ໜີ້ຄ່າໄຟຢູ່ຈໍາປາສັກເຖີງ 40 ຕື້ກວ່າກີບ ສ່ວນໃຫຍ່ແມ່ນພາກລັດ

  ໜີ້ຄ້າງຈ່າຍຄ່າກະແສໄຟຟ້າຢູ່ ແຂວງຈໍາປາສັກ ເຖິງແມ່ນວ່າໃນຫຼາຍປີຜ່ານມາທາງຄະນະບໍລິຫານຂອງສາຂາ ແຂວງຈໍາປາສັກ ຈະມີຄວາມພະຍາຍາມເພື່ອເຮັດໃຫ້ຕົວເລກດັ່ງກ່າວຫຼຸດລົງແຕ່ກໍ່ຍັງເປັນບັນຫາຢູ່ເນື່ອງຈາກໜີ້ສ່ວນໃຫຍ່ຍັງແມ່ນພາກລັດໃນຂະນະທີ່ປີນີ້ຫົວໜ້າສາຂາເນັ້ນຈະສູ້ຊົນເຮັດໃຫ້ໜີ້ດັ່ງກ່າວຫຼຸດລົງໃຫ້ໄດ້ຫຼາຍກວ່າປີຜ່ານມາໂດຍວາງເປົ້າໝາຍຢ່າງຈະແຈ້ງຕໍ່ຜູ້ຊົມໃຊ້ຖ້າແມ່ນພາກລັດຕິດຕ້ອງໄດ້ເຮັດບົດບັນທຶກກັນຢ່າງຄັກແນ່.

  ທ່ານ ຄູນ ບົວແພງພັນ ຫົວໜ້າລັດວິສາຫະກິດໄຟຟ້າລາວ ສາຂາແຂວງຈໍາປາສັກ, ໄດ້ເປີດເຜີຍຕໍ່ນັກຂ່າວໜັງສືພິມເສດຖະກິດ-ສັງຄົມ ປະຈໍາແຂວງເມື່ອບໍ່ດົນມານີ້ໃຫ້ຮູ້ວ່າ: ປະກົດການໜີ້ຄ່າຄ້າງຈ່າຍກະແສໄຟຟ້າຢູ່ແຂວງຈໍາປາສັກໄດ້ເກີດມີມາຫຼາຍປີແລ້ວ, ຊຶ່ງຜ່ານມາພວກເຮົາແມ່ນໄດ້ເອົາໃຈໃສ່ໃນການແກ້ໄຂບັນຫາດັ່ງກ່າວເພື່ອເຮັດໃຫ້ຕົວເລກໜີ້ຄ້າງຈ່າຍຫຼຸດລົງ ແລະກໍສາມາດປະຕິບັດໄດ້ສ່ວນໃດສ່ວນໜຶ່ງ,ຊຶ່ງບໍ່ສາມາດຫຼຸດໜີ້ໄດ້ຢ່າງຂາດຕົວ, ເນື່ອງຈາກວ່າໜີ້ຄ່າກະແສໄຟຟ້າສ່ວນໃຫຍ່ແມ່ນຢູ່ນໍາພາກລັດເຊັ່ນ: ຫ້ອງການທົ່ວໄປ, ບໍລິສັດລັດວິສາຫະກິດ, ໂຄງການລັດທີ່ສົ່ງເສີມປະຊາຊົນທໍາການຜະລິດໃຫ້ເປັນສິນຄ້າ ແລະອື່ນໆ.

  ຢ່າງໃດກໍຕາມສໍາລັບປີ 2020 ລັດວິສາຫະກິດໄຟຟ້າລາວສາຂາແຂວງຈໍາປາສັກແມ່ນຈະໄດ້ສູ້ຊົນເຮັດໃຫ້ຕົວເລກໜີ້ຄ້າງຈ່າຍຄ່າກະແສໄຟຟ້າຫຼຸດລົງໃຫ້ໄດ້ຫຼາຍກວ່າປີຜ່ານມາ,ໂດຍຈະໄດ້ມີການກວດກາຂໍ້ມູນໃຫ້ມີຄວາມຊັດເຈນ ແລະຈະແຈ້ງຂອງໜີ້ແຕ່ລະປະເພດເຊັ່ນ: ປະເພດທີ່ຢູ່ອາໃສ, ທຸລະກິດອຸດສາຫະກໍາ, ເອົາໃຈໃສ່ຕິດຕາມການຊົມໃຊ້ໄຟຟ້າຊົນລະປະທານ, ໂດຍສະເພາະແມ່ນໂຄງການຂອງລັດທີ່ສົ່ງເສີມໃຫ້ປະຊາຊົນທໍາການຜະລິດໃຫ້ເປັນສິນຄ້າເພີ່ມ, ຖ້າຫາກແມ່ນໜີ້ທີ່ເປັນຂອງພາກ ສ່ວນລັດແມ່ນຈະໄດ້ມີການປຶກສາຫາລືແກ້ໄຂວິທີການຊໍາລະຄ່າໄຟຟ້າ ແລະ ບາງກໍລະນີກໍຈະໄດ້ມີການເຮັດບົດບັນທຶກກັນຢ່າງຈະແຈ້ງເພື່ອເຮັດແນວໃດເຮັດໃຫ້ຕົວເລກໜີ້ຄ້າງຈ່າຍຄ່າໄຟຟ້າຈໍານວນ 40 ຕື້ກວ່າກີບ ໄດ້ຫຼຸດລົງຈາກປີ 2019, ສະນັ້ນຈຶ່ງຮຽກຮ້ອງໃຫ້ທຸກພາກສ່ວນຊ່ວຍຊໍາລະຄ່າໄຟຟ້າຕາມປົກຄະຕິເພື່ອເຮັດໃຫ້ການຈັດເກັບລາຍຮັບເຂົ້າງົບປະມານຂອງລັດໄປຕາມທີ່ກໍານົດໄວ້.

------------------

ຂຽນໂດຍ: ໂພທິຣາຊ  
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

• 24/02/2020