ມີ 50 ຮ້ານຈາກໄທ ຮ່ວມວາງສະແດງ ແລະຈຳໜ່າຍສິນຄ້າໂອດັອບ

  ເພື່ອເພີ່ມຊ່ອງທາງການຕະຫຼາດໃຫ້ກັບຜະລິດຕະພັນ OTOP, ເພື່ອໃຫ້ OTOP Trader ແລະຜູ້ຜະລິດ, ຜູ້ປະກອບການ OTOP ຂອງຈັງຫວັດຈັນທະບູລີໄດ້ຮຽນຮູ້ແນວທາງໃນການພັດທະນາຄຸນນະພາບມາດຕະຖານສິນຄ້າໃຫ້ເປັນທີ່ຍອມຮັບຂອງປະຊາຊົນປະເທດເພື່ອນບ້ານຈາກປະສົບການຈຳໜ່າຍສິນຄ້າ, ໃຫ້ OTOP Trader ແລະຜູ້ຜະລິດ,ຜູ້ປະກອບການ OTOP ໄດ້ມີໂອກາດເຈລະຈາເຮັດທຸລະກິດຂອງປະເທດເພື່ອນບ້ານ, ເພື່ອສົ່ງເສີມຄວາມສຳພັນດ້ານການຄ້າ ແລະການຮ່ວມ ມືກັບປະເທດເພື່ອນບ້ານ, ສົ່ງເສີມຄວາມສຳພັນດ້ານການຄ້າ ແລະການຮ່ວມມືລະຫວ່າງປະເທດເພື່ອນບ້ານໄດ້ຢ່າງມີປະສິດທິພາບ ແລະເກີດຜົນເປັນຮູບປະທຳ.

  ໃນລະຫວ່າງວັນທີ 20-22 ກຸມພາ 2020 ທີ່ສູນການຄ້າວຽງຈັນເຊັນເຕີ, ນະຄອນຫຼວງວຽງຈັນ ແຂວງຈັນທະບູລີ, ປະເທດໄທໄດ້ຈັດງານວາງສະແດງ ແລະ ຈຳ ໜ່າຍຜະລິດຕະພັນສິນຄ້າ OTOP ສານສຳພັນສອງແຜ່ນດິນໂດຍການເຂົ້າຮ່ວມຂອງ ທ່ານ ພົງພັດ ວົງຕະກຸນ ຮອງຜູ້ວ່າລາດສະການຈັງຫວັດຈັນທະບູລີ,ທ່ານ ນາງ ປະວິດຕາ ມ່ວງສະກຸນ ຜູ້ຊ່ວຍອຳນວຍການສຳນັກງານສົ່ງເສີມການຄ້າຕ່າງປະເທດນະຄອນຫຼວງວຽງຈັນ, ທ່ານນາງ ວັນວິສາ ນາມແກ້ວ ຫົວໜ້າຝ່າຍອຳນວຍການສຳນັກງານພັດທະນາຊຸມຊົນຈັງຫວັດຈັນທະບູລີ, ມີບັນດາຕາງໜ້າຈາກຜູ້ປະກອບການສິນຄ້າໂອດັອບໃນຈັງຫວັດຈັນທະບູລີເຂົ້າຮ່ວມ.

  ທ່ານ ນາງ ວັນວິສາ ນາມແກ້ວ ກ່າວວ່າ: ເພື່ອເປັນການສົ່ງເສີມການຮ່ວມມື, ການຄ້າ, ການລົງທຶນລະຫວ່າງປະເທດເພື່ອນບ້ານ ແລະການຈັດງານວາງສະແດງ ແລະຈຳໜ່າຍຜະລິດຕະພັນສິນຄ້າ OTOP ສານສຳພັນສອງແຜ່ນດິນໃນຄັ້ງນີ້ປະກອບດ້ວຍກຸ່ມເປົ້າໝາຍ OTOP Trader ເຄືອຂ່າຍ OTOP ຜູ້ຜະລິດ, ຜູ້ປະ ກອບການ OTOP ຂອງແຂວງຈັນທະບູລີແລະແຂວງໃກ້ຄຽງຈາກປະເທດໄທເຂົ້າຮ່ວມວາງສະແດງ ແລະຈຳໜ່າຍຈຳນວນ 50 ຮ້ານ ໃນນັ້ນມີອາຫານ (ເຂົ້າໜົມ), ເຄື່ອງສະໝຸນໄພ, ສິນຄ້າຫັດຖະກຳ ແລະມີສິນຄ້າ ODOP ຈາກ ສປປ ລາວ ເຂົ້າຮ່ວມ 3 ຮ້ານ.

-------------------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์