຊຶ່ງ ຢູ່ໃນພາຍຖໍ້າມີພະອົງສັກສິດທີ່ສາມາດສະເດັດໄປ-ມາໄດ້ທຸກແຫ່ງ ຫົນ, ພາຍໃນຖໍ້າຍັງມີແກ້ວແຫວນ ເງິນຄໍາ ແລະເພັດນິນຈິນດາຕ່າງໆ ຊຶ່ງປະຊາຊົນໃນສະໄໝບູຮານຍາມ ມີງານບຸນຕ່າງໆ ກໍໄດ້ມາຢືມເອົາ ເຄື່ອງປະດັບຢູ່ໃນຖໍ້າແຫ່ງນີ້ເພື່ອ ໄປປະດັບເອ້ຢ້ອງ, ຫຼັງຈາກແລ້ວ ງານແລ້ວກໍເອົາມາສົ່ງຄືນບ່ອນ ເກົ່າ, ຕໍ່ມາໄດ້ມີກຸ່ມຄົນບໍ່ດີເຂົ້າມາ ລັກເອົາເຄື່ອງ ແລະວັດຖຸມີຄ່າຢູ່ ພາຍໃນຖໍ້າແຫ່ງນີ້ ແລະບາງຄົນ ເອົາໄປແລ້ວບໍ່ສົ່ງຄືນ ຈຶ່ງເຮັດໃຫ້ພະອົງສັກສິດໄດ້ສະເດັດໄປປະດິດສະຖານຢູ່ທີ່ອື່ນ ແລະຖໍ້າແຫ່ງນີ້ກໍໄດ້ຫັກເພພັງລົງຖົມປາກຖໍ້າໄວ້ ຈຶ່ງ ບໍ່ມີໃຜສາມາດເຂົ້າໄປໃນຖໍ້ານີ້ໄດ້ ອີກຈົນເທົ່າທຸກວັນນີ້.

 ປະຈຸບັນນີ້ແມ່ນກໍາລັງຂຸ້ນຂ້ຽວປັບພື້ນທີ່ໜ້າດິນ, ປູກຕົ້ນໄມ້ປະດັບ, ສ້າງສິ່ງອໍານວຍຄວາມສະດວກຕ່າງໆເຊັ່ນ: ສະຖານທີ່ບໍລິການຈອດລົດ,ຮ້ານອາຫານ-ກິນດື່ມ,ຫ້ອງນໍ້າສະອາດ,ຈຸດຊົມວິວ ແລະສະຖານທີ່ພັກຜ່ອນຕະຫຼອດຮອດເສັ້ນທາງເຂົ້າ-ອອກຂອງຕາດແຫ່ງນີ້ກໍຈະໄດ້ປັບປຸງຄືນໃໝ່ໃຫ້ ກາຍເປັນເສັ້ນທາງທີ່ດີງາມ ແລະ ໄປ-ມາໃຫ້ສະດວກສະບາຍກວ່າ ເກົ່າ.

------

ໂດຍ: ຊາຍພະເນຈອນ

แชร์