ອາຊີບຈັກສານເປັນງານທີ່ດີ ມີເງິນໃຊ້ທຸກວັນ

 ອາຊີບຈັກສານ ກໍແມ່ນອີກ ອາຊີບໜຶ່ງທີ່ຄົນລາວເຮົານິຍົມກັນເຮັດ, ຊຶ່ງໃນສະໄໝກ່ອນປະຊາຊົນລາວເຮົາບັນດາເຜົ່າ ນອກຈາກ ເຮັດໄຮ່, ເຮັດສວນ, ເຮັດນາປູກ ເຂົ້າ ແລະລ້ຽງສັດແລ້ວຍັງຢຶດຖື ເອົາອາຊີບຈັກສານເປັນວຽກເສີມນໍາອີກ ເພື່ອຮັບໃຊ້ຊີວິດການເປັນຢູ່ພາຍໃນຄອບຄົວເຊັ່ນ: ສານຝາ ແອ້ມເຮືອນ-ແອ້ມຖຽງໄຮ່ຖຽງນາ, ສານແຕະເຮັດຄອກເປັດ-ຄອກໄກ່, ສານຫວດ-ສານມວຍ, ແອບເຂົ້າ, ສານກະບຸງ-ກະຕ່າ ແລະອື່ນໆ, ຊຶ່ງ ທັງໝົດເຫຼົ່ານີ້ລ້ວນແລ້ວແຕ່ເປັນ ກິດຈະກໍາປະຈໍາວັນຂອງຄອບຄົວ ທີ່ຂາດບໍ່ໄດ້, ມາຮອດປະຈຸບັນ ອາຊີບດັ່ງກ່າວກໍໄດ້ຫັນປ່ຽນຈາກ ການຮັບໃຊ້ຄອບຄົວມາເປັນທຸລະ ກິດເພື່ອປ່ຽນແປງຊີວິດການເປັນ ຢູ່ ແລະຖານະຄອບຄົວໃຫ້ດີຂຶ້ນ.

  ດັ່ງຄອບຄົວຂອງ ລຸງສົມດີ ທິດາເລີດ ປະຈຸບັນ ຢູ່ບ້ານວຽງສະຫວັນ ເມືອງສີໂຄດຕະບອງ ນະ ຄອນຫຼວງວຽງຈັນ, ຊຶ່ງຜູ້ກ່ຽວກໍໄດ້ ມີອາຊີບຈັກສານມານານຫຼາຍປີ ແລ້ວ ແລະໄດ້ໃຫ້ສໍາພາດກັບນັກ ຂ່າວພວກເຮົາຮູ້ວ່າ: ພາຍຫຼັງທີ່ໄດ້ ອອກບໍາເນັດແລ້ວຕົນເອງກໍເລີ່ມ ຮຽນຮູ້ກ່ຽວກັບການຈັກສານ ຕ່າງໆ ແລະສາມາດເຮັດດ້ວຍຕົນ ເອງໄດ້ ຈຶ່ງລົງທຶນສັ່ງຊື້ໄມ້ພາງ-ໄມ້ເຮ້ຍປະມານ 50 ລໍາ ຢູ່ເຂດ ເມືອງສັງທອງ ມາເຮັດຢູ່ເຮືອນ ເຫັນວ່າດໍາເນີນໄປໄດ້ດີ ຈຶ່ງໄດ້ລົງ ທຶນຊື້ໄມ້ເພີ່ມຂຶ້ນຕື່ມ 100 ລໍາ ຈຶ່ງ ຮູ້ໄດ້ວ່າທຸລະກິດດັ່ງກ່າວມີຄວາມຄ່ອງຕົວ ແລະດໍາເນີນໄປດ້ວຍດີ ມີລາຍຮັບປະຈໍາວັນມາ ໃຫ້ຄອບຄົວນັບມື້ດີຂຶ້ນເລື້ອຍໆຈຶ່ງໄດ້ຢຶດຖືເອົາເປັນອາຊີບຫຼັກຂອງຄອບຄົວ.

  ລຸງສົມດີ ທິດາເລີດ ຍັງໃຫ້ຮູ້ ອີກວ່າ, ການເຮັດອາຊີບຈັກສານ ມາຮອດປະຈຸບັນນີ້ແມ່ນໄດ້ປະມານ 10 ກວ່າປີແລ້ວ, ໂດຍລົງທຶນ ສັ່ງຊື້ໄມ້ເພີ່ມຂຶ້ນເຖິງ 200 ລໍາ ສານແຕະໄດ້ປະມານ 30 ແຜ່ນຕໍ່ ເດືອນ, ສຸ່ມໄກ່ 25 ໜ່ວຍຕໍ່ເດືອນ, ຫວດ-ມວຍ 20 ໜ່ວຍຕໍ່ເດືອນ ແລະສານເຂັ້ງໄດ້ 20 ໜ່ວຍຕໍ່ ເດືອນ, ຊຶ່ງແຕ່ລະມື້ແມ່ນໄດ້ໄປສົ່ງຂາຍໃຫ້ລູກຄ້າຕາມການສັ່ງຈອງ ແລະຈໍານວນໜຶ່ງກໍມີລູກຄ້າມາຊື້ ຢູ່ກັບເຮືອນເລີຍ ເຮັດໃຫ້ມີລາຍຮັບປະຈໍາວັນຢ່າງຄ່ອງຕົວຄິດສະເລ່ຍແລ້ວເດືອນໜຶ່ງມີລາຍຮັບທັງໝົດປະມານ 1,3-1,5 ລ້ານກີບ ໃນນັ້ນ ເສຍຄ່ານໍ້າ-ຄ່າໄຟຟ້າປະມານ 3,5 ແສນກີບຕໍ່ເດືອນ, ຊື້ເຂົ້າ ກິນປະມານ 2,5 ກີບຕໍ່ເດືອນ, ຊື້ອາຫານການກິນຮັບໃຊ້ຊີວິດປະຈໍາວັນປະມານ 3 ແສນກີບຕໍ່ເດືອນ ແລະສາມາດເກັບເງິນປະຢັດໄວ້ ເດືອນລະປະມານ 5 ແສນກີບ.

 ທຸລະກິດຈັກສານຂອງ ລຸງ ສົມດີ ທິດາເລີດ ເຖິງຈະເປັນທຸລະກິດນ້ອຍແບບຄອບຄົວການລົງ ທຶນໜ້ອຍ, ແຕ່ສາມາດສ້າງລາຍຮັບກໍາໄລມາໃຫ້ຄອບຄົວທຸກວັນ ແລະທຸກເດືອນຢ່າງເປັນປົກກະຕິ ແລະບໍ່ມີໜີ້ສິນຄຸມເຄືອ ແຕ່ຢ່າງໃດ ແຖມແຕ່ລະເດືອນຍັງມີເງິນເຫຼືອ ເກັບໄວ້ໃຫ້ຄອບຄົວນໍາອີກດ້ວຍ ຈຶ່ງເຮັດໃຫ້ຊີວິດການເປັນຢູ່ຄອບຄົວຂອງລາວນັບມື້ດີຂຶ້ນເລື້ອຍໆ.

----

ໂດຍ: ຊາຍພະເນຈອນ

 

แชร์