ສະຫຼຸບການປັກຫຼັກໝາຍເຂດຜະລິດກະສິກຳຢູ່ 2 ເມືອງຂອງ ນວ

  ວັນທີ 20 ກຸນພາຜ່ານມາທີ່ ນະຄອນຫຼວງວຽງຈັນ ພະແນກກະສິກໍາ ແລະປ່າໄມ້ ນະຄອນຫຼວງວຽງຈັນ ໄດ້ຈັດກອງປະຊຸມລາຍງານຜົນສໍາເລັດການຈັດຕັ້ງປະຕິບັດໂຄງການກໍານົດ ແລະປັກຫຼັກໝາຍເຂດສະຫງວນທີ່ດິນກະສິກໍາ ເມືອງນາຊາຍທອງ ແລະເມືອງໄຊທານີ ນະຄອນຫຼວງວຽງຈັນ ໂດຍການເປັນປະທານຂອງ ທ່ານ ບຸນຂວາງຄໍາ ບຸນເຮືອງ ຮອງລັດຖະມົນຕີກະຊວງກະສິກໍາ ແລະປ່າໄມ້, ທ່ານ ອາດສະພັງທອງ ສີພັນດອນ ຮອງເຈົ້າຄອງນະຄອນຫຼວງວຽງຈັນ,ມີຫົວໜ້າ, ຮອງຫົວໜ້າພະແນກ ກະສິກໍາ ແລະປ່າໄມ້ ນວ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

 ທ່ານ ສີສະຫວັດ ສິນທະວີ ຫົວໜ້າ ພະແນກກະສິກໍາ ແລະປ່າໄມ້ ນວ ໄດ້ຂຶ້ນລາຍງານການຈັດຕັ້ງປະຕິບັດໂຄງການກໍານົດແລະປັກຫຼັກໝາຍເຂດສະຫງວນທີ່ດິນກະສິກໍາເມືອງນາຊາຍທອງ ແລະເມືອງໄຊທານີ ນະຄອນຫຼວງວຽງຈັນວ່າ: ໃນໄລະຍະຜ່ານມາເຫັນວ່າມີຜົນສໍາເລັດຫຼາຍດ້ານໂດຍສະເພາະໄດ້ຈັດກອງປະຊຸມສະເໜີແຜນ ການຈັດຕັ້ງປະຕິບັດໂຄງການຈຳນວນ 2 ຄັ້ງ ຢູ່ເມືອງຫາດຊາຍຟອງ 1 ຄັ້ງ ແລະເມືອງໄຊທານີ 1 ຄັ້ງ ແລະເປີດຂະບວນການປັກຫຼັກໝາຍເຂດສະຫງວນເນື້ອທີ່ຜະ ລິດກະສິກຳຢູ່ບ້ານຖິ່ນແທນ, ເມືອງຫາດຊາຍຟອງ ນະຄອນຫຼວງວຽງຈັນ ໃນຄັ້ງວັນທີ 29 ມິຖຸນາ 2019. ນອກນັ້ນລົງເຜີຍແຜ່ຈຸດປະສົງແລະເປົ້າໝາຍຂອງໂຄງ ການຢູ່ 51 ບ້ານ ຂອງ 2 ເມືອງຄື: ເມືອງຫາດຊາຍຟອງ ຈໍານວນ 35 ບ້ານ ແລະເມືອງໄຊທານີ ຈໍານວນ 16 ບ້ານ ເພື່ອລຸລ່ວງໃຫ້ປະຊາຊົນຜູ້ທີ່ເຮັດການຜະລິດກະສິກໍາຫຼືຜູ້ທີ່ມີສິດນໍາໃຊ້ທີ່ດິນໃນຂອບເຂດດັ່ງກ່າວໃຫ້ເຂົ້າໃຈ ແລະ ໃຫ້ການຮ່ວມມືພ້ອມທັງອໍານວນຄວາມສະດວກໃຫ້ແກ່ພະນັກງານວິຊາການໃນການປະຕິບັດວຽກ ໂດຍມີຜູ້ເຂົ້າຮ່ວມທັງໝົດ ຈຳນວນ 1.654, ເປັນຍິງ 433 ຄົນ, ລົງກຳນົດ ຂອບເຂດ, ສໍາຫຼວດພື້ນທີ່ ແລະວາງຈຸດ ປັກຫຼັກໝາຍຊົ່ວຄາວ (ເປັນຫຼັກໄມ້) ແລະລົງປັກຫຼັກໝາຍຂອບເຂດສະຫງວນທີ່ດິນກະສິກໍາ (ຫຼັກເບຕົງ) ພ້ອມທັງເກັບກໍາຂໍ້ມູນທີ່ຕັ້ງຫຼັກໝາຍ (ຊື່ເຈົ້າຂອງດິນ ແລະຈຸດພິກັດໂດຍໃຊ້ເຄື່ອງ GPS) ຢູ່ 51 ບ້ານ ຂອງ 2 ເມືອງ, ລວມທັງໝົດ 847 ຫຼັກ, ກວມເອົາເນື້ອທີ່ທັງໝົດ 11.965,24 ເຮັກຕາ. ໃນນີ້, ປະກອບມີເນື້ອທີ່ດິນກະສິກໍາ 8.888,5 ເຮັກຕາ (ເນື້ອທີ່ນາ 6.583,05 ເຮັກຕາ, ເນື້ອທີ່ດິນປູກພືດອາຍຸສັ້ນ 1.650,28 ເຮັກຕາ, ເນື້ອທີ່ດິນປູກພືດອາຍຸຍາວ 147,16 ເຮັກຕາ, ເນື້ອທີ່ດິນທົ່ງຫຍ້າລ້ຽງສັດ 131,3 ເຮັກ ຕາ ແລະເນື້ອທີ່ດິນໜອງປາ 376,76 ເຮັກຕາ), ເນື້ອທີ່ດິນປ່າໄມ້ 2.400,16 ເຮັກຕາ, ເນື້ອທີ່ດິນປະເພດອື່ນໆ 676,58 ເຮັກຕາ ແລະສ້າງແຜນທີ່ຂອບເຂດສະຫງວນທີ່ດິນກະສິກໍາຂະໜາດ A0 ຈໍານວນ 10 ຊຸດ ແລະຂະໜາດ A3 ຈໍານວນ 51 ຊຸດ ພ້ອມທັງລົງສ້າງບົດບັນທຶກການປັກຫຼັກໝາຍເຂດສະຫງວນການຜະ ລິດກະສິກຳຮ່ວມກັບອຳນາດການປົກຄອງບ້ານຈຳນວນ 51 ບ້ານ ແລະໄດ້ສໍາເລັດການສ້າງຂໍ້ຕົກລົງຂອງທ່ານເຈົ້າເມືອງວ່າດ້ວຍການຄຸ້ມຄອງທີ່ດິນກະສິກຳໃນເຂດສະ ຫງວນຈໍານວນ 2 ສະບັບ (ເມືອງລະ 1 ສະບັບ) ເພື່ອໃຊ້ເປັນບ່ອນອີງໃນການຄຸ້ມຄອງທີ່ດິນກະສິກຳໃຫ້ຖືກຕ້ອງຕາມເປົ້າໝາຍ ແລະຮັບປະກັນໃຫ້ມີເນື້ອທີ່ສຳລັບການຜະລິດກະສິກຳໃນຕໍ່ໜ້າ.

   ໂຄງການກໍານົດ ແລະ ປັກຫຼັກໝາຍເຂດສະຫງວນເນື້ອທີ່ການຜະລິດກະສິກໍາຢູ່ເມືອງຫາດຊາຍຟອງ ແລະເມືອງໄຊທານີ ແມ່ນເປັນໂຄງການສົ່ງເສີມທາງດ້ານວິຊາ ການປະຈໍາປີ 2018 ຂອງກົມ ຄຸ້ມຄອງ ແລະພັດທະນາທີ່ດິນກະສິກໍາ ກະຊວງກະສິກໍາ ແລະປ່າໄມ້, ໄດ້ຮັບອະນຸ ມັດງົບປະມານຈໍານວນ 500 ລ້ານກີບ (ຫ້າຮ້ອຍລ້ານກີບ), ເປັນໂຄງການທີ່ເກີດຂຶ້ນບົນພື້ນຖານການຕົກລົງເຫັນດີລະຫວ່າງທ່ານເຈົ້າຄອງນະຄອນຫຼວງວຽງຈັນ ແລະທ່ານລັດຖະມົນຕີກະຊວງກະສິກໍາ ແລະປ່າໄມ້ ເພື່ອຮັກສາເນື້ອທີ່ການຜະລິດກະສິກໍາໃນເຂດທີ່ມີເງື່ອນໄຂເໝາະສົມດ້ວຍວິທີການສໍາຫຼວດ, ປັກຫຼັກໝາຍ, ສ້າງແຜນທີ່ ແລະລະບຽບການຄຸ້ມຄອງທີ່ດິນກະສິກໍາທີ່ໄດ້ກໍານົດ ແລະ ປັກຫຼັກໝາຍໄວ້ພ້ອມທັງເປັນການປະກອບສ່ວນໃນການຜະລິດສະບຽງອາຫານ ແລະການຜະລິດເປັນສິນຄ້າ, ຫຼີກລ່ຽງບັນຫາການບຸກລຸກທີ່ດິນກະສິກໍາ ແລະບັນຫາດ້ານສະພາບແວດລ້ອມທີ່ອາດຈະເກີດຂຶ້ນໃນຕໍ່ໜ້າ.

_____________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์